ሌምሶ 17

1ኦሽ ደእያ በሳን ደእያ ግታ ግብራፐ

ሳሮይነ ዎፕ ደእያ በሳን ኡይ ፖቆይ ሎኦ።

2ጭንጫ አይለይ ፓና ባ ጎዳ ናኣ ሃሬስ፤

እያ እሻታራ እስፈ ላታ ሻከቴስ።

3ዎርቅነ ብር ታማን ፓጨተይሳዳ፤

ጎዳይ አሳ ዎዛና ፓጬስ።

4ኢታ አስ ኢታ ሃሳያ ስኤስ፤

ዎርዳንቾይ ዎርዶ ሃሳያ ሀይዜስ።

5ማንቆታ ቦላ ቀልቅስያ አስ ኤንታ መዳ ፆሳ ጫዬስ፤

ሀራ አስ ጋክያ መቶን ኡፋይትያ አስ ሴረቶና አተና።

6ናአ ናእ ጭማ አሳስ ካላቻ፤

አዋት ባንታ ናይታስ ቦንቾ።

7ሎኦ ኦድ ኤያ አሳስ ጊገና፤

ሄሳዳካ ዎርዶ ኦድ አይሰይሳስ ጊገና።

8ዎፈ እመይሳስ ዎፈይ ብታ መላ፤

እ ብያ በሳ ኡባይ እያዉ እንጀቴስ።

9ቆሆ ገንያ ኡራይ ሲቆ ኮዬስ፤

ሽን ኦዳ ዛሪድ ዛሪድ ዎጭያ ኡራይ፥

አማነትያ ላገታ ሻኬስ።

10ኤያይ ፄቱ ቶሆ ልሶን ሾጭን ኤረይሳፈ፤

አኬክ ደእያ አሳስ ጮ ሀንቆይ ኤራ እሜስ።

11ኢታ አስ ኡባ ዎደ ጌላ፤

ቃይ ባይና አስ እያ ቦላ ኪተታና።

12ኤያራ እያ ኤያተን ጋሄታናፐ

ማራት ኤከትዳ ማሄራ ጋሄተ ሎኦ።

13ሎኦ ኦዳይሳስ ኢታ ኩሸ ዛርያ

ኡራ ሶፐ ኢታባይ ክቸና።

14ኦሽ ዶምሸ ሃ ዋ መንይሳ መላ፤

ሄሳ ግሾ ኦሽ ዶማናፐ ኮይሮታዳ ፓላማ አጋ።

15ናጋራንቹዋ ፅልሶይነ

ፅሉዋ ቦላ ፕርዶይ፥

ናምአይካ ጎዳይ እፅያ ኦሶ።

16ጭንጫተ ደማናዉ አሞይ ባይና ደእሽን፥

ኤያ ኩሸን ደእያ ሚሸይ አይ እያ ማዲ?

17ላገይ ኡባ ዎደካ ላገ፤

እሽ መቶ ዎደ ማዳናዉ የለቴስ።

18አኬክ ባይና አስ ኤሮና ኡራ

አጩዋ ቃንፃናዉ ዋሰ ግዴስ።

19ኦሹ ዶስያ አስ ናጋራ ዶሴስ፤

ኡባ ዎደ ጬቀትያ አስ ባ ቦላ ዮ ፄጌስ።

20ዎበ ቆፍ ደእያ አስ ሎኦባ ደመና፤

ባ እንፃርሳን ጭምያ አስ መቶን ገሌስ።

21ኤያ ናአ የልዳ አው አዛኔስ፤

ኤያ ናአ አዋስ ኡፋይስ ዴና።

22ኡፋይትያ ዎዛን አሳስ ሎኦ ለ፤

ሽን መቅዳ ዎዛን አሳስ ዎልቃ ይሴስ።

23ኢታ አስ ፕርዳ ጌላያናዉ

ጌማን ዎፈ ኤኬስ።

24አኬካ አስ ጭንጫተ ባ ስንፈ ሃሰና፤

ሽን ኤያ አሳ አይፈይ ሳአ ጋፃ ዩዬስ።

25ኤያ ናእ ባ አዋ አዛንስ፤

ባ አይዉካ ጫምሴስ።

26ፅሎ አስ ሴሮይ በሰና፤

ሱረ አስ ሾጮይ ሎኦ ግደና።

27ጉ ቃላ ሃሳያ አስ ኤራንቾ፤

ዎፓ አያን ደእያ አስ አኬካንቾ።

28ኤያ አስ ስእ ጊኮ ጭንጫ ዳኔስ፤

ባ ዶና ዶዮና እፅኮ ኤራንቾ ዳኔስ።