ጌሻ ማፃፋ
ዮሃንሳ 10
የሱሲ ሎኦ ሄንንቾ
የሱሲ፥ “ታኒ ህንተዉ ቱማ ኦዳይስ፤ ዶርሳ ግርበ ግዶ ፐንገራ ግዶና ሀራሶራ ገልያ ኦንካ ካይሶነ ፓንጋ። ሽን ፐንገራ ገለይስ ዶርሳታ ሄመይሳ። ፐንግያ ናገይስ እያዉ ፐንግያ ዶዬስ፤ ዶርሳትካ እያ ቃላ ስኦሶና። እ ባ ዶርሳታ ኤንታ ሱንን ሱንን ፄጌስ፤ ኤንታ ካለድ ካረ ከሴስ። እ ባ ዶርሳታ ካረ ከስዳፐ ጉየ ኤንታ ስንን ሄመቴስ። ኤንቲ እያ ቃላ ኤርያ ግሾ እያ ካሎሶና። ሀራ ኡራ ቃላ ኤንቲ ኤሮና ግሾ እያፐ ባቃቶሶናፐ አትሽን፥ እያ ጌዶ ካሎኮና” ያግስ።
የሱሲ ኤንታዉ ሀ ሌምሱዋ ኦድስ፥ ሽን እ አይ ግዳኮ ኤንቲ አኬክቦኮና።
ዛሪድ የሱሲ ኤንታኮ፥ “ታኒ ህንተዉ ቱማ ኦዳይስ፤ ታኒ ዶርሳታስ ፐንገ። ታፐ ስን ይዳ ኡባይ ካይሶነ ፓንጋ፥ ሽን ዶርሳት ኤንታ ስእቦኮና። ፐንገይ ታና፤ ታ ባጋራ ገልያ ኦንካ አታና። እ ታ ባጋራ ገላናነ ከያና፤ ሎኦ ሄመትያ በሲ ደማና። ካይሶይ ካይሶታናዉ፥ ሹካናዉነ ይሳናዉ ዬስፐ አትሽን፥ ሀራባስ ዬና። ታኒ ኤንታዉ ደኦይ ዳና መላነ ኩምድ ፓላሀና መላ ያስ።
“ታኒ ሎኦ ሄንንቾ፤ ሎኦ ሄንንቾይ ባ ዶርሳታ ግሾ ባ ሸምፑዋ አድ እሜስ። ኡነ ሄምያ አስ ዶርሳታ ጎዳነ ሄንንቾ ግዶና ግሾ ሱመይ ያ ዎደ በእድ ዶርሳታ አግድ ቤስ። ሄሳ ግሾ፥ ሱመይ ዶርሳታ ኦይክድ ላሌስ። ኡነ ሄመይስ ሚሸስ ሄምያ ግሾነ ዶርሳታባይ እያ ቆፍሶና ግሾ ዶርሳታ አግድ ባቃቴስ።
“ታኒ ሎኦ ሄንንቾ። ታ አዋይ ታና ኤረይሳዳ ታንካ ታ አዋ ኤራይስ። ሄሳዳካ፥ ታኒ ታ ዶርሳታ ኤራይስ፤ ታ ዶርሳትካ ታና ኤሮሶና። ታኒ ታ ዶርሳታ ግሾ ታ ሸምፑዋ አ እማይስ።1 ሀ ዉድያን ባይና ሀራ ዶርሳት ታዉ ደኦሶና። ታኒ ኤንታካ ኤሀናዉ በሴስ። ኤንቲ ታ ቃላ ስአና፤ ኤንቲ እስ ዉደ ግዳና፤ ሄንንቾይካ እሱዋ።
“ታኒ ታ ሸምፑዋ አ እማዳ ዛራ ኤክያ ግሾ ታ አዋይ ታና ዶሴስ። ታ ዶሳዳ ታ ሸምፑዋ አ እማይስፐ አትሽን፥ ታፐ ኦንካ ኤከና። ታኒ ታ ሸምፑዋ አ እማናዉነ ዛራ ኤካናዉ ማት ታዉ ደኤስ። ታኒ ኦና መላ ታ አዋይ ታና ኪትዳይስ ሀይሳ” ያግስ።
ሄሳ እ ግዳ ግሾ፥ አይሁደታ ግዶን ቃስካ ሻከተ መትስ። ኤንታፈ ዳርያ ባጋይ፥ “እያን ቱና አያናይ ደኤስ! እ ጎዬስ! እ ግያባ አይስ ስኤቲ?” ያግዶሶና።
ሀራት ቃስ፥ “ፃላሄይ ኦይክዳ አስ ሀይሳዳ ኦደተና። ቱና አያን ቆቀ አይፈ ፄልሳናዉ ዳንዳእዬ?” ያግዶሶና።
የሱሲ አሳ ናአ
