2 טימותי 2

1 וְאַתָּה בְּנִי חֲזַק בְּחֶסֶד יֵשׁוּעַ הַמָּשִׁיחַ׃ 2 אֶת־אֲשֶׁר שָׁמַעְתָּ מִפִּי בִּפְנֵי עֵדִים רַבִּים הַשְׁמַע בָּאָזְנֵי אֲנָשִׁים נֶאֱמָנִים אֲשֶׁר יִכֹּנוּ לְלַמֵּד אֶת־הַדְּבָרִים הָאֵלֶּה גַּם־לְזוּלָתָם׃ 3 וּתְנָה שִׁכְמְךָ לִסְבֹּל עִמִּי כְאִישׁ־חַיִל בִּצְבָא יֵשׁוּעַ הַמָּשִׁיחַ׃ 4 אִישׁ יֹצֵא לַצָּבָא לֹא־יִתְעָרֵב בְּעִנְיָנִים אֲחֵרִים וְיָפִיק רָצוֹן מִשַּׂר צְבָאוֹ׃ 5 וְאַף אִם־יִצְבֹּא צָבָא עוֹד לֹא יַשִּׂיג אֶת־הָעֲטָרָה עַד אֲשֶׁר יִצְבֹּא כַּמִּשְׁפָּט׃ 6 הָאִכָּר הָעֹבֵד אַדְמָתוֹ רִאשׁוֹן הוּא לֶאֱכֹל מִפְּרִי תְבוּאָתו׃ 7 בִּין בַּאֲשֶׁר־אֲנִי דֹבֵר וְהָאָדוֹן יִתֶּן־לְךָ חָכְמָה בַּכֹּל׃ 8 זְכֹר אֶת־יֵשׁוּעַ הַמָּשִׁיחַ אֲשֶׁר קָם מִן־הַמֵּתִים וַאֲשֶׁר יָצָא מִזֶּרַע דָּוִד כִּדְבַר בְּשׁרָתִי׃ 9 אֲשֶׁר בַּעֲבוּרָהּ צָרוֹת עָבְרוּ עָלַי עַד אֲשֶׁר עִנּוּ בַכֶּבֶל נַפְשִׁי כְּפֹעֵל אָוֶן אַךְ דְּבַר אֱלֹהִים לֹא יֵאָסֵר בַּכָּבֶל׃ 10 עַל־כֵּן אֶסְבֹּל כָּל־סֵבֶל לְמַעַן יַשִּׂיגוּ הַבְּחִירִים גַּם־הֵם תְּשׁוּעָתָם בְּיֵשׁוּעַ הַמָּשִׁיחַ וְתִפְאַרְתָּם תִּפְאֶרֶת עוֹלָמִים׃ 11 אֱמֶת הַדָּבָר הַזֶּה אִם־נָמוּת עִמּוֹ גַם־עִמּוֹ נִחְיֶה׃ 12 אִם־נִסְבֹּל עִמּוֹ גַּם־עִמּוֹ נִמְלֹךְ אִם נְכַחֶשׁ־בּוֹ גַּם־הוּא יְכַחֶשׁ־בָּנוּ׃ 13 אִם אֵין אֵמֻן בָּנוּ הוּא בֶאֱמוּנָתוֹ יַעֲמֹד כִּי לְכַחֵשׁ בְּנַפְשׁוֹ לֹא יוּכָל׃ 14 אֶת־הַדְּבָרִים הָאֵלֶּה תַּזְכִּיר לִפְנֵיהֶם וְהָעֵד בָּם לִפְנֵי הָאָדוֹן לְבִלְתִּי יָבֹאוּ בְדִבְרֵי רִיבוֹת לְהוֹכַח מִלִּים אֲשֶׁר לֹא יוֹעִילוּ לִמְאוּמָה כִּי אִם־לִמְסֹךְ רוּחַ עִוְעִים בְּלֵב