ጌሻ ማፃፋ
ሉቃሳ 13
ናጋራፐ ስሞ
ሄ ዎደ የሱሳኮ አሳይ ይድ ጵላፆስ ዎድ ኤንታ ሱራ ኤንታ ያርሹዋ ዋላክዳ ጋልላ አሳባ ኦድዳ አሳት ሄ በሳን ደኦሶና። እ ሀይሳዳ ያግድ ዛርስ፤ “ያትን ሄ ጋልላ አሳት ሄ ኢታ ሀይቆ ሀይቅዳ ግሾ፥ ጋልላን ደእያ አሳ ኡባፈ አዳ ናጋራንቾ ዳኖና? ግደና! ግዶሽን፥ ህንተካ ማሮታን ስሞና እፅኮ፥ ኡባይ ሄሳዳ ያና። ዎይኮ ቃስ ሳልሆመ ጌተትያ በሳን ግምበይ ዎድድ ዎዳ ታማነ ሆስፑን አሳይ የሩሳላመን ደእያ አሳ ኡባፈ አዳ ናጋራንቾ ዳኖና? ግደና! ሽን ህንተካ ማሮታን ስሞና እፅኮ ኡባይ ሄሳዳ ያና።”
ቃስካ የሱሲ ሀይሳዳ ግድ ሌምሶ ኦድስ፦ “እስ ኡራስ ዎይነ ጋደን ቶከትዳ ባላሰ ም ደአዉሱ። እ ኢፐ አይፈ ደማናዉ ኮይድ አይኮካ ደምቤና። ዎይነ ጋድያ ጎዳይ ዎይነ ኦሳንቹዋኮ፥ ‘አይፈ ደማናዉ ኮያዳ ሄ ላይ ስመረታዳ አይኮካ ደማብከ። ሄሳ ግሾ፥ ቃንፃ ድጋ፤ አይስ ቢታ መልሳይ?’ ያግስ።
“ሽን ኦሳንቾይ፥ ‘ጎዳዉ፥ እ ዩሹዋ ኦዳ ኦሻ የጋና ጋካናዉ ሀ ላይስ አጋርክ። ሀ ላይ አይፍኮ ሎኦ፥ እፅኮ ቃንፃ አጋ’ ” ያግድ ዛርስ።
ዞኮ ኩና ማጫስዉ
የሱሲ ሳምባታ ጋላስ አይሁደ ዎሳ ኬን ታማርሴስ። ሄ በሳን ታማነ ሆስፑን ላይ ቱና አያን ዞኮ ኩንስዳ እስ ማጫስያ ደአዉሱ። እያ ኩናፐ ደንዶይሳን ሱረ ኤቃናዉ ዳንዳኡኩ። የሱሲ እዮ በእዳ ዎደ ፄግድ፥ “ሀ ማጫሰተ፥ ነ ሀርግያፈ ፓፃዳሳ” ያግስ። ባ ኩሽያ እ ቦላ ዎን፥ እያ ኤለሳዳ፥ ሱራዳ ኤቃሱ። ፆሰ ጋላታሱ።
ሽን አይሁደ ዎሳ ኬ ሀላቃይ ይሎትድ አሳኮ፥ “ኦሶ ኦያ ኡሱፑን ጋላሳት ደኦሶና። ሄሳ ግሾ፥ ሄ ጋላሳታን ይድ ፓፅተፐ አትሽን፥ ሳምባታ ጋላስ ግደና” ያግስ።1
ጎዳይ፥ “ጩቦቶ፥ ህንተ ግዶፈ ቦር ዎይኮ ሀረ ሳምባታ ጋላስ ዛዳሎፐ ብልድ ሃ ኡሻናዉ ኤፎናይ ኦኔ? ያትን፥ ሀ ማጫስያ አብራሃመ ናአ ግዳሸ ፃላሄን ቃሸታዳ ታማነ ሆስፑን ላይ ኩመ ደእዳርስ ሳምባታ ጋላስ ብርሸተ ኮሸኔ?” ያግድ ኦይችስ።
እ ሄሳ ኦድዳ ዎደ ኤቀተይሳት ኡባይ ዬላትዶሶና። ሽን አሳ ኡባይ እ ኦዳ ማላልስያ ኦሶ ኡባን ኡፋይትዶሶና።
ሄሳፈ ጉየ፥ የሱሲ ሀይሳዳ ያግስ፥ “ፆሳ ካዎተ አይ ዳኒ? እያ አይብራ ዳንሶ? ፆሳ ካዎተ እስ አስ ባ ጎሻን ቶክዳ ዎላ አይፈ መላ። እ ድጭድ ም ግድስ። ሳሎ ካፎት እያ ታሽያ ቦላ ሸምፕዶሶና።”
ቃስ፥ “ፆሳ ካዎተ አይብራ ዳንሶ? እስ ማጫስያ ዳሮ ለራ ዋላካዳ ሙኑቅዳ ጉ እርሾ ዳኔስ” ያግስ።
