ದೆವಾಚಿ ಖರಿ ಕಬರ್
ರೋಮಾಪುರಾತ್‌ಲ್ಯಾನಾ 13
ಅದಿಕಾರ‍್ಯಾಂಚೆ ಗುಶ್ಟಿತ್ ಆಮ್ಚಿ ಕಾಮ
ತುಮಿ ಪರತೇಕ್ ಅಧಿಕಾರ‍್ಯಾನಿ ಸಾಂಗ್‍ಲ್ಯಾಲ ಐಕಾಯಾ ವ್ಹಯಿಸಾ ಕಾ ಮಂಜೆ ದೇವಾಚಿ ಪರವಾನ್ಗಿ ನಸ್ಥಾನಾ ಕಚಾ಼ ಹುಕುಮ್ ದಿಯಿತ್ ನಾಹಿ. ಸಗ್‍ಳ್ಯಾ ಅಧಿಕಾರ‍್ಯಾನಾ ದೇವಾನಿಸ್ ನಿವಡ್‌ಲ್ಯಾ ಮನ್ಹುನ್ ಆತಾ ಆಸ್‍ಲ್ಯಾಲ್ಯಾ ಅಧಿಕಾರ‍್ಯಾಲಾ ಆಡ್ವಾ ಜಾ಼ಲ್ಯಾಲಾ ಮಾನುಸ್ ಖರ‍್ಯಾನಿಸ್ ದೇವಾಚೆ ಆಜ್ಞೆಲಾ ಆಡ್ವಾ ಜಾ಼ಲ್ಯಾ. ವೈಲ್ಯಾ ಅಧಿಕಾರ‍್ಯಾಲಾ ಆಡ್ವಿ ಜಾ಼ಲ್ಯಾಲಿ ಲೋಕ ಆಪ್ಲಿವ ಆಪ್ನುಸ್ ತೀರ್ಪ್ ಆನೂನ್ ಗೆನ್ಹಾರ್. ಚಾ಼ಂಗ್ಲ ಕರ್ತ್ಯಾಲ್ಯಾ ಲೋಕಾನಾ ಅಧಿಕಾರಿಂಚ಼ ಭ್ಯಾ ರಾಹಿತ್ನಾಹಿ. ಫನ್ ಬುರ್ಸ ಕರ್ತ್ಯಾಲ್ಯಾ ಲೋಕಾನಾ ಅಧಿಕಾರ‍್ಯಾಂಚ಼ ಭ್ಯಾ ಆಸ್ಥ. ತುಮಿ ಅಧಿಕಾರಿನಾ ಭ್ಯಾ ನಸ್‌ಲ್ಯಾಲಿ ರಾಹ್ಯಾ ವ್ಹಯಿಸಾ ಮನ್ಹುನ್ ಮಂಥಾಸಾ ಕ್ಯಾ? ತಸ ಜಾ಼ಲ್ಯಾವ ತುಮಿ ಶಾರ್ಕತ್ಯಸ್ ಕರಾ ತವಾ ಅಧಿಕಾರಿ ತುಮಾನಾ ಬರ ಮನ್ಹಾರ್.
ಕಾ ಮಂಜೆ ಅಧಿಕಾರಿ ತುಮ್ಚಾ ಚಾಂಗಲ್ಯಾಸಾಟಿ ನಿವಡ್‍ಲ್ಯಾಲಾ ದೇವಾಚಾ಼ ಸೇವಕ್ ಜಾ಼ಲ್ಯಾ. ಫನ್ ತುಮಿ ಬುರ್ಸ ಕೇಲಸಾತ ಬಿಹ್ಯಾ ವ್ಹಯಿಸಾ. ತುಮಾನಾ ಶಿಕ್ಶಾ ದಿಯಾ ತ್ಯಲಾ ಹುಕುಮ್ ಹಾ. ತವಾ ತ್ಯೊ ಹುಕುಮ್ ಉಪೇಗ್ ಕರ್ನಾರ್ ಅಧಿಕಾರಿ ಬುರ್ಸ ಕರ್ತ್ಯಾಲ್ಯಾ ಲೋಕಾನಾ ಶಿಕ್ಶಾದಿಯಾ ನಿವಡ್‍ಲ್ಯಾಲಾ ದೇವಾಚಾ಼ ಸೇವಕ್ ಜಾ಼ಲ್ಯಾ. ಮನ್ಹುನ್ ತುಮಿ ಅಧಿಕಾರಿನಿ ಸಾಂಗ್‍ಲ್ಯಾಲ ಐಕಾಯಾ ವ್ಹಯಿಸಾ ತುಮಾನಾ ಶಿಕ್ಶೆ ವ್ಹತೆ ಮನ್ಹುನ್ ನವ್ಹ ತುಮ್ಚಾ ಮನಾಚೆ ವಳಕಿಲಾ ತ್ಯಂಚಾನಿ ಸಾಂಗ್‍ಲ್ಯಾಲ ಐಕಾಯಾ ವ್ಹಯಿ.
ಮನ್ಹುನ್ ತುಮಿ ತೆರಿಗೆ ಸಾಹಿತ್ ದೇತಾಸಾ. ಕಾ ಮಂಜೆ ತೇ ಅಧಿಕಾರಿ ದೇವಾಸಾಟಿ ಕಾಮ್ ಕರ್ತ್ಯಾಲ ಜಾ಼ಲ್ಯಾತ. ಆಸ ಆಸ್ಥಾನಾ, ತುಮಿ ಕುನಾಲಾ ವ್ಹಯಿ ತ್ಯಲಾ ದೇವಾ. ಜ಼ಖತ್ ಆನಿ ಆಮ್ಚಾ ಕಂದಾಯಾ ದಿಯಾ ವ್ಹಯಿ ತೀ ದೇವಾ. ಕುನಾಲಾ ಮರ‍್ಯಾದ್ ದಿಯಾ ವ್ಹಯಿ ತ್ಯನಾ ಮರ‍್ಯಾದ್ ದೇವಾ.
