दानिय्येल 8

दूसरा दर्शन : म्यांडा अदिक व्हात तथा अऊर मतलब

1“म्याकळोद दर्शन इन बाद्दा ना-दानिएल उक राजा बेलशस्सर उन राज्‍यकाल इन तीसरा वर्ष दा ऊंद अदिक दर्शन कांळ्सकु बत. 2याग ना एलाम प्रदेश इन राजधानी शूशन हेसुर इन किला दा ईरतोगीन. ईद ना दर्शन दा नोळदीन. इदुर बाद्दा ना नोळदीन कि ना ऊलै हेसुर इन गांगा अन्द किनारा मा नीदुरकु ईरीन. 3ना नजर म्याकुच माळदीन, रा नोळदीन कि गांगा अन्द किनारा मा ऊंद म्यांडा नीदुरकु आद. अऊर येढ्ढ सींग आव. ईव येढ्ढु सींग धोळ-धोळ ईरव, लेकीन ऊंद सींग-दूसरा सींग से धोळ ईरोद. जो सींग धोळ ईरोद, अद स्यांण सींग इन बाद्दा होटीत.”

4ना नोळदीन कि म्यांडा पश्‍चिम, उत्तर अदिक दक्षिण दिशागोळ दा आक्रमण माळ बुळ्त, अदिक अदुर्द मुंद याऊ पशु टिक्स सकीदील. अदुर कय देल ऊळसावाळा याऊ ईला ईरोन. अद हापाळ व्‍यवहार माळ्त, अदिक खुद इक हापाळ उन्नत माळ्त. 5ना सोचतेला अच ईरीन, रा बाक येन नोळदीन कि ऊंद व्हात पश्चिम दिशा टु होटकु पुरा पृथ्वी इन म्याकुच हिंग तिर्गत कि नळुत समय भूमी मा काल हत गोटीदील अदिक आ व्हात इन कण्णगोळ न्याड्या ऊंद नोळा योग्य सींग ईरोद. 6अद आ येढ्ढ सींगवाळा म्यांडा अन्द हात्ती होगकु, यारी ना गांगा अन्द मुंद नीदुरकु नोळीदिन, अदुर मा गुस्सा देल तान पुरा ताकत देल हरूकु टक्कर होडुत. 7ना नोळदीन कि अद म्यांडा अन्द एकदम हात्ती पहुचुसेत, अदिक आऊन प्रति अद गुस्सा दा उबलुसेत्याद. अद अदुर मा झपटुस्त, अदिक अद अदुर्द येढ्ढु सींग मुर्द बुळ्त. म्यांडा दा ईट ताकत ईला ईरोद कि अद व्हात इन सामना माळ सकुल. व्हात म्यांडा अक भूमी मा पटकुस बुळ्त अदिक अदरी तान खुरागोळ देल मेट्ट बुळ्त. व्हात इन कय टु आ म्यांडा अक ऊळसावाळा याऊ ईला ईरोन.

8ईग व्हात यक्कुल शक्‍ति सम्‍पन्न आगेत. लेकीन याग अद ताकद इन शिखर मा ईरोद आग अदुर्द धोळ सींग मुरूत, अदिक अदुर जागा मा नाक विचित्र सींग होट्टव, अदिक अव आकाश इन नाकु दिशागोळ दी वाळुस्ली कुरतव.

9“ई नाकु सींगगोळ दा टु ऊंद सींग टु ऊंद अदिक स्यांण सींग होळ्त. अद स्यांळ्द सींग वाळुस्ली कुर्त अदिक वाळुस्त-वाळुस्त दक्षिण पूर्व दी वाळुस्ली कुर्त अदिक ईद सींग सुंदर धरती दी मुंद वाळुस्ली कुर्त. 10अद वाळुस्तेला-वाळुस्तेला स्‍वर्ग इन सेना ताका पहुचुसेत, अदिक अदुर्द तारागणगोळ दा टु थ्वाळासा तारागोळ इक पृथ्‍वी मा भिट्ट बुट्टुर, अदिक अवरी मेट्ट बुट्टुन.1 11अद स्‍वर्ग इन सेना अन्द अध्‍यक्ष से भी येक्कुल खुद इक सर्वोच्‍च घोषित माळ बुळ्त; अदिक जो हमेशा अग्निबलि स्‍वर्ग इन सेना अन्द अध्‍यक्ष उक येर्सकु आगोद, अदरी बंद माळ बुट्टुन. अद आऊन पवित्र निवास-जागा तोड़-फोड़ माळ्त 12अदिक तान सेना अक सौप्स बुळ्त. पवित्र जागा दा हमेशा अग्‍नि बलि इन बदला अधर्ममय उपासना माळली कुरतुर. सींग सत्य अक धुळा दा मिलुस बुळ्त अदिक अद तान अन्‍यायपूर्ण क्याल्सा दा सफल आगेदुन.”

