እሳያሳ 23

ፅሮሳስ ኦደትዳ ትንብተ

1ፅሮሳ ካታማስ ኦደትዳ ጎዳ ቃላይ ሀይሳ።

ፅሮሳ ካታማን ኬ ዎይኮ ሸምፕያ ሶይ ባይና ግሾ ህንተኖ ታርሰሳ ማርካብያ ላገይሳቶ ዬክተ! ቆጵሮሳ ቢታፈ ሀ ዎረይ ህንተኮ ይስ።1 2ህንተኖ፥ አባ ማታን ደእያ አሳዉ፥ ህንተኖ አባ ቦላራ ሄመትያ ዱረትዳ፥ ስዶና ዛልአንቾቶ፥ ስእ ጊተ! 3ህንተዉ ያ ካይ፥ ናይለ ሻፋፐ ጫከትዳ ሽሆራ ቢታ ካ፤ ህንተ ካዎተታስ ዛልኤ በሲ።

4ነኖ ስዶና ካታማዉ፥ አባ ማታን ደእያ ሚፃዉ፥ አባይ፥ “ታኒ እቀታብከ፤ የላብከ፤ አደነ ማጫ ናአ ድቻብከ” ያግድ ኦድዳ ግሾ ዬላታ። 5ሄ ዎረይ ግብፀ ቢታ ጋክያ ዎደ ኤንቲ ፅሮሳባ ስእድ ዳጋማና።

6ህንተኖ አባ ማታን ደእያ አሳዉ፥ ዘሌልሸ ታርሰሳ ፕንተ። 7በን ዎደ ኬፀትዳ ካታማይ፥ እያ ቶሆይ እያ ሃሆ ቢታ ኤፍዳይነ ህንተ እያን ኡፋይትያ ፅሮሳ ካታማይ ሀይሴ? 8ካላቻ ዎስስያ ካታማ፥ እያ ዛልአንቾት ሀላቃታ ግድዳነ እያ ግዶን ባይዘይሳትነ ላመይሳት ቦንቸትዳይሳታ ግድዳ ፅሮሳ ካታማ ቦላ ሀይሳ ሀልችዳይ ኦኔ? 9ኦቶራንቾታ ቦንቾ ኡባ ጉናዉነ ቢታ ቦላ ቦንቸትዳ ኡባ ካዉሻናዉ ኡባፈ ዎልቃማ ጎዳይ ሀይሳ ሀልችስ።

10ህንተኖ፥ ታርሰሳ አሳዉ፥ ህንተና ተቅያባይ ባይና ግሾ፥ ናይለ ሻፋዳ ቢታ ቦላ ኩምድ ጎግተ። 11ጎዳይ አባ ቦላ ባ ኩሽያ ምጭስ፤ እያ ካዎተ ቃስ። ካናነ ሚፃ ላላና መላ ጎዳይ ኪትስ። 12ጉጅድካ፥ “ህንተኖ፥ ኡንኤትዳ ስዶና አሳዉ፥ ህንተ ኡፋይሳን የፅያ ዎደይ ዉርስ። ደንድድ ቆጵሮሳ ፕንተ፤ ያንካ ህንተ ሳሮ ደመከታ” ያግስ።

13ባብሎነ ቢታ በእተ፤ ሄ ቢታይ ሀእ ፓናባ ግድስ። አሶረ አሳይ ሄ ቢታን ዶእ አቃናዳ ኦስ። ኤንቲ ያን ደእያ ዎጋ ኬታ ላልድ ባንታዉ ሚፃ ግምብዶሶና፤ ቢታ ባይሳ ኦዶሶና።

14ህንተኖ፥ ታርሰሳ ማርካበቶ፥ ህንተ ሚፃይ ላለትዳ ግሾ፥ ዘሌልተ።

15ፅሮሳ ካታማይ እስ ካዎስ ደኦ ላይ ግድያ ላፑን ታሙ ላይ ዶገትድ ዳና ዎደይ ያና። ላፑን ታሙ ላይ ዉርያ ዎደ ላይማ ማጫሳስ የፀትያ የ መላ ፅሮሳ ካታማስ የፀታና። 16ኤንቲ፥ “ነኖ ዶገትዳ ላይማ ካታማዉ፥ ነ ዲ ኤካዳ ካታማራ ዩያ። ነና አሳይ ሀሳያና መላ ማልኦ ቃላን ዳሮ የ የፃ” ያጋና።

17ላፑን ታሙ ላይይ ፖለትያ ዎደ፥ ጎዳይ ፅሮሳ ፆሞሳና። ሽን ሄሳፈ ጉየ፥ እ በን ባ ላይማተ ኦሱዋኮ ስማና፤ ሳአን ደእያ ካዎተታ ኡባራ ላይማታና። 18ግዶሽን፥ እያ ዛልእያ ዎይነ እያ ዳሞዘይ ጎዳስ ዱማትዳይሳ ግዳና፤ እያ ዛልእያ ዎይነ ካነ ሎኦ ማኦ ሻማናዉ፥ ጎዳስ ኦያ አሳስ እመታናፐ አትሽን፥ ሚሸ ኬን ዎይኮ ምንጃ ኬን ኡተና።