यूहन्ना 11

लाज़र उन मृत्यु

11

मरियम अदिक आकिन आकतींग मार्था अन्द ऊर बैतनिय्याह अन्द लाज़र हेसुर इन ऊंद मंळसा बिमार ईरोन. 22इक आका मरियम ईरोर यार प्रभु मा अत्‍तर हाक्‍कु आऊन कालगोळी तान चुट्टीगोळ देल सिटीदुर, ईकी नवा वार्ट लाज़र बिमार ईरोन. 3इदुरसाटी आऊन आकतींगेर यीशु उक बातणी कळुदुर, “हे प्रभु, नोळ, यार से नी प्यार ईटत्या, आव बिमार आन.”

4ईद केळकु यीशु अंदुन, “ईद बिमारी सायोद आलच; लेकीन परमेश्वर उन महिमा अन्द साटी हुन, कि आऊन द्वारा परमेश्वर उन पार ऊंद महिमा आगुल.”

5यीशु मार्था अदिक आकिन आकतींग अदिक लाज़र से प्यार ईटतोगोन. 6तरी भी याग आव केळदुन कि आव बिमार आन, रा याता जागा मा आव ईरोन, अल येढ्ढ दिन मात्‍त रूकसेदुन. 7ईदुर बाद्दा आव चेलागोळ से अंदुन, “बरी, नाव मात्‍त यहूदिया नगर इक होगाता.”

8चेलागोळ यीशु से अंदुर, “हे गुरु, ईगल्या रा यहूदी लॉकुर नीन मा कल्लगोळी होडोद चाहासोर, अदिक येन नी मात्‍त अल्या होगोद चाहासत्या?”

9यीशु उत्‍तर कोट्टुन, “येन हागुल ईनव हन्नेळ घंटा ईरालव? अगर यावारा हागुल इन होती नळुतान रा ठोकर तिनालुन, यतिकी ई दुनिया अन्द उजुळ नोळतान. 10लेकीन अगर यावारा ईळ्लक इन होती नळुतान रा ठोकर तिनतान, यतिकी अदुर्दा उजुळ हैलेच.” 11आव ई मातगोळ अंदुन, अदिक ईदुर बाद्दा आंदुर से अनली कुरतुन, “नाम संगी लाज़र मिंगेग्यान, लेकीन ना आऊक येब्सली होगतीन.”

12आग चेलागोळ आऊन से अंदुर, “हे प्रभु, अगर आव मिंगेग्यान, रा वळ्लेव आगेदान.” 13यीशु रा आऊन मृत्यु ऊंद बारा दा अंदिदुन, लेकीन आंदरी हिंग हत्‍त कि आव जप देल मिंगोद बारा दा अंदान. 14आग यीशु आंदुर से साफ साफ अंद बुट्टुन, “लाज़र सोतोग्यान; 15अदिक ना नीम कारण खुश आईन कि ना अल ईला ईरीन यदुर देल नीव विश्वास माळी. लेकीन ईग बरी, नाव आऊन हात्‍ती होगाता.” 16आग थोमा यारी दिदुमुस अनतार, तान साथी चेलागोळ से अंदुन, “बरी, नाव भी आऊन सांगुळ सायली होगाता.”

यीशु ऊंद पुनरूत्थान अदिक जीवन

17अल होगदुर मा यीशु उक ईद मालूम आत कि लाज़र उक कब्र दा ईटकु नाक दिन आगेग्याव. 18बैतनिय्याह यरूशलेम इन हात्‍ती येढ्ढ मील इन दुरी मा ईरोद. 19हापाळ सा यहूदी मार्था अदिक मरियम इन हात्‍ती आकिन वार्ट ऊंद मृत्यु मा शांती कोळोर साटी बंदीदुर.

20याग मार्था यीशु ऊंद बरोद समाचार केळदुर रा आऊन से मुलाकात माळली होदुर, लेकीन मरियम मान्या अच ईत्‍तुर. 21मार्था यीशु से अंदुर, “हे प्रभु, अगर नी ईल ईराईद, रा नान वार्ट ईला सायायदुन. 22लेकीन ना ईग भी जान्सतीन कि नी जो येनारा परमेश्वर से बेळ्या, परमेश्वर नीनी कोट्टान.”

