ሮመ 12

ደኦ ያርሾ

1ህዛ፥ ታ እሻቶ፥ ህንተ፥ ህንተ አሳተ ፆሳ ኡፋይስያ፥ ደኦነ ጌሻ ያርሾ ኦድ፥ እማና መላ ታኒ ህንተና ፆሳ ማሮተን ዎሳይስ። ፆሳ ህንተ ጎይናናዉ በሲያ ቱማ ኦገይ ሄሳ። 2ሎኦ፥ ኡፋይሰይሳነ ፖሎ ግድዳ ፆሳ ሸንያ ህንተ ሻክ ኤራናዉ ህንተ ቆፋን ላመትተፐ አትሽን፥ ሀ አላምያ ዳኖፕተ።

3ፆሳይ ህንተ እሱዋስ እሱዋስ እምዳ አማኑዋ መላ ዎዛናማ አሳዳ ቆፕተ። ቆፓናዉ በሰይሳፈ አድ ህንተና ዱማይድ፥ ኦቶሮን ቆፖፍተ ጋዳ ታዉ እመትዳ አ ኬሀተን ህንተዉ ኦዳይስ። 4ኑ እስ አሳተ ግዶን ዱማ ዱማ ክፍለት ደኦሶና፤ ሄ ዱማ ዱማ ክፍለታስ ዱማ ዱማ ኦሶይ ደኤስ።1 5ሄሳዳ፥ ኑኒ ዳሮ አስ ግድኮካ፥ ክርስቶሳን እስ አሳተ ግድዳ። ኑኒ እስ አሳተ ግድድ ዱማ ዱማ ክፍለት እሶይ እሱዋራ ኦይከትዳ። 6ኑስ እመትዳ አ ኬሀተን ዱማ ዱማ እሞታት ደኦሶና። ኑ እሞይ ትንብት ኦዶ ግድኮ፥ ኑስ ደእያ አማኑዋ መላ ኦዳናዉ በሴስ።2 7ኑ እሞይ ሀራታ ማደ ግድኮ፥ ሄ ኦሱዋን ምናናዉ በሴስ፤ ታማርሶ ግድኮ፥ ሄ ታማርሱዋን ምናናዉ በሴስ። 8ኑ እሞይ ሀራታ ምን ግድኮ፥ ምንድ ምንናዉ በሴስ። ኑ እሞይ ኑስ ደእያባፐ ሀራታስ እሞ ግድኮ፥ ዎዛናፐ እማናዉ በሴስ። ኑ እሞይ አይሶ ግድኮ፥ ምንድ አይሳናዉ በሴስ። ኑ እሞይ ሀራታስ ኬሆ ግድኮ፥ ኡፋይሳን ኬሀናዉ በሴስ።

9ህንተ ሲቆይ ቆፐ ቆሞን ግዳናዉ በሰና። ኢታባ እፅተ፤ ሎኦባ ምንድ ኦይክተ። 10እሶይ እሱዋራ እሻዳ ሲቀትተ፤ እሶይ እሱዋ ቦንችተ። 11አዛሎፍተ፤ ህንተ አያናን ምንድ፥ ጎዳስ ኦተ። 12ፆሳይ እምዳ ኡፋይሳን ኡፋይትተ፤ መቱዋ ዳንዳእተ፤ ኡባ ዎደ ፆሳ ዎስተ። 13አማንያ ጌሻታ ኮሽያባን ማድተ፤ እማታ ሞክተ።

14ህንተና ጎደይሳታ አንጅተ፤ አንጅተፐ አትሽን፥ ባዶፍተ።3 15ኡፋይተይሳታራ ኡፋይትተ፤ ዬከይሳታራ ዬክተ። 16እሶይ እሱዋራ እስ ቆፋን ደእተ። ኦቶሮ ቆፋ አግድ፥ ህንተና ካዉሽድ፥ ካዉሻ ኦሶ ኦተ። ህንተ ህንተና ጭንጫ ግድ ቆፖፍተ።4

17ኦንካ ህንተዉ ኢታባ ኦኮ፥ ሄ ኡራስ ኢታ ዛሮፕተ። አሳ ኡባ ስንን ናሽስያ ሎኦ ኦሶ ኦተ። 18አሳ ኡባራ ሳሮን ዳናዉ ህንተዉ ዳንዳኤትያ ኡባ ኦተ። 19ታ እሻቶ፥ ህንተ፥ ህንተ ሁጰን አሳስ ሀሎ ከዮፕተ። ፆሳይ ሀሎ ከሳና መላ እያዉ አጋግተ። ጌሻ ማፃፋን፥

“ታኒ ሀሎ ከሳና፤

ታኒ ኩሸ ዛራና”5

ያጌስ ጎዳይ፥ ጌተትድ ፃፈትስ።

20ሽን ጌሻ ማፃፋን፥

“ነ ሞርከይ ኮሻትኮ ሙዛ፤

እ ሳሞትኮ ኡሻ።

ኔኒ ሄሳ ኦኮ እያ ሁጰን

ዬላ ታማ ቦንቆ ቆላሳ”6

ጌተትድ ፃፈትስ።

21ኢታ ሎኦን ፆናፐ አትሽን፥ ኢታን ፆነቶፋ።