እሳያሳ 65

ፕርዳነ አቶተ

1“ታና ኦይችቦናይሳታስ ቆንጫስ፤

ታና ኮይቦናይሳታስ በንታስ።

ታ ሱን ፄግቦና ካዎተስ፥

‘ዬ! ዬ!’ ያጋዳ ኮያስ።1

2ባንታ ቆፋ ካልድ፥

ሎኦ ግዶና ኦግያን ሄመትያ ጌላ አሳስ

ጋላስ ኩመ ታ ኩሽያ ምጫስ።

3ሀ አሳይ፥ ታ ስንን አታክልተ ጋደን ያርሽሸነ

ፁበ ያርሾ በሳን እፃነ ጩይስሸ

ታና ኡባ ዎደ ሀንቀሶና።

4ኤንቲ ዱፎን ኡተይሳታ፥ ጌማ በሳን አቀይሳታ፥

ጉዱን አሾ መይሳታ፤ ኤንታ ፃሩዋን፥

ቱና አሾ ጫምብ ደኤይሳታ።

5“ኤንቲ፥ ‘ነዉ ያን ደአ፤

ታኒ ኔፐ ጌሽ ግድያ ግሾ

ታኮ ሺቆፓ!’ ያጎሶና።

ሄሳ መላ አሳት ሲ ቱጭያ ጩያ መላ፤

ጋላስ ኩመ ኤፅያ ታማ መላ።

6“ሄኮ፥ ታ ስንን ፃፈት ኡትስ፤

ታኒ ኤንታዉ ዛራና ስእ ጊከ፤

ኤንታ ሴራናዉ ደንዳስ።

7ታኒ ኤንታ ናጋራነ ኤንታ አዋታ ናጋራ

አጩዋ እስፈ ኤንታዉ ቃንፃና።

ኤንቲ ደርያ ቦላ እፃነ ጩይስዶሶና፤

ዙማታ ቦላ ታና ጫይዶሶና።

ኤንቲ ካሰ ኦዳ ኦሱዋ አጩዋ

ታኒ ኤንታዉ ቃንፃና” ያጌስ ጎዳይ።

8ጎዳይ ያጌስ፦

“ኢታ ዎይነ ሱሳ ግዶን

ሎኦ ዎይነ አይፈይ ደኤይሳዳ፥

አሳይ፥ ‘እያ ግዶን ሎኦ ዎይነ አይፈይ ደእያ ግሾ

ኡባ ዎራ ሆሎፕተ’ ገይሳ መላ፥

ታኒ ታ አይለታ ሀይሳዳ ኦና፤

ታኒ ኤንታ ኡባ ይስከ።

9ታኒ ያይቆባፐ ኮቸ፥

ይሁዳፐ ታ ደርያ ላተይሳታ ከሳና፤

ታ ዶርዳይሳት እያ ላታና፤ ታ አይለት ያን ዳና።

10ታና ምንድ ኮይያ ታ አሳስ፥

ሳሮን ዶርሳ ዉደይ ሄመትያ በሲ ግዳና፤

አኮራ ዛንጋራይ ሚዛ ዉደይ አላትያ በሲ ግዳና።2

11“ሽን ህንተኖ፥ ጎዳ አግድ፥

ታ ጌሻ ዙማ ዶግዳይሳቶ፥

‘ቃዳ’ ጌተትያ ኤቃስ ግብራ ጊግሰይሳቶ፥

ህንተ ዉርሰ ኤራናዉ

‘ሳማ’ ጌተትያ ኤቃስ ዋላሀ ዎይነ

ኡሻ ዋንጫን ኩንይሳቶ፥

12ታኒ ህንተ ዉርሰ ማሻስ አዳ እማና፤

ህንተ ኡባይ ጎይረታናዉ ሆካና።

ታኒ ህንተና ፄግን ኮይበከታ፤

ኦድስን ስእቤከታ።

ህንተ ታ ስንን ኢታባ ኦደታ፤

ታኒ ዶሶናባ ዶርደታ።”