23यीशु आकिन से अंदुन, “नीन वार्ट मात्‍त जित्‍ता आदान.”

24मार्था आऊन से अंदुर, “ना जान्सतीन कि आखरी दिनगोळ दा पुनरूत्थान इन समय आव जित्‍ता आदान.”

25यीशु आकिन से अंदुन, “पुनरूत्थान अदिक जीवन ना अच हुईन; जो यावारा नान मा विश्वास माळतान आव अगर सोतो भी दान तरी भी जित्‍ता आदान, 26अदिक जो यावारा जित्‍ता आन अदिक नान मा विश्वास माळतान, आव अनन्त काल ताका सायतीदील. येन नी ई मात मा विश्वास माळत्या?”

27आक आऊन से अंदुर, “हव हे प्रभु, ना विश्वास माळतीन कि परमेश्वर उन पार मसीह जो दुनिया दा बरावाळा ईरोन, आव नी अच हुय.”

यीशु वर्लदुन

28ईद अनकु आक होटोदुर, अदिक तान आकतींग मरियम इक कारूकु सुंगासुंग अंदुर, “गुरु ईवा हुन अदिक नीनी कारूतान.” 29ईद केळ्त अच आक तुरन्त यदकु आऊन हात्‍ती बंदुर. 30यीशु ईगल्या ऊर दा बरली इक ईरोन लेकीन अदा जागा मा ईरोन यल मार्था आऊन से मुलाकात माळीदुर. 31आग जो यहूदी आऊन सांगुळ मान्या ईरोर अदिक आऊक शांती कोळोर, ईद नोळकु कि मरियम तुरन्त यदकु व्हार्या होग्यार आंदुर ईद सम्सदुर कि आक कब्र मा वर्ली होगेत्यार, रा आकिन हिंद आगेदुर.

32याग मरियम अल पोहचुसदुर यल यीशु ईरोन, रा आऊक नोळ्त अच आऊन कालगोळ मा बिदोदुर अदिक अंदुर, “हे प्रभु, अगर नी ईल ईराईद रा नान वार्ट ईला सायायदुन.”

33याग यीशु आक इक अदिक आ यहूदीगोळी जो आकिन सांगुळ बंदीदुर, वर्लतेला नोळदुन, रा तान आत्मा दा हापाळ अच उदास अदिक व्याकुल आदुन, 34अदिक अंदुन, “नीव आऊक यल ईटीर?”

आंदुर आऊन से अंदुर, “हे प्रभु, नळुकु नोळ कोम.”

35यीशु वर्लदुन. 36आग यहूदी अनली हतदुर, “नोळी, आव आऊन से याट प्यार ईटतान.”

37लेकीन आंदुर दा टु थ्वाळासा यहूदीगोळ अंदुर, “येन ईव याव कुढ्ढ मंळसा अन्द कण्णगोळ तेरदुन, येन ईद भी माळ सकिदील कि ई मंळसा ईला सायायदुन?”

यीशु लाज़र उक जित्‍ता माळदुन

38यीशु तान मन दा मात्‍त हापाळ अच उदास आगकु कब्र मा बंदुन. अद ऊंद गुफा ईरोद अदिक ऊंद कल्ल आ गुफा मा ईटकु ईरोद. 39यीशु अंदुन, “कल्ल सरकुसी.”

जो सोतकु ईरोन आऊन आकतींग मार्था आऊन से अनली हतदुर, “हे प्रभु, आऊन दा टु ईग वास बरतद, यतिकी आऊक सोतकु नाक दिन आगेग्याव.”

