ሌምሶ 12

1ሴራ ዶስያ ኡራይ ኤራተ ዶሴስ፤ ሽን ሴራ እፅያ ኡራይ ኤያ።

2ሎኦ አስ ጎዳፐ ሳባ ደሜስ፤ ሽን ጎዳይ ገናንቾታ ፕርዴስ።

3አስ ኢታተን ምንድ ኤቀና፤

ሽን ፅሎታ ፃጶይ ቃፀና።

4ዎዛናማ ማችያ ባ አዝናስ ካላቻ መላ፤

ሽን ባ አዝና ካዉሽያ ማችያ መቀ ምያ አጃጀ መላ።

5ፅሉዋ ቆፋይ ሱረ፤ ሽን ኢታታ ዞረይ ጭሞ።

6ኢታታ ዞረታይ አሳ ቆሀናሳ፤ ሽን ፅሎታ ዞረታይ ኤንታ አሻናሳ።

7ኢታ አሳት ኩንዳና፤ ኤንታዉ ዘረካ አተና፤ ሽን ፅሎታ ኮቻይ ምንድ ደአና።

8አስ ባ ጭንጫተ መላ ጋላተቴስ፤ ሽን ጌላ ቆፋይ ደእያ አስ ካቴስ።

9ዱረ አስ ዳንድ፥ መቶን ደእያ አሳፐ ጮ አሳ ዳንድ፥ ኦድ ባ ደኦ ሱግያ አስ ኬሀ።

10ፅሎ አስ ባ መሄስ ቃቴስ፥ ሽን ዎዛና ምኖ አሳስ ቃይ ባዋ።

11ባ ቢታ ምን ኦያ ኡራይ ካ ካሌስ፤ ሽን ፓናባ የደያ ኡራይ አኬክ ፓጭዳይሳ።

12ኢታት ናጋራንቾ አሳታ ድአናዉ አሞቶሶና፤ ሽን ፅሎታ ፃጶይ ዳይድ ደአና።

13ኢታ አሳ እያ ዶናፐ ከይዳ ኦድ ፅሄ ግድድ ኦይኬስ፤ ሽን ፅሎይ መቶፐ ከስ ኤኬስ።

14አስ ባ ዶናፐ ከይያ ቃላን ሎኦባ ካሌስ፤ ባ ኦዳ ኦሶ ጋትያ ኤኬስ።

15ኤያ አስ ብያ ቡሳይ አዉ እያ ሁጰን ልከ ዳኔስ፤ ሽን ጭንጫ አስ ዞረ ስኤስ።

16ኤያ ኡራ ሀንቆይ ኤለስድ ኤረቴስ፤ ሽን ጭንጫ አስ ጫሸ ዉዳ ጌና።

17ቱማ ሃሳይያ አስ ሱረባ ኦዴስ፤ ሽን ዎርዶ ማርካይ ዎርዶ ኦዴስ።

18አኬኮና ኦደትያ ኦድ ማሻዳ ጫዴስ፤

ሽን ጭንጫ እንፃርሳይ ፓስ።

19ዎርዶ ኦድ ጉ ዎደሳ፤ ሽን ቱማ ኦድ መርናዉ ደአና።

20ኢታ ቆፕያ አሳ ዎዛናን ጭሞይ ደኤስ፤

ሽን ሳሮባ ዞረተይሳታ ዎዛናን ኡፋይሳይ ኩሜስ።

21ፅሎታ መቶይ ጋከና፤ ሽን ኢታታስ መቶይ ዳራና።

22ጎዳይ ዎርዳንቾታ እፄስ፤ ሽን ቱማንቾ አሳታን እ ኡፋይቴስ።

23ጭንጫ አስ ባ ኤራ ቆቴስ፤ ሽን ኤያት ባንታ ኤያተ ኦዶሶና።

24ምንድ ኦያ ኡራይ ደረ ሃሬስ፤ ሽን አዛላ አስ ሃረቴስ።

25ኡንአን ኩምዳ ዎዛን አዛኖ ኤሄስ፤ ሽን ኬሀ ኦድ እያ ኡፋይሴስ።

26ፅሎ አስ ባ ሾሩዋ ዞርድ፥ ሱረ ኦገ ካለስ፤ ሽን ኢታት ኦገ ቱማፐ ሃሴስ።

27አዛላ አስ ሻንካትድ ኤህዳ አሾ ካና፤

ሽን ምንድ ኦያ ኡራይ ባ ሚሽያስ ምሸቴስ።

28ፅሎተ ኦገን ደኦይ ደኤስ፤ ሄ ኦገን ሀይቆይ ባዋ።