ትቶ 3

ጎእያ ኦሶታ

1አሳይ ደርያ ሃረይሳታስ፥ አዋተይ ደኤይሳታስ ሃረታናዉ፥ ኪተታናዉነ ሎኦ ኦሶ ኡባ ኦናዉ ጊገትዳይሳታ ግዳና መላ አኬክሳ። 2ቃስ ኤንቲ ኦደ ቦላካ ኢታ ኦደቶና መላ፥ ሳሮ አስ ግዳና መላ፥ አሽከታነ አሳ ኡባስ ቃተይሳታ ግዳና መላ ዞራ። 3ኑኒ ካሰ ኤያታ፥ ኪተቶናይሳታ፥ ባለትዳይሳታ፥ ዱማ ዱማ አሾ ኡፋይሳስነ አሞስ አይለትዳይሳታ። ኑኒ ኢታተንነ ቃናተን ኩምዳይሳታ፤ ኑ አሰ እፀይሳታ፥ አስካ ኑና እፀይሳታ። 4ሽን አሽያ ፆሳ ኬሀተይነ ሲቆይ ቆንጭዳ ዎደ፥ 5ኑ ኦዳ ፅሎ ኦሱዋ ግሾ ግዶናሽን፥ ባ ማሮተ ግሾ ኑና አሽስ። ኑና እ አሽዳይ፥ ናምአን የለተ ሜቻንነ ጌሻ አያና ባጋራ እምዳ ኦራ ደኡዋና። 6ሄ አያና፥ ፆሳይ ኑና አሽያ የሱስ ክርስቶሳ ባጋራ ኑ ቦላ ዳርስድ ጉስስ። 7ባ አ ኬሀተ ባጋራ ኑና ፅልስድ መርና ደኡዋ ላታ ኡፋይሳ ኦይካና መላ ሄሳ ኦስ። 8ሀ ቃላይ አማነትዳ ቃላ። ፆሳ አማነይሳት ሎኦ ኦሶ ኦናዉ ጊግዳይሳታ ግዳና መላ ነ ሀ ቃላ ምንዳ ኦዳና መላ ታ ኮያይስ። ሀይሳቲ አሰ ኡባስ ሎኦነ ጎኤይሳታ። 9ሽን ኤያተ ፓላማፐ፥ ኮቻ ታይቦፐ፥ ካቻፈነ ህገ ጋሶን ደንድያ ኦሻፈ ናገታ። ሄስ ጎእነ ዎይ ባይናባ። 10ሻሄተ መያ ኡራ ኮይሮ ዞራ፤ ናምአን ሀንቀታ፥ ሄሳፈ ጉየ፥ እያፐ ሃካ። 11ሄሳ መላ አስ ጌላነ ናጋራንቾ፤ እ ባ ቦላ ፕርደይሳ ኤራ።

ዉርሰ ዞረ

12ታኒ ባልጎ ያን ሻጫናዉ ቆፕዳ ግሾ፥ አርፀማሳ ዎይኮ ትክቆሳ ኔኮ ኪትያ ዎደ ነ ታኮ ንቆጵልዮና ያናዉ ምና።1 13ህገ ኤርያ ዜማስነ አጵሎስ ኦገ ብያ ዎደ ኤንታዉ ኮሽያባይ ፓጮና መላ ኤንታ ማዳ። 14ኑ አሳይካ ፓና አስ ግድድ አቶና መላ ባንታዉ ኮሽያባ ደማና መላ ሎኦ ኦሶ ኦናዉ ምንድ ታማሮ።

15ታራ ደእያ ኡባይ ነና ሳሮ ጎሶና፤ አማኖን ኑና ሲቅያ አሳ ሳሮ ጋ።

ፆሳ አ ኬሀተይ ህንተ ኡባራ ግዶ። አምንእ።