यूहन्ना 8

व्यभिचारिणी इक माफ

1लेकीन यीशु जैतून इन पहाळी मा होदुन. 2व्हातर्या आव मात्‍त मंदिर दा बंदुन; सप्पा लॉकुर आऊन हात्‍ती बंदुर अदिक आव कुर्तकु आंदरी उपदेश कोळली कुरतुन. 3आग शास्त्री अदिक फरीसी ऊंद आर्त इक तंदुर जो व्यभिचार दा हुळकु आगीदुर, अदिक आकी बीच दा निदरूसकु यीशु से अंदुर, 4“हे गुरु, ई आर्त व्यभिचार माळ्त हुळकु आदुर. 5व्यवस्था दा मूसा नामी आग्या कोटान कि हिंग आर्तेर मा पथराव माळुल. इदुरसाटी नी ई आर्त इन बारा दा येन अनत्या?” 6आंदुर आऊक परखुसोर साटी ईद मात अंदुर ताकी आऊन मा दोष हचोर साटी येनारा मात सिक्‍कुल. लेकीन यीशु बांगकु बेळ्ल देल जागा मा लिख्सली कुरतुन. 7याग आंदुर आऊन से केळतेला अच ईत्‍तुर, रा आव सिधा निदुरकु आंदुर से अंदुन, “नीम दा जो निष्पाप आन, आवा पयले आकी कल्ल होळदान.” 8अदिक बाक बांगकु जागा मा बेळ्ल देल लिख्सली कुरतुन. 9लेकीन आंदुर ईद केळकु धोड्डेर टु हुळकु स्याणेर ताका, ऊंद ऊंद माळकु होट्ट बुटुर, अदिक यीशु आबना ईतोदुन, अदिक आर्त अल्या बीच दा निदुरकु ईतोदुर. 10यीशु सरका आगकु आकिन से अंदुन, “हे आर्त, आंदुर येल होदुर? येन यारारा दण्ड इन आग्या कोटीदील?” 11आक अंदुर, “हे प्रभु, याऊ ईला.” यीशु अंदुन “ना भी नीनी दण्ड इन आग्या कोळालीन; होग, अदिक बाक पाप माळबाळेत.”

यीशु दुनिया अन ज्योति

121

यीशु बाक लॉकुर से अंदुन, “दुनिया अन ज्योति ना हुईन; जो नान हिंद आगेदान आव अंधकार दा नळुतीदील; लेकीन जीवन इन ज्योति सिक्‍कीत.” 132फरीसीगोळ आऊन से अंदुर, “नी तान गवाही खुद अच कोळत्या, नीन गवाही सही हैलेच.” 14यीशु आंदरी उत्‍तर कोट्टुन, “भला ही ना तान गवाही खुद अच कोळतीन, तरी भी नान गवाही खरा आद, यतिकी ना जान्सतीन कि ना यल टु बंदीन अदिक यल होगतीन? लेकीन नीव जान्सालीर कि ना यल टु बरतीन या यल होगतीन. 15नीव मय इन अनुसार न्याय माळतीर; ना यारदु न्याय माळालीन. 16अदिक अगर ना न्याय माळाईन भी, रा नान न्याय खरा आद; यतिकी ना आबना हैलेच, लेकीन ना हुईन, अदिक आप्प आन याव नानी कळुदुन. 17नीम व्यवस्था दा भी लिख्सकु आद कि येढ्ढ मुंदुर गवाही मिलुसकु सही आगतद; 18ऊंद रा ना खुद तान गवाही कोळतीन, अदिक दुसरा आप्प नान गवाही कोळतान याव नानी कळ्यान.” 19आंदुर आऊन से अंदुर, “नीन आप्प यल आन?” यीशु उत्‍तर कोट्टुन, “ना नीव नानी जान्सतीर, ना नान आप्प उक, अगर नानी जान्सायदीर रा नान आप्प उक भी जान्सायदीर.” 20ई मातगोळी आव मंदिर दा उपदेश कोळतेला भंडार मान्या अंदुन, अदिक याऊ आऊक हुळदीदिल, यतिकी आऊन समय ईगासताका ईला बंदीत.