ಯಕಾಮಕಾ ಮದ್ದಿ ಆಮ್ಚಿ ಕಾಮ
ಯಕಾಮಕಾಚಿ ಮಾಯಾ ಕರಾಚ಼ ಉಪ್ಕಾರ್ ಸುಡುನ್ ದಿಸ್ರ ಕಚ಼ಸ್ ಉಪ್ಕಾರ್ ತುಮ್ಚಿವ ರಾಹು ನಾಹಿ. ಸಂಗ್‍ಳ್ಯಾಂಚಿ ಮಾಯಾ ಕರ್ತ್ಯಾಲಾ ಮಾನುಸ್ ಸಗ್‍ಳ್ಯಾ ಧರ್ಮಶಾಸ್ತಾರಾಚೆಗತ್ ಚಾ಼ಲ್ತೊ. ಕಾ ಮಂಜೆ, “ವ್ಯಬೀಚಾರ್ ಕರುನಾಹಿ; ಖುನ್ ಕರುನಾಹಿ ಚು಼ರಿಕರುನಾಹಿ; ದುಸ್‍ರ‍್ಯಾಂಚಾ ಸಾಮಾನಾವ್ನಿ ಆಶಾ ಕರುನಕೋಸಾ” ಮನ್ಹುನ್ ಧರ್ಮಶಾಸ್ತಾರ್ ಸಾಂಗ್ತ. ಹೇ ಆಜ್ಞೆ ದರ್ನಿ ಸಗ್‍ಳ್ಯಾ ಆಜ್ಞಾ, “ತು ತುಜಿ ಮಾಯಾ ಕರ್ತ್ಯಾಚೆಗತ್ ಸೇಜಾ಼ರ‍್ಯಾಂಚಿ ಮಾಯಾ ಕರ್” ಮಂಥ್ಯಾಲೆ ಯಕಸ್ ಆಜ್ಞೆತ್ ಹಾತ್ತಾ. ಮಾಯಾ ದುಸ್‍ರ‍್ಯಾನಾ ಬುರ್ಸ ಕರೀತ್ನಾಹಿ ಮನ್ಹುನ್ ಮಾಯಾ ಧರ್ಮಶಾಸ್ತಾರಾತ್ ಹಾ.
ಹ್ಯ ತುಮಿ ಕರಾಯಾ ವ್ಹಯಿಸಾ ಕಾ ಮಂಜೆ ತುಮಿ ತುಮ್ಚೆ ನಿಜ಼ತ್ನಿ ಉಠಾಚಾ಼ ಯೋಳ್ ಆಲ್ಯಾ ಮನ್ಹುನ್ ತುಮಾನಾ ಸಮಾಜ಼ಲ್ಯಾ. ಕಾ ಮಂಜೆ ಆಮಿ ಆಂದಿ ಇಸ್ವಾಸ್ ಥೆವ್‍ಲ್ಯಾಲ್ಯಾ ಯಳಾವ್ನಿ ರಕ್ಷನ್ ಆತಾ ಖುಬ್ ಜ಼ವಳ್ ಹಾ. ಲ ತೀ “ರ‍್ಯಾತ್” ಸರ್ಲೆ, ಲ ತ್ಯೊ “ದೀಸ್” ಆಲ್ಯಾ, ಮನ್ಹುನ್ ಆಂದಾರಾತ್ ಮಿಸಾಳ್ಯಾಲಿ ಕಾಮ ಹಿತ್ನಿ ಮೊರ‍್ಹ ಕರಾಚಿ ಸುಡುನ್ ಉಜಿಡಾಚಿ ಲಡಾಯಿ ಕರಾಯಾ ಆಮಿ ಹತ್ಯಾರಿ ಗಿಹುನ್ ತಯಾರ್ ವ್ಹವುಯಾ. ದಿಸಾಚಾ಼ ಜೀವ್ನಾ ಕರ್ತ್ಯಾಲ್ಯಾ ಲೊಕಾಂಚೆಗತ್ ಚಾ಼ಂಗ್ಲಾ ಜೀವ್ನಾ ಕರುಯಾ. ನಕೋತಸ್ಲ ಖಾನ ಪಿನ ಆಮಿ ಕರುನಾಹಿ, ಆಮಿ ವ್ಯಬಿಚಾರ್ ಕರುನಾಹಿ ಮನಾತ್ನಿ ಕಸ್ಲಸ್ ಪಾಪ್ ಕರುನಾಹಿ ಬಾಂಡ್ನ ಆನಿ ಕಳಿ ಕರುನಾಹಿತಾ, ತ್ಯವ್ಡಸ್ ನವ್ಹ ಖೊಟಫನ್ ಕರುನಾಹಿ. ಹ್ಯ ಸಗ್ಳ ಕರುನಾಹಿ. ಫನ್ ಪ್ರಭು ಜಾ಼ಲ್ಯಾಲ್ಯಾ ಯೇಸುಕ್ರಿಸ್ತಾಲಾ ಹತ್ಯಾರ‍್ಯಾಂಚೆಗತ್ ಗೆವಾ. ಆನಿ ತುಮ್ಚಾ ಪಾಪಾಚಾ಼ ಸ್ವಭಾವ್ ಆನಿ ಬುರ್ಶಾ ಆಶಾ ಕರಾಚಿ ಯವಜ್ನಾ ಥಾಂಬ್ವಾ.
ದೆವಾಚಿ ಖರಿ ಕಬರ್. Copyright © 2023 The Word for the World International and Gowly Marathi Translation Samti, Karnataka. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.