परमेश्वर उन वचन
दानिय्येल 6
दानिएल हुल्लगोळ्द पिंजरा दा
सम्राट दारा तान पुरा साम्राज्य दा शासन माळोर साटी ऊंद सौ ईप्पत अधिपती नियुक्त माळदुन. आऊक तान ईद क्याल्सा उचित हत. आव ई ऊंद सौ ईप्पत अधिपतीगोळ म्याकुच मुर अध्यक्ष नियुक्त माळदुन, आंदुर दा टु ऊंद अध्यक्ष दानिएल ईरोन. अधिपती आ अध्यक्षगोळ इक लेखा-जोखा कोळतोगोन. ई प्रकार सम्राट उक शासन कार्य दा यातोदु प्रकार इन आर्थिक हानि ईला आगतोगोद.
दानिएल दा ऊंद वळ्लीद आत्मा ईरोद, इदुरसाटी आव अध्यक्षगोळ अदिक अधिपतीगोळ दा प्रतिष्ठित आगेदुन. सम्राट दारा ऊंद योजना माळदुन कि आव पुरा राज्य इन म्याकुच दानिएल उक प्रशासक नियुक्त माळुल. आंदुर प्रशासन इन संबंध दा दानिएल उन विरूद्ध शिकायत माळोद आधार ढूंढ्सदुर, लेकीन आंदरी शिकायत इन येनु आधार सकिदील अदिक दानिएल उन यातोदु भ्रष्ट क्याल्सा. दानिएल ऊंद ईमानदार प्रशासक ईरोन. अत: अध्यक्षगोळ अदिक अधिपतीगोळ इक आऊन क्याल्सागोळ्द संबंध दा यातोदु भूल-चूक सिक्कीदील. इदुरसाटी आंदुर आपस दा ईद अंदुर, “दानिएल उन प्रशासन-कार्य अन्द संबंध दा शिकायत इन येनु आधार नामी सिकतीदील; लेकीन नाव आऊन परमेश्वर उन व्यवस्था अन्द संबंध दा यातोवारा गलती ढूंढ्स सकतेव.”
आग आंदुर अध्यक्ष अदिक अधिपति ऊंद मत आगकु सम्राट दारा अन्द हात्ती बंदुर, अदिक आंदुर आऊन से ईद अंदुर, “महाराज दारा, नी हमेशा जित्ता ईत्या! नीन राज्य इन अध्यक्षगोळ, हाकिमगोळ, अधिपतिगोळ, मंत्रीगोळ अदिक राज्यपालगोळ ऊंद मत देल ईद निर्णय तांकोडुर कि महाराज उक ईद परामर्श कोळुल कि नी ईद आदेश अदिक आग्या प्रसारित माळुल कि जो मंळसा तीस दिन इन अवधि इन दौरान नीन अलावा यातोदु द्याव उन अथवा मंळसा से विनती माळ्यान रा आव हुल्ल इन गुफा दा हाक्कु आदान. ईग, महाराज, ई आग्या अक पक्का माळबुळ अदिक ई चिट्टी मा हस्ताक्षर माळबुळ, इदुर देल, मादीगोळ अदिक फारसीगोळ्द व्यवस्था अन अनुसार अदुर दा येनु परिवर्तन आग सकाल्द अदिक अदरी रद्द माळकु आग सकाल्द.” आग सम्राट दारा आ आग्या चिट्टी मा हस्ताक्षर माळकु आग्या जारी माळ बुट्टुन.
याग दानिएल उक ईद मालूम आत कि आग्या अन्द चिट्टी मा सम्राट दारा अन्द हस्ताक्षर आगेत, आग आव तान मान्नी होदुन. आऊन मान्ना अन्द म्याकुच इन मंजिल इन कमरा अन्द खिळकीगोळ यरूशलेम नगर इन दिशा दा खुलसव. आंदुर हागुल दा मुर घन टाँगरा टेक्सकु परमेश्वर से प्रार्थना माळोर अदिक आऊक धन्यवाद कोळतोगोर. आग भी हांग अच माळतेला ईत्तुन.
अदा समय अध्यक्ष अदिक अधिपती बंदुर जो ऊंद मत आगेगीदुर. आंदुर दानिएल उक तान परमेश्वर से निवेदन माळतेला अदिक प्रार्थना विनती माळतेला नोळदुर. आग आंदुर सम्राट दारा अन्द हात्ती बंदुर, अदिक आंदुर आग्या अन्द संबंध दा आऊन मुंद अंदुर, “महाराज, ‘येन नी आग्या अन्द चिट्टी मा हस्ताक्षर माळीदिल कि जो मंळसा तीस दिन इन अवधि इन दौरान नीन अलावा यातोदु द्याव उन अथवा मंळसा से विनती माळ्यान, रा आव हुल्ल इन पिंजरा दा हाक्कु आदान?’ सम्राट उत्तर कोट्टुन, ‘मादीगोळ अदिक फारसीगोळ्द व्यवस्था अन अनुसार ईद आग्या पक्का आद, अदिक अदुर दा परिवर्तन आग सकाल्द, अदिक अदरी रद्द माळकु आगाल्द.’” अध्यक्षगोळ अदिक अधिपतिगोळ सम्राट दारा अन्द मुंद अंदुर, “महाराज, आव दानिएल, जो यहूदा प्रदेश इन गुलामगोळ दा टु ऊंद आन, नीन उपेक्षा माळतार. या आग्या चिट्टी मा नी हस्ताक्षर माळ्द, आंदुर अदुर मा ध्यान कोळालुर. आंदुर तान परमेश्वर से हागुल दा मुर घन विनती माळतार.”