तान बारा दा यीशु उन कथन

21यीशु बाक आंदुर से अंदुन, “ना होगतीन, अदिक नीव नानी ढुंढसीर अदिक तान पाप दा सोत्‍तीर; यल ना होगतीन, अल नीव बर सकालीर.” 22इदुर मा यहूदीगोळ अंदुर, “येन आव तान तान इक कोंद बुटान, जो अनतान, ‘यल ना होगतीन अल नीव बर सकालीर.’” 23आव आंदुर से अंदुन, “नीव ल्यालमा नोर हुईर, ना म्याकुच इनव हुईन; नीव दुनिया नोर हुईर, ना दुनिया इनव आल्लच. 24इदुरसाटी ना नीम से अंदीन कि तान पापगोळ दा सोत्‍तीर, यतिकी अगर नीव विश्वास माळतीदील कि ना आवा हुईन रा तान पापगोळ दा सोत्‍तीर.” 25आंदुर आऊन से अंदुर, “नी याव हुय?” यीशु आंदुर से अंदुन, “आवा हुईन जो सुरूवात टु नीम से अनतेला बंदीन. 26नीम बारा दा नानी हापाळ येनारा अनोद अदिक निर्णय माळोद आद; लेकीन नान कळावाळा खरा आन, अदिक जो ना आऊन से केळदीन अदा दुनिया अक अनतीन.” 27आंदुर ईद समसीदील कि नाम से आप्प उन बारा दा अनतान. 28आग यीशु अंदुन, “याग नीव मंळसा अन पार उक म्याकुच येरसीर, रा जानसीर कि ना आवा हुईन; ना तान तान से येनु माळालीन लेकीन ह्यांग नान आप्प नानी कलस्यान हांग अच ई मातगोळी अनतीन. 29नान कळावाळा नान सांगुळ आन; आव नानी आबना बिटीदिल यतिकी ना सदा अदा क्याल्सा माळतीन यदुर देल आव प्रसन्न आगतान.” 30आव ईव मातगोळी अनतेला अच ईरोन कि हापाळ मुंदुर आऊन मा विश्वास माळदुर.

सच्चाई नीमी स्वतंत्र माळीत

31आग यीशु आ यहूदीगोळ से यार आऊन मा विश्वास माळीदुर, अंदुन, “अगर नीव नान वचन दा बन्सकु ईत्‍तीर, रा सही दा नान चेलागोळ ठहरूसीर. 32नीव सही अक जानसीर, अदिक सही नीमी स्वतंत्र माळीत.” 333आंदुर आऊक उत्‍तर कोट्टुर, “नाव रा अब्राहम उन वंश टु आयेव, अदिक यागलु यारदु दास आगीदील. बाक नी ह्यांग अनत्या कि नीव स्वतंत्र आगेदीर?” 34यीशु आंदरी उत्‍तर कोट्टुन, “ना नीम से खरा खरा अनतीन कि जो यावारा पाप माळतान आव पाप इन दास आन. 35दास सदा मान्या ईरालुन; पार सदा ईरतान. 36इदुरसाटी अगर पार नीमी स्वतंत्र माळ्यान, रा सचमुच नीव स्वतंत्र आगेदीर. 37ना जान्सतीन कि नीव अब्राहम उन वंश टु आईर; तरी नान वचन नीम दिल दा जागा हुडाल्द, इदुरसाटी नीव नानी कोंद बुळोद चाहासतीर. 38ना अदा अनतीन, जो तान आप्प उन मान्या नोळदीन; अदिक नीव अदा माळतेला ईरतीर जो नीव तान आप्प उन से केळदीर.” 39आंदुर आऊक उत्‍तर कोट्टुर, “नाम आप्प रा अब्राहम हुन.” यीशु आंदुर से अंदुन, “अगर नीव अब्राहम उन औलाद आगयदीर, रा अब्राहम उन घाई क्याल्सा माळायदीर. 40लेकीन ईग नीव नान घाई मंळसा अक कोंद बुळोद चाहासतीर, याव नीमी अद सही वचन हेळदुन जो परमेश्वर से केळदेव; हिंग रा अब्राहम ईला माळीदुन. 41नीव तान आप्प उन घाई क्याल्सा माळतीर.” आंदुर आऊन से अंदुर, “नाव व्यभिचार देल पैदा आगीदील, नाम ऊंद आप्प आन मतलब परमेश्वर.” 42यीशु आंदुर से अंदुन, “अगर परमेश्वर नीम आप्प ईरायदुन, रा नीव नान से प्यार ईटायदीर; यतिकी ना परमेश्वर उन दी टु बंदीन. ना खुद देल बंदिदील, लेकीन आवा नानी कळ्यान. 43नीव नान मात येती समसालीर? इदुरसाटी कि नीव नान वचन केळ सकालीर. 44नीव तान आप्प शैतान उन दी टु आईर अदिक तान आप्प उन लालसागोळी पुरा माळोद चाहासतीर. आव रा सुरूवात टु हत्यारा आन अदिक सही मा संची ईतीदील; यतिकी सही आऊन दा हैलेच. याग आव ख्वाटा माताळतान, रा तान स्वभाव देल अच माताळतान; यतिकी आव झुठा आन अदिक झुठ इन आप्प आन. 45लेकीन ना जो खरा माताळतीन, इदुर्दा साटी नीव नांद विश्वास माळालीर. 46नीम दा टु याव नानी पापी ठहरूसतान? अगर ना खरा माताळतीन, रा नीव नान विश्वास येती माळालीर? 47जो परमेश्वर टु आगतान, आव परमेश्वर उन मातगोळी केळतान; अदिक नीव इदुरसाटी केळालीर कि परमेश्वर उन दी टु आल्लच.”

