परमेश्वर उन वचन
मरकुस 16
यीशु उन पुनरूत्थान
(मत्ती २८:१-८; लूका २४:१-१२; यूहन्ना २०:१-१०)
याग आराम इन दिन बितसेत, रा मरियम मगदलीनी, अदिक याकूब उन मोय मरियम, अदिक सलोमी सुगन्धित अत्तर कोंडुर अदिक बंदकु यीशु उन लाश मा हच्चेव. यहूदीगोळ्द अनुसार हप्ता अन्द पयला दिन आयत्यार इन व्हातर्या अन्द आर मुरा याग सुर्य होळ्त, आंदुर कब्र मा बंदुर, अदिक आपस दा अनतोगोर, “नाम साटी कब्र अन्द दरवाजा मा टु कल्ल याव ढकलुस्यान?” कल्ल हापाळ धोळ्द ईरोद. याग आंदुर कण्ण नेगुकु नोळदुर रा कल्ल कब्र टु हटुस्कु ईरोद. आ आर्तेर याग कब्र अन्द बुळ्क होदुर रा आंदुर ऊंद स्वर्गदूत उक हारोदव मंळसा अन घाई बिळेव कपळा मा ऊमा कय दी कुर्तकु नोळदुर, अदिक हापाळ अंजेदुर.
स्वर्गदूत आंदुर से अंदुर, “अंजबाळी, नीव नासरत इन यीशु उक ढुंढ़सेतीर, याऊक क्रूस मा येर्सकु आगीत. आव जित्ता आग्यान, ईल हैलेच; नोळी, ईदा अद जागा हुन, यल आंदुर आऊक ईटीदुर. 1लेकीन नीव होगी, अदिक आऊन चेलागोळ अदिक पतरस से अनी कि आव नीम से पयले गलील इक होदान. ह्यांग आव नीम से अंदिदुन, नीव अल्या आऊक नोळीर.” अदिक आ आर्तेर होटकु कब्र टु वोळेदुर; यतिकी थरथराहट अदिक घबराहट आंदुर मय दा तुम्मेगीत; अदिक आंदुर यारदारा से येनु अंदिदील, यतिकी आंदुर हापाळ अंजकु ईरोर.
मरियम मगदलीनी इक यीशु उन कांळ्सोद
(मत्ती २८:९-१०; यूहन्ना २०:११-१८)
आयत्यार इक व्हातुर आगतेला अच यीशु जित्ता आगकु पयले मरियम मगदलीनी इक कांळ्सदुन. आकिन दा टु आव येळ दुष्टआत्मागोळ तेगदीदुन. आक होगकु यीशु उन संगीगोळी जो शोक दा मुळ्ककु ईरोर अदिक वोरलोर, ईद समाचार कोट्टुर. आंदुर ईद केळदुर कि यीशु जित्ता आन अदिक मरियम मगदलीनी आऊक नोळ्यार, रा आंदुर आकिन मातगोळ मा विश्वास माळीदील.
येढ्ढ चेलागोळी यीशु उन कांळ्सोद
(लूका २४:१३-३५)
ईदुर बाद्दा दा यीशु दुसरा रूप दा आंदुर दा टु येढ्ढ चेलागोळी याग आंदुर ऊर इन दी होगोर, कांळ्सदुन. आंदुर भी होगकु दुसरा चेलागोळी ईद समाचार कोट्टुर, लेकीन आंदुर फिर भी आंदुर्द मातगोळ मा विश्वास माळीदील.
हन्हुंद चेलागोळी यीशु उन कांळ्सोद
(मत्ती २८:१६-२०; लूका २४:३६-४९; यूहन्ना २०:१९-२३; प्रेरितगोळ १:६-८)
यीशु आ हनुन चेलागोळी भी कांळ्सदुन, याग आंदुर ऊमली कुर्तीदुर, कांळ्सदुन, अदिक आंदुर्द अविश्वास अदिक मन इन कठोरता मा आंदरी दनकुसदुन, यतिकी यार आऊंद जित्ता आगदुर बाद्दा आऊक नोळीदुर, आंदुर आऊंद विश्वास माळीदिल. 2अदिक यीशु चेलागोळ से अंदुन, “नीव पुरा दुनिया दा होगकु पुरा दुनिया अन लॉकुरी खुशखबरी प्रचार माळी. जो विश्वास माळ्यार अदिक बपतिस्मा ताकोंडार आऊंदा उद्धार आदीत, लेकीन जो विश्वास माळतीदील आऊंद न्याय आदीत अदिक आऊक दोषी ठहरूस्कु आदीत; विश्वास माळावाळेर दा ईव चिन्ह ईत्ताव कि आंदुर नान हेसुर देल दुष्टआत्मागोळी तेगदार, अदिक व्हासा व्हासा भाषा माताळ्यार, अदिक आंदुर हाव इक नेगु कोंडार, अदिक अगर आंदुर जयर भी कुडु कोंडार रा आंदरी येनु नुकस्यान आगतीदील; आंदुर बिमारगोळ मा कय मंळस्यार, अदिक बिमार चंगा आगेदार.”
यीशु उक स्वर्ग दा नेगुकु आगोद
(लूका २४:५०-५३; प्रेरितगोळ १:९-११)
प्रभु यीशु आंदुर से माताळदुर बाद्दा दा स्वर्ग मा नेगुकु आदुन, अदिक परमेश्वर उन ऊम्मा कय दी कुरतुन. अदिक आंदुर होटकु हर जागा मा प्रचार माळदुर, अदिक प्रभु आंदुर सांगुळ क्याल्सा माळतेला ईत्तुन, अदिक आ चिन्ह अन्द द्वारा जो सांगुळ सांगुळ आगतोगोव, वचन इक मजबूत माळतेला ईरोन. आमीन.4
Source notes (4)
- Cross-reference मत्ती २६:३२; मरकुस १४:२८
- Cross-reference प्रेरितगोळ १:८
- Cross-reference प्रेरितगोळ १:९-११
- Footnote इव आयतगोळ हस्त लिखीत हाळोद शास्त्र दा सिक्कीदील
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.