እያሱ 2

ራቦነ ዎችያ አሳታ

1ናወ ናአይ እያሱይ፥ ቢታ ዎች በእያ ናምኡ አሳታ ሴፅማ1 ጌተትያ በሳፈ ቆሳን ኪትሸ፥ “ብድ ቢታ ዎችተ፤ ቃስ እያርኮ ካታማ ዱማይድ ዎችተ” ያግድ ኪትስ።

ኤንቲ ብድ፥ ራቦ ጌተትያ ላይማተን አቅያ አሰ ሶ አቃናዉ ገልዶሶና። 2እያርኮ ካዎይ፥ “እስራኤለ አሳፐ ኪተትዳይሳት ሀ ቢታ ዎቻናዉ ሀች ቃማ ይዶሶና” ግያ ኦዳ ስእስ።

3ያትን፥ እያርኮ ካዎይ ራብኮ፥ “ነ ሶ ገልዳ አሳት ቢታ ዎቻናዉ ይዳ አስ ግድያ ግሾ፥ ኤንታና ከሳዳ እማ” ያግድ ኪትስ።

4ሽን ማጫስያ ሄ ናምኡ አሳታ ቆታዳ፥ “ኤ አሳት ታኮ ይዶሶና፥ ሽን ኤንቲ አዉፐ ይዳኮ ታ ኤርከ። 5ኦማርስ ካታማ ፐንግያ ጎርዳና ሀንያ ዎደ፥ ኤንቲ ከይድ ብዶሶና። ኤንቲ አዉ ብዳኮ ታ ኤርከ። ኤለስድ ኤንታ ህንተ ካልኮ፥ ኦይካና” ያጋዳ ኤንታዉ ኦዳሱ። 6ሽን እያ አሳታ ዳሳ ቦላ ከሳዳ ታልባ ጮይና ግዶን ቆሳሱ። 7ያትን፥ ካዎይ ኪትዳ አሳት ዎቸይሳታ ኮይሸ፥ ዮርዳኖሰ ሻፋ ፕንያ ኦግያ ጋካናዉ ብዶሶና። ኤንቲ ካታማፐ ቡሮ ከይዳ መላ ካታማ ፐንገይ ጎርደትስ።

8ዎቸይሳት ስካናፐ ካሰታዳ፥ እያ ኤንታኮ ከያዳ፥ 9ሀይሳዳ ያጋሱ፤ “ጎዳይ ሀ ቢታ ህንተዉ እምዳይሳ ታ ኤራይስ። ጋሶይካ፥ ህንተፈ ደንድዳይሳን ግታ ያሻን አሳ ኡባይ ትልእስ። 10ግብፀ ቢታፈ ህንተ ከይዳ ዎደ፥ ጎዳይ ህንተ ስንን ዞኦ አባ ዋት መልስዳኮ ኑ ስእዳ። ቃስ ዮርዳኖሰ ሻፋፐ ዶሎሀ ባጋራ ደእያ አሞረ ካዎታ ናምአታ፥ ስሆናነ ኦገ ህንተ ዋትድ ዎዳኮነ ኤንታ ካታማ ዋትድ ይስዳኮ ኑ ስእዳ። 11ኑኒ ሄሳ ስእዳ ዎደ፥ ኑ ዎዛናይ ያሻን ትልእስ። ህዛ፥ ህንተ ጎዳይ፥ ፆሳይ ሳሉዋካ ሳኣካ ሃረይስ እያ ግደይሳ ኑ ኤርዳ። 12ሄሳ ግሾ፥ ታ ህንተዉ ኬህዳይሳዳ ህንተ ታ አዋ ሶ አሳስ ኬሀናዳ ጎዳ ሱንን ጫቅተ። ሄሳስ አማንያ ማላ ታዉ እምተ። 13ታ አዋነ ታ አይዉ፥ ታ እሻታነ ታ ምቸታ ኤታ ሶ አሳ ኡባ ዎኮ ግድ ጫቅተ” ያጋሱ።

14ሄ አሳት ዛሪድ፥ “ኑ ነዉ ጫቅዳ ጫቁዋ ፖሎና እፅኮ፥ ፆሳይ ኑና ዎ። ኑ ኦያባ ነ አሳስ ቆንጭሶና እፅኮ፥ ጎዳይ ሀ ቢታ ኑስ እምያ ዎደ፥ ኑኒ ነዉ አማነታናነ ኬሀና” ያግዶሶና።

15ራኣብ ኬይ ካታማ ግምበ ድርሳራ ኦይከትድ ኬፀትዳ ግሾ፥ ማስኮትያራ ዎዶሮ ዱገ የዳዳ፥ ኤንታና ዱገ ዎሳሱ። 16ራኣባ ኤንታኮ፥ “ህንተና ኮየይሳት ደሞና መላ ደርያኮ፥ ብድ ኤንቲ ስማና ጋካናዉ ያን ሄ ጋላስ ቆሰትተ። ያን ስሚድ፥ ህንተ ብያ በሳ ባናዉ ዳንዳኤታ” ያጋሱ።

17-18አሳት ዛሪድ፥ “ኑኒ ሀ ቢታ ኦይካናዉ ገልያ ዎደ፥ ሀ ዞኦ ዎዶሩዋ ነ ኑና ዎስዳ ማስኮትያን ቃቾና እፅኮነ ነ አዋ፥ ነ አይዉ፥ ነ እሻታነ ነ ሶ አሳ ኡባ ነ ሶ ሺሾና እፅኮ፥ ነ ኑና ጫቅስዳ ጫቆይ ኑስ ጎመ ግደና። 19ኦንካ ነ ሶፐ ካረ ከይድ ሀይቅኮ፥ ሄስ እያ ጎመ። ኑኒ ሄሳስ ኦይሸቶኮ። ኔራ ሶን ደእሸ ኦንካ ቆሄትኮ፥ እያ ሱ ጎመይ ኑና ጋኮ። 20ሽን ኑ ኦያባ ኔን አሳስ ቆንጭስኮ ኔን ኑና ጫቅስዳ ጫቆይ ኑስ ጎመ ግደና” ያግዶሶና።

21እያ ዛራዳ፥ “ህንተ ቃላዳ ሀኖ” ጋዳ ኤንታ ሞይዛሱ። ኤንቲ ብዳፐ ጉየ፥ ሄ ዞኦ ዎዶሩዋ ማስኮትያን ቃቻሱ።

22ኤንቲ ደርያኮ ብድ፥ ኤንታ ኮየይሳት እያርኮ ስማና ጋካናዉ ያን ሄ ጋላስ ቆሰትዶሶና። ኤንታ ኮየይሳት ኦገ ኡባን ኮይዶሶና፥ ሽን ደምቦኮና። 23ሄሳፈ ጉየ ሄ ናምኡ አሳት ደርያፐ ዎዶሶና። ዮርዳኖሰ ፕንድ፥ ናወ ናኣ እያሱኮ ይድ፥ ባንታና ጋክዳባ ኡባ ኦድዶሶና። 24ኤንቲ እያሱኮ፥ “ጎዳይ ቱማ ሄ ቢትዉ ኑስ አድ እምስ። ቃስ ሄ ቢታን ደእያ አሳ ኡባይ፥ ኑስ ያይድ ትልእዶሶና” ያግዶሶና።