እዮባ 13

1ሀ ኡባ ታ አይፈይ በእስ፤

ታ ሀይይ ስእድ አኬክስ።

2ህንተ ኤረይሳ ታካ ኤራይስ፤

ታኒ ህንተፈ ጉፅከ።

3ሽን ታኒ ኡባ ዳንዳእያ ፆሳራ ኦደታናዉ ኮያይስ፤

ታኒ ታ መቱዋባ እያራ ሞተታናዉ አሞታይስ።

4ሽን ህንተ ዎርዶን ካመይሳታ፤

ህንተ ኡባይካ ፓና አክመታ።

5ህንተ ስእ ግዳባ ግድያኮ፥

ጭንጫ ግድ በንታናሽን!

6ሀእ ታ ሞቱዋ ስእተ፤

ታ ዶናፐ ከያ ፓላማ ሀይዝተ።

7ህንተ ፆሳ ግሾ ዎርዶ ኦደቴቲ?

እያ ግሾ ግድ ጭሞን ኦደቴቲ?

8ህንተ እያ ማድያባይ ደኢ?

ዎይኮ እያዉ ፃባቃ ኤቅድ ሞተተቲ?

9እ ህንተና ፕልግ ፄልያኮ ህንተፈ ሎኦባ ደማኔ?

ህንተ አሰ ጭመይሳዳ እያ ጭማናዉ ዳንዳኤቲ?

10ህንተ ጌማን አሳ ሶምኦ በእድ ማድኮ፥

እ ቱማ ህንተና ሴራና።

11እያ ቦንቾይ ህንተና ዳጋንኔ?

እያ ቴማይ ህንተና ያሸኔ?

12ህንተ ኦድዳ ሌምሶይ ብድን መላ ፓናባ፤

ህንተ ሞቶይ ቢታፈ መትዳ ጎንዳለ መላ።

13አነ ስእ ጊተ፤ ታ ኦደታና፤

ህዛፐ ሀንዳባይ ሀኖ።

14ታኒ ታናተ አይስ መቶን የግያና?

ታ ደኡዋ አይስ ታ ኩሸን ኦይክያና?

15ፆሳይ ታና ዎኮካ ታኒ እያ ዳንዳአን ናጋና፤

ታኒ ታ መቱዋ እያ ስን ሺሻና።

16ናጋራንቾ አስ እያ ስን ሺቃናዉ ዳንዳኦና ግሾ፤

ኦን ኤር ታ ፃላተይ አቶተስ ጋሶ ግዳናዉ ዳንዳኤስ።

17ታ ሃሳያ አኬክድ ስእተ፤

ታ ኦዳይ ህንተ ሀይን ገሎ።

18ሀእ ታኒ ታ መቱዋ ኤካ ሺቃስ፤

እ ታዉ ፕርዳናይሳ ኤራይስ።

19ታና ሞታና አስ ደኢ?

ደእኮ ታኒ ስእ ጋዳ ሀይቃና።

20ፆሳዉ ነ ታዉ ሀ ናምኡባታ ኦ፤

ያትኮ ታ ነ ስንፈ ጌምከ።

21ነ ሴራ ኩሽያ ታፐ ደን፤

ታና ዳጋንይሳ አጋ።

22ሄሳፈ ጉየ፥ ታና ፄጋ፤ ታ ኮያና፤

ዎይኮ ታ ኦዳና፥ ነ ታዉ ዛራ።

23ታ ባላይነ ናጋራይ አፑኔ?

አነ ታ ናቁዋነ ታ ናጋራ ታና በሳ።

24ኔኒ አይስ ነ ሶምኡዋ ታፐ ገንይ?

ነ ሞርከዳ አይስ ታና ታይባይ?

25ጫርኮይ ኤፍያ ካልያ አይስ ኡንኤይ?

መልዳ ፑኑዋ አይስ የደይ?

26ኔኒ ታ ቦላ ፃፍዳ ሞቶይ ጫሞ፤

ታ ናአተ ባላካ አጋባካ።

27ኔኒ ታ ቶሁዋ ዱፃዳሳ፤

ታ ታንጉዋ ኡባ ዎቻሳ፤

ታ ቶሆይ የያሱዋ ካላሳ።

28ሄሳ ግሾ፥ ታኒ ዎቅዳ ምዳ፤

ብል ምዳ አፍላዳ ዉራይስ።