እሳያሳ 27

እስራኤለይ ላአ ከያና

1ሄ ጋላስ ጎዳይ ባ ምኖ፥ ግታነ ዎልቃማ ማሻን ሌዋታነ ጌተትያ ፆንገትያነ ፃፀትያ ሾሻ ሴራና፤ አባን ደእያ ዶኣካ ዎና።1 2ሄ ጋላስ ሀይሳዳ ጌተታና፦ “ሎኦ ዎይነ ጋድያስ የፅተ፤ 3ታኒ፥ ጎዳይ እያ ናጋይስ፤ ታኒ ቃንፆና ሃ ኡሻይስ፤ ኦንካ እያ ቆሆናዳ ቃማ ጋላስ ናጋይስ። 4ታኒ ሀንቀትከ፤ ታራ ኦለታናዉ አጉንነ ጎምኦረይ አነ ደንዶ! ታኒ ኤንታ ቦላ ከያዳ ኤንታ ፁጋ ዉርሳናሽን። 5ዎይኮ ቆሰትድ አታናዉ ታኮ ዮ፤ ታራ ስገቶ፤ ኤ፥ ታራ ስገቶ” ያገታና።

6ያና ዎድያን ያይቆብ ፃጶ የዳና፤ እስራኤለይ አጫናነ ጪያና፤ እያ አይፈይ ቢታ ኡባ ኩማና።

7ኤንታ ሾጭዳይሳታ ሾጭዳይሳዳ ጎዳይ እስራኤለ አሳ ሾጭደዬ? ዎይኮ ኤንታ ዎዳይሳታ ዎዳይሳዳ ኤንቲ ሀይቅዶናዬ? 8ጎዳይ ባ አሳ ድኤታና መላ ኦድ ሴርስ፤ ዎልቃማ ዶሎሀ ባጋ ጎትያን ኤንታ ጎድድ ከስስ። 9ያይቆባ ናቆይ አቶ ጌተታናይነ እያ ናጋራይ ፖሎ ቁሸታናይ፥ ያርሾ ሹቻ ኡባ እ መንረድ ቦቅንተ ሹቻዳ ኦያ ዎደነ አሼራ ኤቃ ምስልያ ዎይኮ እፃነ ጩይስያ በሳ ላልያ ዎደ።

10ድረትዳ ካታማይ ባይሳትስ፤ ካሰ አስ ደእያ በሳይ ሀእ ባዞ መላ ዶገትድ አትስ። መሄይ ሄመትያ በሲ ግድዳ ግሾ፥ ማታነ ም ሀይ ምድ ማራት ያን አላቶሶና። 11ም ታሸት መልያ ዎደ መቀረቶሶና፤ ማጫሳይ ምፅድ ኤናዉ ኤፎሶና። ሀ አሳይ አኬክ ባይና አስ ግድያ ግሾ፥ ኤንታ መዳይስ ኤንታዉ ቃተና፤ ኤንታ ማረና።

12ሄ ጋላስ ኤፍራፂሳ ሻፋፐ ግብፀ ሻፋ ጋካናዉ ጎዳይ ካ ቆፃና። ህንተ፥ እስራኤለ አሳይ እሶይ እሶይ ሺቃና።

13ሄ ጋላስ ግታ ሞይዘይ ፑነታና፤ አሶረ ቢታን ይዳይሳትነ ግብፀ ቢታ ድኤትዳይሳት ይድ፥ የሩሳላመን ጌሻ ዙማ ቦላ ጎዳ ጎይናና።