40यीशु आकिन से अंदुन, “येन ना नीन से ईला अंदिदीन कि अगर नी विश्वास माळ्या, रा परमेश्वर ऊंद महिमा अक नोळ्या.” 41आग आंदुर आ कल्ल इक सरकुसदुर. यीशु तान कण्णगोळ नेगुकु अंदुन, “हे आप्पा, ना नींद धन्यवाद माळतीन कि नी नांद केळ कोंड्या. 42ना जानसीन कि नी हमेशा नांद केळत्या, लेकीन जो भीळ आसपास निदुरकु आद, आंदुर कारण ना हिंग अंदीन, यदुर देल कि आंदुर विश्वास माळुल कि नी नानी कळ्या.” 43ईद अंदकु आव धोळ्द आवाज देल कारदुन, “हे लाज़र, व्हार्या बा!” 44जो सोतोगिदुन आव कब्र दा टु ह्यांग आऊनव कय काल कटकु ईरव हांगा व्हार्या बंदुन, अदिक आऊन बाय गमछा देल होचकु ईरोद. यीशु आंदुर से अंदुन, “आऊक तेरू बुळी अदिक होगगोळी.”

यीशु उन खिलाप साजीश

(मत्ती २६:१-५; मरकुस १४:१,२; लूका २२:१,२)

45आग जो यहूदी मरियम इन हात्‍ती बंदीदुर अदिक यीशु उन ईद क्याल्सा नोळीदुर, आंदुर दा टु हापाळ मुंदुर आऊन मा विश्वास माळदुर. 46लेकीन आंदुर दा टु थ्वाळासा यहूदीगोळ फरीसीगोळ्द हात्‍ती होगकु यीशु उन क्याल्सागोळ्द बातणी कोट्टुर. 47ईदुर मा प्रधान याजकगोळ अदिक फरीसीगोळ महासभा कार्सदुर, अदिक अंदुर, “नाव येन माळेतेव? ई मंळसा रा हापाळ चमत्कार तोर्सतान. 48अगर नाव आऊक हिंग अच बिट बुटेव, रा सप्पा आऊन मा विश्वास माळ कोंडार, अदिक रोमी साम्राज्य अन्द लॉकुर बंदकु नाम जागा अदिक जाती येढ्ढु मा अधिकार माळ कोंडार.”

49आग आंदुर दा टु कैफा हेसुर ईनव ऊंद मंळसा जो आ वर्ष ईनव महायाजक ईरोन, आंदुर से अंदुन, “नीव येनु अच जानसालीर; 50अदिक ना नीमी ईद ऊम्सतद कि नीम साटी ईद वळ्लीद आद कि नाम लॉकुर्द साटी ऊंद मंळसा सायुल, अदिक सप्पा जाती इन नाश आगबाळुल.” 51ईद मात आव तान दी टु अंदिदील, लेकीन आ वर्ष इन महायाजक आगकु भविष्यवाणी माळदुन, कि यीशु आ जाती इन साटी सोत्‍तान; 52अदिक ना सिर्फ आ जाती इन साटी, उलटा इदुरसाटी भी कि परमेश्वर उन जो तितर-बितर औलाद आव अवरी ऊंद माळ सकुल.

53इदुरसाटी अदा दिन टु आंदुर आऊक कोंद बुळोद साजीश माळली कुरतुर. 54इदुरसाटी यीशु आ समय टु यहूदीगोळ दा प्रगट आगकु टेटीदिल, लेकीन अल टु आळी इन हात्‍तीपास इन प्रदेश इन इफ्राईम हेसुर इन ऊंद नगर इक होटोदुन; अदिक तान चेलागोळ्द सांगुळ अल्या ईरली कुरतुन.

55यहूदीगोळ्द फसह अन्द हाब्ब हात्‍ती ईरोद, अदिक हापाळ सा लॉकुर फसह से पयले देहात टु यरूशलेम इक होदुर कि तान तान इक शुद्ध माळुल. 56इदुरसाटी आंदुर यीशु उक ढुंढ्सली हतदुर अदिक मंदिर दा निदुरकु आपस दा अनली हतदुर, “नीव येन सोचतीर? येन आव हाब्ब दा बरतीदील?” 57प्रधान याजकगोळ अदिक फरीसीगोळ ईद आदेश कोटकु ईटीदुर कि यावारा यीशु उक नोळुल रा खबर कोळुल, कि आंदुर आऊक हुडु सकुल.