ईव मातगोळ केळकु सम्राट दारा अक हापाळ दु:ख आत. आव दानिएल उक ऊळसोर साटी उपाय सोचली कुरतुन. आव व्हातुर टु द्यावगा ताका दानिएल उन रक्षा अन्द साटी मन अच मन प्रयत्न माळतेला ईत्तुन.
आग अध्यक्ष अदिक अधिपती जो ऊंद मत आगेगीदुर सम्राट दारा अन्द हात्ती मात बंदुर. आंदुर सम्राट से अंदुर, “महाराज, याद ईट: मादीगोळ अदिक फारसीगोळ्द व्यवस्था अन ईद कानून आद: राजा द्वारा ठहरूस्कु आदेश अथवा आग्या दा परिवर्तन आग सकाल्द अदिक अदरी रद्द माळ सकालुर.”
आग सम्राट दारा दानिएल उक बंदी माळोद आदेश कोट्ट बुट्टुन. आऊक उक हुळकु तंदुर, अदिक आऊक हुल्लगोळ्द गुफा दा हाक्क बुट्टुर. सम्राट आऊन से अंदुन, “हे दानिएल, या परमेश्वर उन नी हमेशा आराधना माळत्या, आव नीन रक्षा माळुल!”
आग सम्राट उन क्याल्सा माळावाळेर ऊंद धोळ कल्ल तंदुर. आंदुर अदरी गुफा अन्द बाय मा ईट बुट्टुर. इदुर बाद्दा सम्राट दारा तान ऊंगरा अदिक सामंतगोळ ऊंगरागोळ देल गुफा अन्द बाय मा मोहर हच बुट्टुर कि दानिएल उन दशा अक बदलुस्कु आग बाळुल. अदुर बाद्दा सम्राट दारा तान महल दा होटोदुन. आव आ ईळ्लक इक ऊंडीदील. आव तान मनोरंजन माळावाळेर इक मना माळ बुट्टुन; अत: आ ईळ्लक इक आऊन हात्ती याऊ बंदीदिल. आऊन कण्णगोळ दा टु जप हारेत.
व्हातर्या, सूरज होळतेला अच सम्राट दारा पलंग टु येद्दुन अदिक बिना देरी माळतेला हुल्लगोळ्द गुफा दी होदुन. आव गुफा अन्द हात्ती पोहचुसदुन, अल दानिएल बंद ईरोन. आव दुख भरा दण्ण दा दानिएल उक कारदुन, “हे दानिएल, जीत्ता परमेश्वर उन सेवक! येन नीन परमेश्वर याऊन नी हमेशा आराधना माळत्या, नीन इक हुल्ल इन बाय दा टु ऊळ्सदुन?”
दानिएल सम्राट से अंदुन, “महाराज, नी हमेशा जित्ता ईरूल! नान परमेश्वर तान ऊंद दूत कळुदुन, आव हुल्लगोळ बाय बंद माळ बुट्टुन; यतिकी ना परमेश्वर उन नजर दा निर्दोष ईरीन, इदुरसाटी हुल्लगोळ नान इक हानि पहुचुसीदिल. महाराज, ईदा प्रकार ना नीन मुंद भी निरअपराध आईन; यतिकी ना यातोदु गलती माळीदिल. ईद केळकु सम्राट दारा हापाळ प्रसन्न आदुन. आव दानिएल उक गुफा टु व्हार्या होळोद आदेश कोट्टुन. सम्राट उन क्याल्सा माळावाळेर दानिएल उक गुफा टु व्हार्या तेगदुर. दानिएल उन मय मा खरोंच भी हतीदिल; यतिकी आव तान परमेश्वर मा भरोसा माळतोगोन.” आग सम्राट दारा अन्द आदेश टु आ लॉकुर तंदकु आदुर जो दानिएल मा दोष हचीदुर. आंदुर तान हिंग्स अदिक बाल-बच्यागोळ सांगुळ हुल्ल इन पिंजरा दा भिटकु आदुर. आंदुर पिंजरा अन्द किनारा मा पहुचुसीदुर कि हुल्लगोळ म्याकुच हारकु आंदरी तान-तान बाय दा हुळ कोंडुर, अदिक आंदुर येलु सांगुळ आंदरी मेट्ट बुट्टुर. सम्राट दारा तान साम्राज्य इन अन्तर्गत पृथ्वी इन ईरावाळेर सप्पा द्याशगोळ, राष्ट्रगोळ अदिक भाषागोळ लॉकुर इक ईद चिट्टी लिख्सदुर: “नीम्द सुख-समृद्धि हागुल येढ्ढ गुणा अदिक ईळ्लक नाक गुणा वाळुसुल! ना ईद राज आग्या प्रसारित माळेतीन कि नान साम्राज्य इन पुरा लॉकुर दानिएल उन परमेश्वर उन मुंद नळ्गतेला अदिक अंजतेला ईत्तार, यतिकी केवल आवा जीत्ता परमेश्वर आन; आव युगानुयुग विद्यमान आन. आऊन राज्य यागलु नष्ट आगाल्द, आऊन शासन इन यागलु अंत आगतीदील. जो दानिएल उक हुल्लगोळ देल ऊळस्यान, आवा वाचुसावाळा अदिक ऊळसावाळा हुन; अदिक स्वर्ग दा अदिक पृथ्वी मा चिन्हगोळ्द अदिक चमत्कारगोळ इक प्रगट माळावाळा हुन.”
ई प्रकार दानिएल, सम्राट दारा अदिक फारसी सम्राट कुस्रू, येढ्ढु मुंदुर राज्यकाल दा सुख-चैन देल जीवन व्यतीत माळतेला ईत्तुन.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.