שֹׁמְעֵיהֶם׃ 15 בַּקֵּשׁ לִהְיוֹת טָהוֹר כְּכֶסֶף צָרוּף לִפְנֵי אֱלֹהִים כְּפֹעֵל אֲשֶׁר לֹא־יֵבוֹשׁ מִפָּעֳלוֹ וְכַיּוֹדֵעַ לְחַלֵּק דְּבַר־אֱמֶת דָּבָר דָּבֻר עַל־אָפְנָיו׃ 16 אַךְ הַרְחֵק נַפְשְׁךָ מִשִּׂיחוֹת חוּלִין וּרְעוּת רוּחַ אֲשֶׁר יִמְשְׁכוּ אֶת־בַּעֲלֵיהֶם לְהוֹסִיף רֶשַׁע לְמַכְבִּיר׃ 17 וּדְבַר פִּיהֶם כְּרָקָב יֹאכַל אֲשֶׁר מֵהֶם הוּמְנִיּוֹס וּפִילִיטוֹס׃ 18 וְהֵם סָרוּ מִדֶּרֶךְ אֱמֶת לֵאמֹר כִּי־תְחִיַּת הַמֵּתִים כְּבָר הָיְתָה מֵאָז וַיִּהְיוּ לֶאֱמוּנַת רַבִּים לְמוֹקֵשׁ׃ 19 אַךְ יְסוֹד הָאֱלֹהִים יָקוּם לָנֶצַח וְזֶה הוּא חוֹתָמוֹ יוֹדֵעַ יְהוָֹה אֵת אֲשֶׁר־לוֹ וְגַם זֶה מִי אֲשֶׁר יִקְרָא בְשֵׁם הַמָּשִׁיחַ יֶחְדַּל מֵעֲשׂוֹת אָוֶן׃ 20 אוּלָם בְּבַיִת גָּדוֹל לֹא לְבַד כְּלֵי זָהָב וּכְלֵי כֶסֶף כִּי אִם־גַּם יִמָּצְאוּן שָׁם כְּלֵי עֵץ וּכְלֵי חָרֶשׁ אֲשֶׁר יֵשׁ מֵהֶם לְכָבוֹד וְיֵשׁ מֵהֶם לְקָלוֹן׃ 21 וְאִישׁ כִּי־יְטַהֵר נַפְשׁוֹ מֵהֶם וְהָיָה לִכְלִי כָבוֹד לִכְלִי קֹדֶשׁ וְלִכְלִי יְקָר בְּיַד בְּעָלָיו מוּכָן לְכָל־מַעֲשֶׂה טוֹב׃ 22 הַרְחֵק לִבְּךָ מִתַּאֲוֹת הַנְּעוּרִים אַךְ רְדֹף צֶדֶק אֱמוּנָה אַהֲבָה וְשָׁלוֹם עִם־כָּל־הַקֹּרִאים בְּשֵׁם הָאָדוֹן מִלֵּב טָהוֹר׃ 23 רַק מֵחִקְרֵי כֶסֶל וּרְעוּת רוּחַ חֲדַל לְךָ כִּי מִשָּׁרְשָׁם יִפְרֶה רִיב וּמָדוֹן׃ 24 וְלֹא לְעֶבֶד הָאָדוֹן לָרִיב כִּי אִם־לִהְיוֹת נוֹחַ לַכֹּל וּמֵבִין לְלַמֵּד׃ 25 וּבְעַנְוַת־חֵן יוֹרֶה אֶת־הַמַּמְרִים אוּלַי יִתֵּן אֱלֹהִים בִּלְבָבָם לָשׁוּב וּלְהַכִּיר אֶת־הָאֱמֶת׃ 26 וּלְהִמָּלֵט מֵרֶשֶׁת הַשָּׂטָן אֲשֶׁר פָּרַשׂ לְרַגְלָם וַאֲשֶׁר נִשְׁבּוּ כִּרְצוֹנוֹ׃