13ኡባ ሃርያ ጎዳይ ያጌስ፦

“ታ አይለት ማና፥ ሽን ህንተ ኮሻታና፤

ታ አይለት ኡያና፥ ሽን ህንተ ሳሞታና፤

ታ አይለት ኡፋይታና፥ ሽን ህንተ ዬላታና።

14ታ አይለት ዎዛናፐ ኡፋይትድ የፃና፥

ሽን ህንተ ዎዛናፐ ካዮታና፤

ህንተ አያናይ መቅዳ ግሾ፥

ህንተ ዘሌልድ ዬካና።

15ህንተ፥ ህንተ ሱን ታ ዶረትዳ ደርያስ

ቃንገ ኦድ እማና።

ኡባ ሃርያ ጎዳይ ህንተና ዎና፤

ሽን እ ባ አይለታ ዱማ ሱንን ፄጋና።

16ካሰ መቶት ዶገትዳ ግሾነ

ታ አይፍያ ስንፈ ጌምዳ ግሾ

ሄ ቢታን አንጆ ኮይያ ኡባይ

ቱማ ፆሳ ሱንን ዎሳና።

ሄ ቢታን ጫቆ ጫቅያ ኡባይ

ቱማ ፆሳ ሱንን ጫቃና።

ኦራ ሳሎነ ሳአ

17“ሄኮ፥ ታኒ ኦራ ሳሎታነ

ኦራ ሳአ መና፤

ካሰባ ኡባይ ሀሳየተና፤ ቆፈተና።

18ሽን ታኒ መያባን

መርናዉ ኡፋይትተነ ሀሹ ጊተ።

ታኒ የሩሳላመ ኡፋይሳስነ

እ አሳካ ጋላታን ኩምዳይሳታ ኦዳ መና።

19ታኒ የሩሳላመን ኡፋይታና፤

ታ አሳን ሀሹ ጋና።

ህዛፐ ጉየ ዬሆይነ

ኡንአ ዋሶይ ያን ስኤተና።

20“የሩሳላመን ህዛፐ ጉየ፥

ጉ ዎደ ደእድ ሀይቅያ ናእ፥

ባ ላይ ዉርሶና ሀይቅያ ጭማ አስ ዴና።

ፄቱ ላይራ ሀይቅያ ኡራይ፥

ናአተን ሀይቅስ ጌተታና፤

ፄቱ ላይ ጋና ሀይቀይ፥

ባደትዳ አሳዳ ታይበታና።

21ሄ ዎደ አሳይ ኬ ኬፅድ ዳና፤

ዎይነ ቶክድ እያ አይፍያ ማና።

22ኤንቲ ኬፅን ሀር ዴና፤

ኤንቲ ቶክን ሀር ሜና።

ታ አሳ ላይይ ም ላይዳ አዱቃና፤

ታኒ ዶርዳይሳት አዱሳ ዎደ

ባንታ ኩሸ ኦሱዋን ኡፋይታና።

23ኤንቲ ጮ ዳቡሮኮና

ቃድ ባይና ናአ የሎኮና።

ኤንቲ ባንታ ናይታራ

ጎዳን አንጀትዳ ኮቻታ ግዳና።

24ኤንቲ ታና ፄጋናፐ ስን፥

ታኒ ኤንታዉ ኮያና፤

ኤንቲ ቡሮ ሃሳዮና ደእሽን

ታኒ ኤንታ ስአና።

25ሱመይነ ዶርሳ ኡርገይ እስፈ ሄመታና፤

ጋሞይ ቦራዳ ካለ ማና፤

ባን ሾሻስ ካ ግዳና።

ሄ ዎደ ታ ጌሻ ዙማ ቦላ

ኤንቲ ቆሄቶኮናነ ዮኮና”3

ያጌስ ጎዳ ፆሳይ።