እሳያሳ 31

ግብፀ ቦላ ዘምፐይሳታ አየ!

1ማዶ ደማናዉ ግብፀ ዎይሳታነ ፓራን አማነተይሳታ አየ! ፓራ ጋረታ ዳሮተንነ ፓራ አሳታ ምኖተን አማነተይሳታ አየ! ኤንቲ እስራኤለ ጌሻ ፄሎኮና ዎይኮ ጎዳፐ ማዶ ኮዮኮና። 2ሽን ጎዳይ ጭንጫ ግድያ ግሾ ጋዶ የዳና፤ እ ኦድዳይሳ አገና። ኢታ አሳ ቦላነ ኢታባ ኦያ አሳ ማደይሳታ ቦላ ደንዳና። 3ግብፀት አሰፐ አትሽን፥ ፆሰ ግዶኮና፤ ኤንታ ፓራትካ አሾፐ አትሽን፥ አያና ግዶኮና። ጎዳይ ሀንቆን ባ ቀስያ ደንያ ዎደ ማደይስ በታና፤ ማደተይስ ኩንዳና፤ ኤንቲ ኡባይ እስፈ ያና።

4ጎዳይ ታኮ ሀይሳዳ ያግስ፦ “ጋሞይ ዎይኮ ዎዳላ ጋሞይ መሄ ኦይክድ ዳርያ ዎደ ሄንንቾት ፄገትድ ሺቅኮካ፥ እ ኤንታ ዋሱዋስ ዳጋመና፤ ኤንታ ቃላስ ያየና። ሄሳዳካ፥ ኡባፈ ዎልቃማ ጎዳይ ፅዮነ ዙማነ እያ ዙማታ ኦላናዉ ዎና። 5ካፎይ አለይሳዳ ኡባፈ ዎልቃማ ጎዳይ የሩሳላመ ገቻና፥ አሻና፥ ናጋና፤ እያ ቦላራ አልድ ሄማና።

6“ህንተኖ እስራኤለ አሳዉ፥ ህንተ ማካልድ እፅዳ፥ እያኮ ስምተ። 7ሄ ጋላስ ናጋር ኩምዳ ህንተ ኩሽያን ብራፐነ ዎርቃፈ ኦዳ ኤቃታ ዎራ ሆላና። 8አሶረይ አሳባ ግዶና ማሻን ኩንዳና፤ አሳባ ግዶና ማሽ ኤንታ ማና። ኤንቲ ማሻ ስንፈ ባቃታና፤ ኤንታ ናአተት ዎልቃን አሳስ ኦና። 9ዳጋማ ጋሶን ኤንታ ምኖ ሚፃይ ላለታና፤ ኤንታ ቶራ ሞጮናት ዳጋምድ የግ ያና” ያጌስ፥ እያ ታማይ ፅዮነን፥ እያ ጮጨይ የሩሳላመን ደእያ ጎዳይ።