प्रेरितहोन 21

पौलुस यरुशलेम खे जानो

1जब हमने उनसे अलग हुइ खे समुद्री जत्रा सुरवात करी खे ते सीधी रस्ता से कोस मे आया, अरु दूसरा दिन रुदुस मे, अरु व्हा से पतरा मे. 2अरु एक डोंगा मे फीनीके को जातो हुयो मील्यो, अरु हमने ओ पर चडी खे ओखे खोल दियो. 3जब साइप्रस दिखाइ दियो, ते हमने ओखे डाखोर्यो हाथ छोड्यो, अरु सीरिया खे चलीखे सूर मे उतर्या. क्युकि वहा डोंगा को बोझ उतारनु थो. 4अरु चेलाहोन खे पयई खे हम वहा सात दिन तक र्‍हियो. उनने आत्मा खे सिखायो पौलुस से बोल्यो कि यरुशलेम मे पाय नी रखनु. 5जब वे दिन पूरा हुइ गया, ते हम वहा से चल दिया. अरु सब बयहोन अरु बच्चाहोन समेत हमखे नगर का बाहेर तक पोचाया अरु हमने किनारा पर घुटना टेकी खे प्रार्थना करी. 6तब एक दूसरा से बिदा हुइखे, हम तो डोंगा पर चड्या, अरु वे अपना-अपना घर लौटी गया.

7जब हम सूर से पाणी जत्रा पूरी करीखे पतुलिमयिस मे पहुच्या, अरु भैइ होन खे नमस्कार करीखे उनका साथ एक दिन र्‍हिया. 8दुसरा दिन हम वहा से चलीखे कैसरिया मे आया, अरु फिलिप्पुस सुसमाचार प्रचारक का घर मे जो सातजन मे से एक थो, जैइ खे ओका ह्या ठैइर्या. 9ओकी चार कुव्वारी बेटीहोन थी. जो भविष्यवाणी करती थी. 10जब हम वहा भोत दिन र्‍हि चुक्या, ते अगबुस नामको एक भविष्यव्दक्ता यहूदीया से आयो. 11ओने हमारा पास अयखे पौलुस को कमरबन्द लियो, अरु अपना हाथ पाय बांधीखे बोल्यो, “पवित्र आत्मा यो बोलस हइ, कि जो इन्सान को यो कमरबन्द हइ, ओखे यरुशलेम मे यहूदी या रीति से बाध्ये, अरु गैरयहूदीहोन का हाथ मे सोपि दिये.”

12जब हमने या बातहोन सुनी, ते हम अरु वहा का दुन्याहोन ने ओका से प्रार्थना करी कि यरुशलेम खे नी जानु. 13पन पौलुस ने जवाब दियो, “तुम का करस हइ, कि रोइ-रोइखे मरो मन तोडस हइ? मी तो प्रभु यीशु का नाम का लिये यरुशलेम मे नी फक्त बाध्यो जान ही का लिये क्युकी मरन का लिये भी तैयार हइ.”

14जब ओने नी मान्यो ते हम यो बोलीखे चुप हुइ गया, “प्रभु की इच्छा पूरी हुये.”

15उ दिनहोन का बाद हमने तैयारी करी अरु यरुशलेम खे चली दिया. 16कैसरिया का भी कुछ चेला हमारा साथ अयगा, अरु मनासोन नामको साइप्रस का एक पुरानो चेला का साथ ली आया, कि हम ओका ह्या टिक्ये.

पौलुस याकूब खे मीलस

17जब हम यरुशलेम मे पहुच्या, ते भैइ बडि खुशी का साथ हम से मील्यो. 18दूसरा दिन पौलुस हमखे लीखे याकूब का नजीक गयो, झा सब बापदादा एक जगा था. 19तब ओने उन्हसे नमस्कार करीखे जो-जो काम परमेश्वर ने ओकी सेवा का द्वारा गैरयहूदीहोन मे कर्या थो, एक-एक करीखे सब बतायो.