यीशु अदिक अब्राहम

48ईद केळकु यहूदीगोळ यीशु से अंदुर, “येन नाव खरा अनालेव कि नी सामरी हुय, अदिक नीन दा दुष्टआत्मा आद?” 49यीशु उत्‍तर कोट्टुन, “नान दा दुष्टआत्मा हैलेच; लेकीन ना तान आप्प उन आदर माळतीन, अदिक नीव नान निरादर माळतीर. 50लेकीन ना तान प्रतिष्ठा चाहासालीन; हव, ऊंद आन जो चाहासतान अदिक न्याय माळतान. 51ना नीम से खरा खरा अनतीन कि अगर यावारा मंळसा नान वचन मा नळदान, रा आव अनन्त काल ताका मृत्यु अक नोळतीदिल.” 52यहूदीगोळ आऊन से अंदुर, “ईग नाव जान्स कोंडेव कि नीन दा दुष्टआत्मा आद. अब्राहम सोतोदुन, अदिक भविष्यवक्तागोळ भी सोतोग्यार; अदिक नी अनत्या, ‘अगर यावारा नान वचन मा नळदान रा आव अनन्त काल ताका मृत्यु नोळतीदिल.’ 53नाम आप्प अब्राहम रा सोतोदुन. येन नी आऊन से धोड्डेव आय? अदिक भविष्यवक्तागोळ भी सोतोदुर. नीमी येन हततद कि नीव येन हुईर?” 54यीशु उत्‍तर कोट्टुन, “अगर ना खुद तान महिमा माळाईन, रा नान महिमा येनु ईला; लेकीन नान महिमा माळावाळा नान आप्प आन, यारी नीव अनतीर कि आव नीम परमेश्वर हुन. 55नीव रा आऊक जानसीदील: लेकीन ना आऊक जान्सतीन. अगर ना अनाईन कि ना आऊक जान्सालीन, रा ना नीम घाई ख्वाटा ठहरूसाईन; लेकीन ना आऊक जान्सतीन अदिक आऊन वचन मा नळुतीन. 56नीम आप्प अब्राहम नान हागुल नोळोद आशा देल हापाळ मग्न ईरोन; अदिक आव नोळदुन अदिक खुश आदुन.” 57यहूदीगोळ आऊन से अंदुर, “ईगासताका नी पचास वर्ष इन हैलेच, तरी भी नी अब्राहम उक नोळ्या?” 58यीशु आंदुर से अंदुन, “ना खरा खरा अनतीन, कि पयले इदुर्द कि अब्राहम पैदा आदुन, ना आईन.” 59आग आंदुर आऊक बडोर साटी कल्ल नेगदुर, लेकीन यीशु होचकु मंदिर टु होटबुटुन.