እሳያሳ 63

ፆሳ ፕርዳ ጋላስ

1ኤዶመ ቢታን፥ ባሶራ ካታማፐ

ዞኦ ማኦ ማእድ የይ ሀይስ ኦኔ?

ቦንቾ ማኦ ማእድ

ባ ዎልቃ ምኖተን ስን ሆርዶፈይ ኦኔ?

“ፅሎ ኦደተይነ

አሽያ ዎልቅ ደኤይ ታና”

ያጌስ ጎዳይ።

2ዎይነ ጉምእያሶን ዎይነ የያ አሳ ማኦዳ

ነ ማኦይ አይስ ዞእዴ?

3“ታኒ ዎይነ ጉምእያሶን ዎይንያ ታርካ የስ፤

ካዎተታፐ እስ አስካ ታራ ባዋ።

ታኒ ኤንታ ታ ሀንቁዋን የስ፤

ታ ይሉዋን ኤንታ ድርፀረስ።

ኤንታ ሱይ ታ ማኡዋ ቦላ ርጨትን፥

ታ ማኦ ኡባይ ኢትስ።

4ታኒ ታ አሳ ዎዝያ ጋላሳይነ

ኤንታ ሞርከታ ሀሎ ከይያ ላይይ ጋክስ።

5ታኒ በአስ፥

ሽን ታና ማድያ እስ አስካ ደማብከ፤

ማደይ ይዳ ግሾ፥ ታኒ ማላለታስ።

ሄሳ ግሾ፥ ታ ቀሰይ ታዉ አቶተ ኤህስ፤

ታ ሀንቆይ ታና ማድስ።

6ታኒ ታ ሀንቁዋን ካዎተታ የስ፤

ታ ይሉዋን ኤንታ ድርፀረስ፤

ኤንታ ሱ ቢታን ጉሳስ” ያጌስ ጎዳይ።

ዎሳነ ጋላታ

7ጎዳይ ኑስ ኦዳ ኦሶ ኡባ፥

ጎዳይ ባ ማሮተንነ ባ ቃያን

እስራኤለ አሳስ ኦዳ ሎኦ ኦሶ ኡባነ

እያ ሱንይ ጋላተታና መላ

በስዳ ኬሀተ ኡባ ታኒ ኦዳና።

8እ፥ “ኤንቲ ቱማ ታ አሰነ ታ ናአ ግድያ ግሾ፥

ታዉ ዎርዶቶኮና” ያግስ።

ሄሳ ግሾ፥ እ ኤንታ አሸይሳ ግድስ።

9ኤንታ ዋየ ኡባ እ ዋየትስ፤

እያ ስን ኪታንቾይ ኤንታ አሽስ።

እ ኤንታ ባ ሲቁዋንነ ባ ማሮታን ዎዝስ፤

ካሰ አዳ ዎደታ ኡባን እ ኤንታ ቶክስ።

10ሽን ኤንቲ ማካልዶሶና፤

እያ ጌሻ አያና አዛንዶሶና።

ሄሳ ግሾ፥ እ ስሚድ፥

ኤንታዉ ሞርከ ግድስ፤ ኤንታ ኦልስ።

11ሄሳፈ ጉየ አሳይ በንባነ

ባ አይልያ ሙሰ ዎደ ኦዳባ ቆፕድ፥

ሀይሳዳ ያግዶሶና፦

“ባ ዉድያ ሄንንቾታራ እስፈ

አባ ግዶራ ካንስዳ ፆሳይ አዉን ደኢ?

ሄ ዎደ ባ ጌሻ አያና ኤንታ ግዶን፥

ዎዳ ፆሳይ ሀእ አዉን ደኢ?

12ባዉ መርና ሱን ግዳና መላ

ኤንታ ስንን ሃ ሻክድ፥ ባ ቦንቾ ዎልቃማ ቀሰይ

ሙሰስ ኡሻቻ ኩሸ ግዳና መላ ኪትዳይስ አዉን ደኢ?

13ቢታ ቦላራ ፓር ብያዳ ኤንቲ በቶና

ጪሞ ሃ ግዶራ ፕንዳይስ አዉን ደኢ?”

ያግዶሶና። 14ዛንጋራ ዎያ መሄዳ፥

ጎዳ አያናይ ኤንታዉ ሸምፖ እሚስ።

ነ ሱንይ ቦንቸታና መላ

ሄሳዳ ኦዳ ነ አሳ ካለዳሳ።

15አቤት ጎዳዉ፥ ሳሎራ ዱገ ፄላ፤

ኔኒ ደእያ ጌሽነ

ቦንቾ ግድዳ አራታፐ በአ።

ነ ቅናተይነ ነ ዎልቃይ አኔ?

ነ ማሮታይነ ነ ቃይ ኑፐ ሃክስ።

16አብራሃመይ ኑና ኤሮና እፅኮካ፥

ያይቆብ ኑና አኬኮና እፅኮካ፥

አቤት ጎዳዉ፥ ኔኒ ኑ አዋ፤

በንፐ ዶምድ፥ ነ ሱንይ ኑና ዎዘይሳ።

17አቤት ጎዳዉ፥ ኑኒ ነ ኦግያፐ

ያናዳነ ነዉ ያዮናዳ

ኑ ዎዛና አይስ ሙምሳዲ?

ጎዳዉ፥ ነ አይለታ ግሾ፥

ነ ላታ ግድዳ ኮቻታ ግሾ፥

ኑኮ ስማ።

18ነ ጌሻ አሳይ

ነ ኬ ጉ ዎደስ ላትዶሶና፤

ሽን ሀእ ኑ ሞርከት እያ የዶሶና።

19ኑኒ በንፐ ነባ፤

ሽን ኤንታ ኔኒ ሃራባካ፤

ነ ሱንንካ ኤንቲ ፄገትቦኮና።