ማዝሙረ 39

ግታ ፆሲ-ላፋ አስ

ዳዊቲ ዛማረታ ሀላቃ፥ ኤዶታመስ ፃፍዳ ማዝሙረ

1ታኒ፥ “ታ እንፃርሳን ናጋራ ኦና መላ፥

ታ ኦግያ ናጋና።

ኢታ አሳት ታ ደእያ ዎደ፥

ታ ዶና ባራና” ያጋስ።

2ሽን ዶና ሙመዳ ስእ ጋስ፤

ሀር አቶሽን ሎኦባ ኦደተይሳ አጋስ፤

ሽን ታ ዋየይ ሃ ዳርስ።

3ታ ዎዛናይ ታ ጋን ቴልስ፤

ታ ቆፋይ ታማዳ ኤፅስ፤

ያትን ታ እንፃርሳን ሃሳያ ዶማስ።

4ጎዳዉ፥ ታ ደኡዋ ዉርሰነ

ታ ዳናዉ አትዳ ጋላሳ ታና በሳ፤

ታ ደኦይ አይ መላ ቃንኮ ታና ኤርሳ።

5ኔኒ ታ ላይ ታካዳ ዎዳሳ፤

ታ ላይይ ነ ስንን ባይናባ መላ፤

ቱማ አስ ኡባይ እስ ሸምፖ መላ። ሳላሀ

6ቱማ አስ አያ ኤሾ መላ፤

እ ጮ ዳቡሬስ፤ ሻሎ ሺሼስ፤

ሽን ኦን ጎኤታነኮ ኤረና።

7ጎዳዉ፥ ሀእ ታ ናገይ ኦኔ?

ታኒ ነናን ኡፋይስ ኦይስ።

8ታ ባላ ኡባፈ ታና አሻ፤

ኤያታን ታና ቶሽሶፓ።

9ሄሳ ኡባ ኦዳይ ነና ግድያ ግሾ

ታኒ ሙማስ፤ ዶናካ ፖጋብከ።

10ነ ፃምአ ታ ቦላፈ ደን፤

ምኖ ነ ኩሽያ ጋሶን ታ ዳቡራስ።

11አሰ እያ ናጋራ ግሾ ሴራሳ፤

እያ አልኦ ደኡዋ ብላዳ ዉርሳሳ፤

ቱማ አስ ኡባይ እስ ሸምፖ መላ። ሳላሀ

12ጎዳዉ፥ ታ ዎሳ ስአ፤

ታና ማዳናዉ ታ ዋሱዋ ሀይዛ።

ታ አፉ በአዳ ስእ ጎፓ፤

ታኒ ታ አዋታዳ በተ አስነ እማ

ግዳዳ ኔራ ደአይስ።

13ታ ሻከታናፐነ ባናፐ ስን

ታኒ ኡፋይታና መላ ታና አጋ።