የሩሳላመን ፆሳ ኬ አንጅስዳ ጋላሳታ ቦንችያ ባለይ ጋክስ፤ ሄ ዎደ ሳእ ባልጎ። የሱሲ ፆሳ ኬን ሶሎሞነ ባራንዳን ስመረቴስ። አይሁደት የሱሳ ዩሾን ሺቅ ኤቅድ፥ “ኔኒ ኑና አዉደ ጋካናዉ ስራ ዎኔ? ኔኒ ክርስቶሳ ግድኮ አነ ኑስ ጌሻዳ ኦዳ” ያግዶሶና።
የሱሲ ዛሪድ ኤንታኮ፥ “ታኒ ህንተዉ ኦዳስ፤ ሽን ታና አማነከታ። ታኒ ታ አዋይ ታዉ እምዳ ማታን ኦያ ኦሶይ ታባ ማርካቴስ። ሽን ታኒ ህንተዉ ኦድዳይሳዳ ህንተ ታ ዶርሰ ግዶና ግሾ አማነከታ። ታ ዶርሳት ታ ቃላ ስኦሶና። ታኒ ኤንታ ኤራይስ፤ ኤንትካ ታና ካሎሶና። ታኒ ኤንታዉ መርና ደኡዋ እማይስ፤ ኤንቲ ኡባራካ ዮኮና። ኦንካ ታ ኩሸፐ ኤንታ ቦንቅ ኤካናዉ ዳንዳኤና። ኤንታ ታዉ እምዳ ታ አዋይ ኡባፈ አስ2 ኦንካ ታ አዋ ኩሸፐ ኤንታ ቦንቅ ኤካናዉ ዳንዳኤና። ታነ ታ አዋይ እስኖ” ያግስ።
አይሁደት የሱሳ ጫዳናዉ ቃስካ ሹች ደንዶሶና። የሱሲ ኤንታኮ፥ “ታኒ ኦና መላ ታ አዋይ ታዉ እምዳ ዳሮ ሎኦ ኦሶታ ህንተና ኦ በሳስ። ሄሳታፐ አዉሳ ግሾ ታና ሹቻን ጫዳናዉ ኮዬቲ?” ያግስ።
አይሁደት ዛሪድ፥ “ኑኒ ነና ነ ሎኦ ኦሶ ግሾ ሹቻን ጫዳናዉ ኮዮኮ። ሽን ኔኒ ፆሳ ጫይያ ግሾነ አሰ ግዳሸ ኔኒ፥ ነና ፆሰ ግያ ግሾሳ” ያግዶሶና።3
የሱሲ ዛሪድ፥ “ጌሻ ማፃፋን ፆሳይ፥ ‘ህንተ ፆሳታ’ ግዳይስ ፃፈትቤኔ?4 ጌሻ ማፃፋይ መርናዉ ላመተና። ፆሳይ ባ ቃላ እምዳ አሳታ፥ ‘ፆሳታ’ ግድ ፄግኮ፥ አዋይ ዶርድ ሀ አላምያ ኪትዳ ታና ፆሳ ናአ ዋትድ ‘ፆሳ ጫያሳ’ ያገቲ? ታኒ ታ አዋይ ኦይሳ ኦና እፅኮ ታና አማኖፕተ። ሽን ታኒ ኦያባ ግድኮ ህንተ ታና አማኖና እፅኮካ፥ ታ አዋይ ታናን ደኤይሳነ ታካ ታ አዋን ደኤይሳ ህንተ ኤራና መላ ታ ኦሱዋ አማንተ” ያግስ።
ቃስካ ኤንቲ እያ ኦይካናዉ ኮይዶሶና፥ ሽን እ ኤንታፈ ከስ ኤክስ።
ዮሃንስ ካሰ ፃማቅያ በሳ፥ ዮርዳኖሰ ሻፋፐ ሄፍን የሱሲ ፕንድ ያን ደእስ።5 ዳሮ አሳይ የሱሳኮ ይድ፥ “ዮሃንስ ማላታ ኦቤና፥ ሽን እ ሀ አድያባ ኦድዳባይ ኡባይ ቱማ” ያግዶሶና። ያን ዳሮ አሳይ የሱሳ አማንዶሶና።
Source notes (5)
- Cross-reference ማቶ 11:27፤ ሉቃ 10:22.
- Footnote ታ አዋይ ኡባፈ አስ፦ እስ እስ በን ማፃፋት፥ “ታ አዋይ ታዉ እምዳ ኤንቲ ኡባፈ አሶና” ያጎሶና።
- Cross-reference ሌወ 24:16.
- Cross-reference ማዝ 82:6.
- Cross-reference ዮሀ 1:28.
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.