ሌምሶ 2

ጭንጫተ ጎአ

1ታ ናአዉ፥ ታ ትምርትያ ነ ኤክኮ፤

ታ ኪታ ነ ዎዛናን ዎኮ፤ 2ነ ሀይ ጭንጫተኮ ዛርኮ፤

ነ ዎዛና አኬካኮ ዛርኮ፤

3ኤራተ ፄግኮ፤

አኬካ ቁ ኦዳ ፄግኮ፤

4ብራ ዎይኮ ጌምዳ ሚሸ ኮየይሳዳ፥

ኔኒ ኤራተ ኮይኮ፥

5ሄ ዎደ ኔኒ ጎዳስ ያሽ ጉስ አይበኮ ኤራና፤

ፆሳ ሎይዳ ኤራና።

6ጎዳይ ጭንጫተ እሜስ፤

እያፐ ኤራተነ አኬክ በንቴስ።

7እ ሱረታስ ማድያ ዞረ ምንጄስ፤

ቦረይ ባይናይሳታስ ጎንዳለ ግዴስ።

8ሱረ ፕርዳ ኦግያ ናጌስ፤

እያዉ አማነተይሳታ ኦግያ ምንስ።

9ሄ ዎደ ኔኒ ፅሎተ፥ ሱረ ፕርዳ፥

ሱረ ኦገነ ሎኦ ኦሶይ አይበኮ አኬካና።

10ጭንጫተ ነ ዎዛና ግዶ ገላና፤

ኤራተ ነዉ ኡፋይስ ግዳና።

11ሻክድ ኤሮይ ነና ናጋና፤

አኬክ ነና ካማና።

12ጭንጫተ ነና ኢታ አሳታ ኦግያፐ ናጋና፤

ጌላ ኦዳፐ ነና አሻና።

13ኤንቲ ናጋራ ማን ዳናዉ፥

ፅሎተ ኦግያ አግዶሶና።

14ኢታ ኦሶን ኡፋይቶሶና፤

ጌላተን ሀሹ ጎሶና።

15ኤንታ ኦሶይ ምርቀ፤

ኤንታ ደኦይ ጌላ።

16ጭንጫተ ላይማ ማጫሳፐ፥

ቃላን ጭምያ ላገፈ ነና አሻና።

17እያ ባ ናአተ አዝና አጋጋሱ፤

ፆሳ ስንን ጫቅዳ ጫቁዋ ዶጋሱ።

18እ ሶ ኦገይ ሀይቆኮ ጋስ፤

ኢኮ ቡስ ሞይትለታኮ ጋስ።

19ኢኮ ብያ ኦንካ ጉየ ስመና፤

ደኦ ኦገ ደመና።

20ሄሳ አጋዳ፥ ሎኦ አሳታ ሌምሱዋ ካላ፤

ፅሎ አሳታ ሄመ ናጋ።

21ሱረ አሳትነ ቦረይ ባይናይሳት፥

ቢታን አዱሳ ላይ ዳና።

22ሽን ኢታት ቢታፈ ሾደታና፤

አማነቶናይሳት ያና።