ጌሻ ማፃፋ
ታይቦ 2
እስራኤለ ኮቻታ ማራ
ጎዳይ ሙሰነ አሮና ሀይሳዳ ያግስ፤ እስራኤለ አሳይ ባንታ ኮቻን ኮቻን ማላነ ባንታ ኮቻ ኮቻ ኤርስያ ባንድራ ካልድ፥ ጌሻ ዱንካንያፐ ጉ ሃክድ እያ ዩሹዋን ዱንካኖና።
ዶሎሀ ባጋራ ይሁዳ ኮቻይ ባንታ ማላ ካልድ ዱንካኖና። ይሁዳ ኮቻ ካለይ አምናዳበ ናኣ ናአሶና። እያ ጩጋ ታይቦይ 74,600.
ይሁዳ ጋክድ ዱንካናናይ ይሳኮረ ኮቻ። ይሳኮራ ኮቻ ካለይ ዙአራ ናኣ ናትናኤላ። እያ ጩጋ ታይቦይ 54,400.
እያፐ ካልድ ዛብሎና ኮቻይ ዱንካኔስ። ዛብሎና ኮቻ ካለይ ሄሎና ናኣ ኤልኣባ። እያ ጩጋ ታይቦይ 57,400
ይሁዳ ባጋን ዱንካንዳ ኦላንቾታ ታይቦይ 186,400. እስራኤለ አሳይ ጉታ የድድ ብያ ዎደ ኮይሮት ከየይ ኤንታ።
ዱገሀ ባጋራ ሮቤላ ኮቻይ ባንታ ማላ ካልድ ዱንካኖና። ኤንታ ካለይ ሳድዮራ ናኣ ኤልሱራ። እያ ጩጋ ታይቦይ 46,500. ሮቤላ ጋክድ ዱንካነይ ስሞና ኮቻ። ስሞና ኮቻ ካለይ ዙርሻዳያ ናአ ሳሉምኤላ። እያ ጩጋ ታይቦይ 59,300.
እያፐ ካልድ ጋደ ኮቻይ ዱንካኔስ። ኤንታ ካለይ ደኡኤላ ናኣ ኤልያሳፋ። ኤንታ ጩጋ ታይቦይ 45,650.
ሮቤላ፥ ባጋን ዱንካንዳ ኦላንቾታ ታይቦይ 151,450. እስራኤለ አሳይ ጉታ የድድ ብያ ዎደ ናምአን ከየይ ኤንታ።
ሄሳፈ ጉየ ኮይሮ ከይያ ይሁዳ ጩጋፐነ ናምአን ከይያ ሮቤላ ጩጋፐ ግዶን ጌሻ ዱንካንያ ቶክድ ሌወት ገሎሶና። እስ እስ ኮቻይ ባንታ ዱንካንዳ ማራን ባንታ ማላ ኦይክድ ከዮ።
ዉሎሀ ባጋራ ኤፍሬማ ባጋይ ባንታ ማላ ካልድ ዱንካኖና። ኤንታና ካለይ አምሁዳ ናኣ ኤልሻማአ። ኤንታ ጩጋ ታይቦይ 40,500. ኤንታ ጋክድ ምናሰ ኮቻይ ዱንካኔስ። ኤንታና ካለይ ፓዳዙራ ናኣ ጋማልኤላ። ኤንታ ኦላንቾታ ታይቦይ 32,200. እያፐ ካልድ ዱንካነይ ብንያመ ኮቻ። ብንያመ ኮቻ ካለይ ግድኦና ናኣ አብዳና። ኤንታ ጩጋ ታይቦይ 35,400. ኤፍሬማ ባጋን ዱንካንዳ ኦላንቾታ ታይቦይ 108,100. እስራኤለ አሳይ ጉታ የድድ ብያ ዎደ ሄን ከየይ ኤንታ።
ፑደሀ ባጋራ ዳነ ኮቻይ ባንታ ማላ ካልድ ዱንካኖና። ኤንታና ካለይ አምሳዳያ ናኣ አክኤዘራ። ኤንታ ጩጋ ታይቦይ 62,700. ኤንታና ጋክድ አሴራ ኮቻይ ዱንካኔስ። አሴራ ኮቻ ካለይ ኦክራና ናኣ ፓግኤላ። ኤንታ ጩጋ ታይቦይ 41,500. እያፐ ካልድ ንፍታለመ ኮቻይ ዱንካኔስ። ንፍታለመ ኮቻ ካለይ ኤናና ናኣ አክራ። ኤንታ ጩጋ ታይቦይ 53,400
ዳነ ባጋን ዱንካንዳ ኦላንቾታ ታይቦይ 157,600. እስራኤለ አሳይ ጉታ የድድ ብያ ዎደ ዉርሰን ከየይ ኤንታ።
ባንታ ኮቻን ኮቻን ሻከትድ ታይበትዳ እስራኤለ ኦላንቾታ ታይቦይ 603,550. ሽን ጎዳይ ሙሰ ኪትዳይሳዳ፥ ሌወት ሀራ እስራኤለ አሳራ ታይበትቦኮና። እስራኤለ አሳይ፥ ጎዳይ ሙሰ ኪትዳባ ኡባ ኦዶሶና። ኤንቲ ባንታ ማላ ካልድ ዱንካንዶሶና፤ ቃስ ባንታ ኮቻነ ባንታ ሶ አሳ አሳ ካልድ ከዮሶና።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.