ሌወታ 17

ሱ ሞና መላ ድገትስ

1ጎዳይ ሙሰኮ ሀይሳዳ ያግስ፤ 2“አሮናስ እያ አደ ናይታስነ እስራኤለ አሳ ኡባስ ሀይሳዳ ያጋዳ ኦዳ፤ ጎዳይ ኪትዳይስ ሀይሳ፤ 3እስራኤለ አሳፐ ኦንካ ቦር ዎይኮ ማራዘ ዎይኮ ኮለ ጉታን ዎይኮ ጉታፐ ጋፃን ሹክድ፥ 4ጎዳስ እሞታ ኦድ እማናዉ ጌሻ ዱንካንያ ፐንገ ጎዳ ስን ኤሆና እፅኮ፥ እ ሄ ሱን ኦይሸቴስ። ሄ ኡራይ ሱ ጉስዳ ግሾ ባ አሳ ግዶፈ ኩረቶ። 5ሄሳ ግሾ፥ እስራኤለ አሳይ ያርሾ መሄ ጮ ደንባን ሹከይሳ አግድ፥ ጎዳ ስንን ጌሻ ዱንካንያ ፐንገን ደእያ ካህንያኮ ኤሆ። ካህነይ ሄሳ ኤክድ፥ ጎዳስ እስፈተ ያርሾ ኦድ ሹኮ። 6ካህነይ ጌሻ ዱንካንያ ፐንገን ደእያ ያርሾ በሳ ቦላ ሄ ሱ ዉርፆ። ሞዋ ጎዳስ ሳዎ ቶንኩ ግያ ያርሾ ኦድ ፁጎ። 7እስራኤለ አሳይ ጎዳ አግድ ካልዳ ቱና አያናታስ ዛሪድ ባንታ ያርሹዋ ያርሾፎ። ሄስ ኤንታዉነ ያና የለተ ኡባስ መርና ዎጋ ግዶ።

8“ኤንታኮ ሀይሳዳ ያጋ፤ እስራኤለ አሳፐ ግድን ዎይኮ ኤንታ ግዶን ደእያ አላጋ ቢታ አሳፐ ግድን፥ ኦንካ ፁሳ ያርሾ ዎይኮ ሀራ ያርሾ ሺሽያ ዎደ፥ 9ጎዳስ ያርሻናዉ ጌሻ ዱንካንያ ፐንገ ኤሆና እፅኮ፥ ሄ ኡራይ ባ አሳ ግዶፈ ኩረቶ።

10“እስራኤለ አሳፐ ዎይኮ ኤንታ ግዶን ደእያ አላጋ ቢታ አሳፐ ኦንካ ሱ ሚኮ፥ ሄ ሱ ምያ ኡራ ቦላ ታ ዞኮ ዛራና፤ ታኒ ሄ ኡራ አሳ ግዶፈ ኩራና። 11አይስ ጊኮ አሾ ማእዳ ኡባ ደኦይ እያ ሱ ግዶን ደኤስ፤ ሱ ደኦይ እያ ግዶን ደእያ ግሾ ናጋራ አቶ ጊሴስ። ህንተ ናጋራ አቶተስ ሱ ያርሻና መላ ህንተዉ እማስ። 12ታኒ እስራኤለ አሳኮ፥ ህንተፈ ዎይኮ ህንተ ግዶን ደእያ አላጋ ቢታ አሳፐ ኦንካ ሱ ሞፖ ያግዳይ ሄሳ ግሾሳ።

13“እስራኤለ አሳፐ ዎይኮ ኤንታ ግዶን ደእያ አላጋ ቢታ አሳፐ ኦንካ ሜተትያ ዶአ ዎይኮ ካፎ ሻንካትድ ዎኮ፥ እያ ሱ ሳአን ጉስድ ቢታ ካሞ። 14አይስ ጊኮ አሾ ማእዳ ኡባ ደኦይ እያ ሱ ግዶና። አሾ ማእዳ መተታ ኡባ ደኦይ እያ ሱ ግዶን ደእያ ግሾ፥ ሱ ሞፕተ፤ ቃስ ምያ ኦንካ ባ አሳ ግዶፈ ኩረቶ ያጋዳ እስራኤለ አሳስ ኦዳስ።

15“እስራኤለ አሳ ግድን ዎይኮ ኤንታ ግዶን ደእያ አላጋ ቢታ አሳ ግድን፥ ኦንካ ባዉታ ዎይኮ ዶእ ዎዳባ ሚኮ፥ ባ ማኡዋ ሜጮ፤ ባ አሳተ ሜጨቶ፤ ያትድ ኦማርስ ጋካናዉ ቱና ግዴስ። ሄሳፈ ጉየ፥ እ ጌሽ ግዳና። 16ባ ማኡዋ ሜጮና እፅኮ፥ ባ አሳተ ሜጨቶና አግኮ፥ እ ባ ናጋራ ባዉ ቶኬስ።”