እሳያሳ 54

ፅዮነ ስን ቦንቹዋ

1ናተ፥ የሎና ማይን፥ የፃ!

ናተ፥ እቀታ ኤሮናረ፥ ኡፋይሳን እልላ!

አዝናራ ደእያ ማጫሰ ናይታፐ

ባርካ ደእያ ማጫሰ ናይት ዳራና።

2ነ ዱንካንያ በሳ ዳልግሳ፤

ዱንካንያ ገሸታ ፕድ ኦዳ ምጫ፤

ፁምሶፓ፤ ዎዶሩዋ አዱሳ፤ ሽያ ምን።

3ኔኒ ኡሻችነ ሀድርስ ዳልጋና፤

ነ ኮቻት ካዎተታ ላታና፤

ባይሳትዳ ኤንታ ካታማታን ኬፅድ ዳና።

4“ያዮፋ፤ ኔኒ ዬላታካ፤

ዳጋሞፋ፤ ኔኒ ካዉያካ።

ነ ያላጋተ ዬላ ኔኒ ዶጋና፤

ነ አምኤተ ቦርያ ህዛፐ ጉየ ሀሳያካ።

5ነ አዝናይ ነና መዳይሳ፤

እያ ሱንይ ኡባፈ ዎልቃማ ጎዳ።

እስራኤለ ጌሻይ ነና ዎዝዳይሳ፤

እ ቢታ ኡባ ፆሳ ጌተታና።

6አዝን አግን፥ ዶገታዳ አዛንያ ማጫሳዳ፥

ያላጋተን አዝና ሶፐ ከይዳ፥

ማጫሳዳ ኔኒ ሀናዳ ደእሽን፥

ታኒ ጎዳይ ነና ዛራዳ ፄጋስ።

7“ጉ ዎደ ታኒ ነና አጋስ፥

ሽን ግታ ቃን ታኒ ነና ዛራዳ ኤሀና።

8ሱልያ ሀንቆን ታኒ ታ ሶምኡዋ

ኔፐ ጉ ዎደስ ገንስ።

ሽን መርና ማሮተን ታኒ ነዉ ቃታና”

ያጌስ ነና ዎዝያ ጎዳይ።

9“ሀይስ ታዉ ኖሄ ዎድያ መላ፤

ሄ ዎደ ታኒ ዮ ሃን

ዛራዳ ሳኣ ይስከ ጋዳ ጫቅዳይሳዳ፥

ዛራዳ ነ ቦላ ሀንቀቶና መላነ

ሴሮና መላ ታኒ ጫቃስ።

10ደረት ቃፃናዉ፥ ዙማት ባንታ በሳፈ ክቻናዉ ዳንዳኦሶና፤

ሽን ታ መርና ሲቆይ ኔፐ ሻከተና፤

ታ ሳሮተ ጫቆይ ኔፐ ክቸና”

ያጌስ ነዉ ቃትያ ጎዳይ።

11“ነኖ፥ መቶትዳ ካታመ፥ ጎተይ ያነ ሃነ ሾጭዳረ፥

ምንያባይ ይዳረ፥

ሄኮ፥ ታኒ ነና ቦንቾ ሹቻን አሌቅሳዳ ኬፃና፤

ነ ባሱዋ ሳንፓረ ሹቻን ሂፃና።

12ነ ሹቻ ግምብያ ቁስትያ ዞኦ እንቆ ሹቻን፥

ነ ፐንግያ ጶልያ አልኦ ሹቻን፥

ነ ድርሳ ቦንቾ ሹቻን ግምባና።

13ነ ናይት ኡባይ ጎዳፐ ታማራና፤

ነ ናይታ ሳሮተይ ዳራና።

14ኔኒ ፅሎተን ምናዳ ኤቃና፤

ገነይነ ኡንኤይ ኔፐ ሃካና።

ነና ያሽስያባ ዴና፤

ዳጋም ኔኮ ሺቀና።

15ነና ኦላናዉ ደንደይ ደእኮ፥ ሄስ ታፐ ግደና፤

ነና ቆሀናዉ ኮየይ ደእኮ፥ እ ኩንዳና።

16“ሄኮ፥ ሁበን ታማ ሁብድ፥

ባ ቆፕዳ ኦላ ሚሽያ ቆፅያ ኡራ ታኒ መስ፤

ይሳና መላ ይሰይሳ መዳይ ታና።

17ነና ቆሀናዉ ኦሰትዳ አይ ሚሸይካ ነ ቦላ ኦና፤

ነና ሞትያ እንፃርሳ ኡባስ ነ ዛሮ እማና።

ጎዳ አይለታ ላታይ ሀይሳ፤

ታፐ ኤንቲ ኤክያ ፅሎ ሀይሳ” ያጌስ ጎዳይ።