ያይቆባ 5

ዱረታስ እመትዳ ዞረ

1ህንተኖ፥ ዱረቶ፥ ህንተ ቦላ ኢታ መቶይ ያ ግሾ ዬክተነ ዘሌልተ። 2ህንተ ሻሎይ ቡቅስ፤ ህንተ አፍላይካ ብላን ሜተትስ።1 3ህንተ ዎርቃይነ ህንተ ብራይ ሽእስ። ሄ ሽአይ ህንተ ቦላ ማርካ ግዳና። እ ህንተ አሳተ ታማዳ ማና። ህንተ ሀ ዉርዳ ቃማታን ህንተዉ ሻሎ ዳጋዬታ። 4ህንተ ጋደን ኦ ፔእዳ አሳ ኡነ ሚሽያ ቃንፅበከታ። ሄስ ህንተ ቦላ ዋሴስ። ሄ አሳታ ዋሶይ ዎልቃማ ጎዳ ሀይን ስኤትስ።2 5ሀ ሳአን ህንተ ኡሎ ፃላላስ ቆፕድ፥ እንጀን ደእደታ። ሹካስ ጊገትዳ መሄዳ ህንተና ክደታ። 6ህንተራ ኤቀታናዉ ዳንዳኦና ፅሎ አሳ ቦላ ፕርድደታ እያ ዎደታ።

ገንጫነ ዎሳ

7ታ እሻቶ፥ ጎዳይ ያና ጋካናዉ ገንጭተ። ጎሻንቾይ ቶርቸ እራይነ ስላ እራይ ያና ጋካናዉ ገንጭድ አልኦ ካ ናግድ ዋት ጋ ኤክያኮ ቆፕተ። 8ሄ ጎሻንቹዋዳ ህንተካ ገንጭተ። ጎዳ ዩሳይ ማታትዳ ግሾ ኡፋይሳን ናግተ።

9ታ እሻቶ፥ ፆሳይ ህንተ ቦላ ፕርዶና መላ እሶይ እሱዋ ቦላ ዙዙሞፍተ። ፕርደይስ ፐንገን ኤቅስ። 10ታ እሻቶ፥ ዋያን ገንጭዳ፥ ጎዳ ሱንን ኦድዳ ናበታ ሌምሶ ኦድ ኤክተ። 11ዳንዳአን ገንጭዳይሳታ ኑኒ አንጀትዳይሳታ ጎስ። እዮብ ዋንድ ገንጭዳኮ ህንተ ስእደታ። ጎዳይ ዉርሰን እያ ዋት ማድዳኮ በእደታ። እ ማሮትነ ቃይ ኩምዳ ጎዳ ግድያ ግሾ ሄሳ ኦስ።3

12ሽን ኡባፈ ስን፥ ታ እሻቶ፥ ሳሉዋን ግድን ዎይኮ ሳአን ግድን ዎይኮ ሀራ አይብንካ ጫቆፍተ። ፆሳ ፕርዳን ህንተ ገሎናዳ ህንተ ኦዳይ ኤ ግድኮ፥ “ኤ” ጊተ፤ አካይ ግድኮ፥ “አካይ” ጊተ።4

13ህንተ ግዶን መቶ ኤክያ ኦንካ ደእኮ ፆሳ ዎሶ። ኡፋይትያ ኦንካ ደእኮ ጋላታን የፆ። 14ህንተፈ ሀርገትያ ኦንካ ደእኮ ዎሳ ኬ ጭማታ ፄጎ። ኤንቲ ጎዳ ሱንን ሻማሆ ዛይተ ትይድ እያዉ ፆሳ ዎሶ።5 15አማኖን ዎስዳ ዎሳይ ሀርጋንቹዋ ፓና። ጎዳይ እያ፥ ሀርግያፈ ደንና፤ እ ናጋራ ኦዳባ ግድኮካ ጎዳይ እያ ማራና። 16ሄሳ ግሾ፥ ህንተ ፓፃና መላ ህንተ ናጋራ እሶይ እሱዋስ ፓፅተነ እሶይ እሱዋስ ዎስተ። ፅሎ አሳ ዎሳይ ዎልቃማ ኦሶ ኦስ። 17ኤልያስ ኑ መላ አሰ። እር ሳአን ቡኮና መላ ምንድ ፆሳ ዎስን ሄ ላይነ ኡሱፑን አጌና ሳአን እር ቡክቤና።6 18ዛሪድ እ ፆሳ ዎስን ሳሎፐ እር ቡክስ፤ ሳእካ ካ ዶልሰስ።7

19ታ እሻቶ፥ ህንተፈ ኦንካ ቱማ ኦግያፐ ቡትኮ፥ ሀራይ እያ ቱማኮ ዛርኮ፥ 20ናጋራንቹዋ እያ ባላ ኦግያፐ ዛርያ ኦንካ፥ እያ ሸምፑዋ ሀይቆፐ አሸይሳነ እያ ዳሮ ናጋራስ ማሮታ እመይሳ ኤሮ።8