प्रेरितों के काम

प्रेरितां के काम का वर्णन

जानकारी

प्रेरितां के काम का वर्णन लूका के जरिये लिखे गये सुसमाचार के आग्गै का जिक्र सै। इसका खास मकसद यो बताणा सै, के यीशु के शरुआती चेल्यां नै पवित्र आत्मा के अगुवाई म्ह, यीशु के बारै म्ह सुसमाचार ताहीं यरुशलेम नगर अर सारे यहूदिया अर सामरिया परदेस म्ह, अर धरती के छोर ताहीं (1:8) किस तरियां फैलाया। यो मसीह आन्दोलन का ब्यौरा सै, जो यहूदी माणसां के बीच म्ह शरु होया, अर बढ़ के सारे दुनिया के माणसां का बिश्वास बणग्या। लेखक इस बात का ध्यान राक्खै सै, के उसकै पाठकां नै यो पक्का यकिन हो जावै के मसीह माणस रोमी साम्राज्य के खात्तर एक बिद्रोही राजनैतिक शक्ति न्ही थे, अर मसीह बिश्वास यहूदी धर्म की पूर्ति था। प्रेरितां के काम की किताब ताहीं तीन भागां म्ह बाट्या जा सकै सै, जो लगातार बढ़ते क्षेत्र नै दिखावै सै, जिस म्ह यीशु मसीह का सुसमाचार प्रचार करया ग्या अर कलीसियां बणाई गई (: 1) यीशु कै सुर्ग जाण के बाद यरुशलेम म्ह मसीह आन्दोलन की शरुआत; 2) पलस्तीन के दुसरे हिस्सां म्ह इसका बढ़णा, अर 3) भूमध्य सागर के देशां म्ह रोम ताहीं इसका विस्तार। प्रेरितां के काम की एक भोत बड़ी खासियत सै, पवित्र आत्मा का काम करणा। पवित्र आत्मा पिन्तेकुस्त के दिन यरुशलेम म्ह कठ्ठे होए बिश्वासियाँ पै बड़ी शक्ति कै गैल उतरै सै, अर इस किताब म्ह बित्ती घटनाओं के दौराण कलीसिया अर उसके अगुवां ताहीं राह दिखाणा अर उननै शक्ति देणा सै। प्रेरितां के काम म्ह दिए गये कई उपदेशां म्ह शरुआती मसीह सन्देस का सार पेश करया ग्या सै, अर इस म्ह लिखी घटनाऐं बिश्वासियाँ के जिन्दगी म्ह अर कलीसिया की संगति म्ह इस सन्देस की शक्ति नै दिखावै सै।

रूप-रेखा

गवाही खात्तर तैयारी 1:1-26

क-यीशु का आखरी हुकम अर करार 1:1-14

ख-यहूदा का उत्तराधिकारी 1: 15-26

यरुशलेम नगर म्ह गवाही 2:1-8:3

यहूदिया अर सामरिया परदेस म्ह गवाही 8:4-12:25

पौलुस की सेवकाई 13:1-28:31

क-पैहली प्रचार-यात्रा 13:1-14:28

ख-यरुशलेम म्ह सम्मेलन 15:1-35

ग-दुसरी प्रचार-यात्रा 15:36-18:22

घ-तीसरी प्रचार-यात्रा 18:23-21:16

च-यरुशलेम, कैसरिया नगर अर रोम देश म्ह बन्दी पौलुस 21:17-28:31