ፁን ዉላ
ሄሳፈ ጉየ፥ የሱሲ የሩሳላመ ብሸ እ ካንያ ኦግያን ደእያ ካታማታንነ ጉታታን ታማርስሸ አስ። እስ አስ የሱሳኮ፥ “ጎዳዉ፥ አታናይ ጉ አሳ ፃላሌ?” ያግድ ኦይችስ።
የሱሲ ኤንታኮ፥ “ስእተ፥ ፁን ዉላራ ገላናዉ ባፀትተ። ዳሮት ገላናዉ ኮዮሶና ሽን ኤንታዉ ሀነና። ኬ አዋይ ደንድድ ዉላ ጎርድዳፐ ጉየ፥ ‘ኑስ ዶያርክ’ ያግሸ ካረን ኤቅድ ፄስ ኦይከታ። ሽን እ፥ ‘ህንተ ኦነኮነ አዉፐ ይዳኮ ታ ኤርከ’ ግድ ዛራና። ሄ ዎደ ህንተ፥ ‘ኔራ ዎላ ምዳ፥ ኡይዳ፥ ኑ ዳባባንካ ታማርሳዳሳ’ ያጋና።
“እ ዛሪድ፥ ‘ህንተ ኦነኮነ አዉፐ ይዳኮ ኤርከ። ህንተኖ፥ ጌላቶ ታፐ ሃክተ’ ያጋና።2 አብራሃመ፥ ይሳቃ፥ ያይቆባነ ናበታ ኡባ ፆሳ ካዎተን በአና፥ ሽን ህንተ ካረን ዎድ አትያ ዎደ ህንተዉ ዬሆነ አቸ ጋርጨ ግዳና። አሳይ ዶሎሀፐ፥ ዉሎሀፐ፥ ፑደሀፐነ ዱገሀፐ ይድ ፆሳ ካዎተን ግብራ ቦላ ኡታና።3 ሄሳ ግሾ፥ ሀእ ደን ጉየ ግድዳይሳታፐ ስን ግዳናይሳት፥ ስን ግድዳይሳታፐ ጉየ ግዳናይሳት ደኦሶና” ያግስ።4
የሱሲ የሩሳላመስ ዬክስ
(ማቶ 23:37-39)
ሄ ዎደ ፋርሳወታፐ እሶት እሶት ይድ፥ “ሄሮዲስ ነና ዎናዉ ኮይያ ግሾ ሀ በሳፈ ደንዳዳ ባ” ግዶሶና።
እ ዛሪድ፥ “ብድ፥ ሄ ዎርካናስ፥ ‘ሄኮ፥ ሀችነ ዎንቶ ቱና አያናታ ከሳና፥ ሀርጋንቾታ ፓና፥ ሄን ጋላሳን ኩሻ ቦላ ጋካና’ ያግስ ጊተ። ሀኖፐ አትሽን፥ ናበይ የሩሳላመፐ ካረን ሀይቃናዉ በሰና። ሄሳ ግሾ፥ ሀች፥ ዎንቶነ ዎንት ፔእን ሄ በሳ ባናዉ ደንዳስ።
“የሩሳላመ፥ የሩሳላመ፥ ናበታ ዎያረ፥ ኔኮ ኪተትዳይሳታ ሹቻን ጫድያረ፥ ኩቶይ ባ ናይታ ባ ቀፍያፐ ጋርሳን ሺሽያዳ ነ ናይታ ታ ቀስያፐ ጋርሳን አፑን ቶሆ ሺሻናዉ ኮያድና፥ ሽን ህንተ እፃስ ግደታ። ታ ህንተዉ ኦዳይስ፤ ህንተ ኬይ ካይሳታና። ጎዳ ሱንን የይስ አንጀትዳይሳ ህንተ ጋና ጋካናዉ ታና ደመከታ” ያግስ።5
Source notes (5)
- Cross-reference ከሳ 20:9-10፤ ዛረ 5:13-14.
- Cross-reference ማዝ 6:8.
- Cross-reference ማቶ 8:11-12፤ 22:13፤ 25:30.
- Cross-reference ማቶ 19:30፤ 20:16፤ ማር 10:31.
- Cross-reference ማዝ 118:26፤ ኤርም 22:5.
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.