13आग ना ऊंद भक्‍त उक माताळतेला केळदीन. ऊंद मात पवित्र जन ई माताळावाळा जन उन से केळोन, “हमेशा अग्निबलि अदिक विध्‍वंसकारी अधर्म इन बारा दा जो दर्शन तोर्सकु आग्याद अद याग पुरा आदीत? पवित्र जागा अन्द तोड़-फोड़ अदिक स्‍वर्ग इन सेना अन्द तारागणगोळ्द मेटकु आगोद यागासताका आगतेला ईत्तीत?” 14पयला जन आऊक ईद हेळदुन, “यागासताका तेईस सौ द्याव अदिक व्हातुर बितसेगालव, आगासताका अधर्म आगतेला ईत्तीत. ई अवधि इन बाद्दा पवित्र जागा शुद्ध माळकु आदीत.”

जिब्राएल स्वर्गदूत उन द्वारा दर्शन इन अर्थ हेळोद आगोद

15याग, ना दानिएल, ईद दर्शन नोळदीन आग ना इदुर्द मतलब इक समझुसोद प्रयत्न माळदीन. ना नोळदिन कि एकदम नान मुंद यावारा बंदकु नीदरेदुन; आव मंळसा अन्द घाई कांळसोन. 16ना यावारा मंळसा अन्द दण्ण केळदीन. अद ऊलै गांगा न्याड्या दा टु होळ्त. अद वाणी ऊंचा दण्ण दा अंत, “हे जिब्राएल ई मंळसा अक दर्शन इन मतलब समझुस बुळ.”2 17अत: जिब्राएल नान हात्ती बंदुन, यल ना नीदुरकु ईरीन. याग आव नान मुंद बंदुन आग ना अंजेदीन अदिक भूमी मा बाय इन भार देल बिद्दीन. आव नान से अंदुन, “हे मंळसा, जो दर्शन नी नोळ्द अदुर्द मतलब सम्स. ईद दर्शन हमेशा अन्द बारा दा आद.”

18आव नान से माताळतेला अच ईरोन कि ना अचेतन आगेदीन अदिक भूमी मा उलटा-बाय देल बिद्दीन. लेकीन आव नान इक कय मुटदुन, अदिक नान इक कालगोळ मा नीदरूस बुट्टुन. 19आव अंदुन, “केळ, ई कोप-युग इन आखरी दिनगोळ दा जो घटनागोळ घटुस्याव, अवरी ना नीन मा प्रकट माळेतीन. ईव ठहरूस्कु आग्याद युगांत इन संबंध दा आद.”

20“जो म्यांडा अन्द येढ्ढ सींग नी नोळ्द, अव मादी अदिक फारसी साम्राज्‍य अन्द येढ्ढ राजा हु; 21अदिक चुट्टीवाळा व्हात यूनान द्याश इन राजा हुन. ई व्हात इन येढ्ढु कण्णगोळ न्याड्या दा स्‍थित सींग इन मतलब आद : यूनान इन पयला राजा. 22जो नाक सींग ई सींग इन मुरदुर बाद्दा इदुर जागा मा होट्टव, इदुर ईद मतलब आद: यूनानी राष्ट्र दा टु नाक राज्‍यगोळ्द उदय आदीत, लेकीन अव इदुर घाई शक्‍तिशाली आगतीदील.” 23ई नाकु राज्‍य इन आखरी दिनगोळ दा, याग आंदुर पाप इन घड़ा तुमेदीत, ऊंद राजा पैदा आदान. आऊन मार्र कठोर अदिक जिद्दी कुटिल स्‍वभाव इन ईत्तीत. आव दोगला मातगोळ माळ्यान. 24आव शक्‍तिशाली आदान, अदिक हर जागा विनाश इन भयानक ढेर हच कोंडान. जो भी क्याल्सा आव कय दा ताकोंडान, अदुर दा आव सफल आदान. आव शक्‍तिशाली लॉकुर्द अदिक पवित्र लॉकुर्द जनसमुदायगोळ इक नष्‍ट माळ्यान. 25आव तान चतुराई दा तान हर ऊंद कपटपूर्ण क्याल्सा दा सफल आदान. तान सफलता देल आव मन अच मन फूलुस्कु निडर आगेदान. आव बिना चेतावनी कोटकु हापाळ लॉकुर्द वध माळ बुट्टान. ईल ताका कि आव “शासकगोळ्द शासक” उन भी विरोध माळ्यान. लेकीन आव आखरी दा बिना यावारा मंळसा अन्द कय हचदुर देल अच नाश आगेदीत. 26“जो नी द्यावगा अन्द अदिक व्हातुर इन दर्शन नोळ्द, जो नीन इक हेळकु आत, अद खरा आद. लेकीन नी अदरी मुहरबन्‍द माळकु सुरक्षित ईटेत, यारीकु हेळ बाळेत; यतिकी अद ईंद टु हापाळ दिन इन बाद्दा घटुसीत.” 27“ना, दानिएल, ईद दर्शन पाऊसकु ईट कमजोर आगेदीन कि थ्वाळासा दिनगोळ ताका बीमार बिदकु ईत्तीन. याग ना स्‍वस्‍थ आदीन आग व्हर्स टु येद्दीन अदिक राजकाज दा व्‍यस्‍त आगेदीन. लेकीन ना दर्शन इन कारण चकित ईरीन; यतिकी ना अदरी सम्स सकिदील.”