20उनने यो सुनीखे परमेश्वर की महिमा करी, फिर ओकासे बोल्यो, “हे पौलुस भैइ, तू देखस हइ, कि यहूदीहोन मे से कइ हजार ने विश्वास कर्यो हइ. अरु सब व्यवस्था का प्रती उत्साही हइ. 21अरु उनखे तरा बारे मे सिखायो गयो कि तु गैरयहूदीहोन मे र्‍हेनाला यहूदीहोन खे मूसा से फिर जिवन खे सिखास हइ अरु बोलस हइ, कि नी अपना बच्चाहोन को खतनो करणु अरु नी रीतिहोन पर चलनु. 22ते फिर का कर्यो जाह्ये दुन्या जरुर सुन्ये कि तु ह्या आयो हइ. 23येकालिये जो तरा से बोलस हइ, उ कर हमारा ह्या चार इन्सान हइ, जेने मन्नत मानी हइ. 24उनखे लिखे ओका साथ अपना आप खे अच्छो कर. अरु उनका लिये खर्चा दे, कि वे बाल मुन्डाये तब सब जानी लिये कि जो बातहोन उनने तरा बारे मे सिखी गइ, उनकी कुछ जड नी हइ पन तू खुद भी व्यवस्था खे मानीखे ओका अनुसार चलस हय. 1 25पन उन गैरयहूदीहोन का बरे मे जोन्हे विश्वास कर्यो हइ हमने यो सल्लो करीखे लिखी भेज्यो हइ कि वे मुर्तिहोन का सामने बलि कर्यो हुयो मास से अरु खुन से अरु गलो घोट्यो हुयो को मास से अरु पाप से, बच्या र्‍हेनु.”

26तब पौलुस उन इन्सानहोन खे लिखे अरु दुसरा दिन उनका साथ अच्छो हुइखे मन्दिर मे गयो, अरु वहा बतैइ दियो कि अच्छो होन का दिन अगर उनमे से हर एक का लिये चडाओ चडाय जाना तक को दिन कब पुरा हुये.

मन्दिर मे पौलुस की गिरफ्तारी

27जब वे सात दिन पूरा होना पर था, ते आसिया का यहूदीहोन ने पौलुस खे मन्दिर मे देखी खे देख सब दुन्याहोन खे भडकायो, अरु यो चिल्लय खे ओखे पकडि लियो. 28“हे इस्राएलिहोन, मद्दत कर. यो उ इन्सान हइ, जो दुन्या खे , अरु व्यवस्था खे , अरु यो स्थान खे विरोध मे हर जगह सब दुन्या को सिखास है, ह्या तक कि यूनानीहोन को भी मन्दिर मे लयखे ओने यो पवित्र जगत खे अपवित्र कर्यो हइ.” 29उनने ते येकासे पइले इफिसुस वासी त्रुफिमुस खे ओका साथ नगर मे देख्यो थो, अरु समझतो थो कि पौलुस ओखे मन्दिर मे लि आयो हइ.

30तब पुरा नगर मे हल्लो मची गयो अरु दुन्या दौडि खे जमा हुया, अरु पौलुस खे पकडिखे मन्दिर का बाहेर घीसी लायो, अरु जल्दी दरवाजा बन्द करी गयो. 31जब वे ओखे मारी डालनो चाहाता था, ते सैन्य-दल का सरदार खे सन्देशो पहुचा कि पुरा यरुशलेम मे हल्लो मची र्‍हो हइ. 32तब उ जल्दी सैनीकहोन अरु सुबेदार होन खे लिखे उनका पास नीच्चे दौडि आयो. अरु उनने सैन्य-दल का सरदार खे अरु सैनीकहोन खे देखीखे पौलुस खे मारनो-पीटनो रोखी दियो. 33तब सैन्य-दल का सरदार ने पास अयखे ओखे पकडि लियो. अरु दो साकलहोन से बाधन की आज्ञा दिखे पूछन लग्यो, “यो कोन हइ, अरु एने का कर्यो हइ?” 34पन गर्दी मे से कोय कुछ अरु कोय कुछ चिल्लाता र्‍हिया अरु जब हल्ला का मारे ठीक सच्ची नी जानी सक्यो, ते किला मे लि जान की आज्ञा दी. 35जब उ सीडि पर पहुच्यो, ते असो हुयो कि गर्दी का दबाव का मारे सिपाइहोन खे ओखे उठैइ खे लि जानो पड्यो. 36क्युकि दुन्या कि गर्दी यो चिल्लाता हुये ओका पीछे पड्या, “ओको अन्त करी दे.”

पौलुस अपनो बचाव करस हइ

37जब वे पौलुस खे किला मे लि जाना पर था, ते ओने सैनीकहोन का सरदार से बोल्यो,

“का मेखे आज्ञा हइ कि मी तरा से कुछ बोल्यु?” ओने बोल्यो, “का तू यूनानी जानस हइ?” 38का तू उ मीस्रिहोन नी, जो ये दिनहोन से पइले विद्रोइ बनीखे चार हजार हथियारबंद कि बडैइ करी र्‍हो थो.

39पौलुस ने बोल्यो, “मी तो तरसुस को यहूदी इन्सान हइ! किलिकिया को प्रसिद्ध नगर को नीवासी हइ, अरु मी तरासे से प्रार्थना करुस हइ, कि मेखे दुन्या से बातहोन करण दे.”

40जब ओने आज्ञा दि, ते पौलुस ने सीडि पर खडो हुइखे दुन्या का हाथ से इशारो कर्यो जब वे चुप हुइ गया, ते उ इब्रानी भाषा मे बोलन लग्यो.