ጌሻ ማፃፋ
እሳያሳ 14
ድኦፐ ስሞ
ጎዳይ ያይቆባስ ቃታና፤ እስራኤለ ዛሪድ ዶራና፤ ኤንታ፥ ኤንታ ቡዞ ቢታን ዎና። በታንቾት ኤንታራ እስፋና፥ ያይቆባ ሶ አሳራ ኦይከታና። ካዎተት ኤንታ፥ ኤንታ ቢታ ኤሀና። እስራኤለ አሳይ ኤንታና ማጫነ አደ አይለ ኦድ ጎዳ ቢታን ሃራና። ኤንቲ ባንታና ድእዳይሳታ ድአና፤ ባንታና ሃርዳይሳታ ሃራና።
ጎዳይ ህንተና፥ ህንተ ኡንኣፈ፥ መቱዋፐነ ህንተ ሃረትዳ ኢታ አይለተፈ ሸምፕስያ ዎደ፥ ህንተ ባብሎነ ካዋ ቦላ ሀይሳዳ ያግድ ቀልቅሳና። ኡንኤይስ ዋንድ አግዴ? እያ ሀንቁዋ ሱላይ ዋንድ አትዴ? ጎዳይ ካዎተታ ፃምኣነ ሃረይሳታ ጉምባ መንስ። ኤንቲ አሳ ዛው ባይና ሀንቁዋን ሾጭዶሶና፤ ባንታና ፆንዳይሳታ ቃንፆና ኡንኤሸ ደእዶሶና። ሽን ቢታ ኡባይ ሸምፕድ ደእስ፤ ኡፋይሳን የፅስ። ሀር አቶሽን፥ ልባኖሰ ዝጋትነ ፂዳት ካዋ ኩንደን ኡፋይትድ፥ “ኔኒ ካዉያዳ ኩንድዳፐ ጉየ፥ ኑና ቃንፃናዉ የይ ባዋ” ያጎሶና። ኔኒ ያ ዎደ፥ ስኦለይ ነና ሞካናዉ ጊግስ፤ እ ካሰ ቢታ ካለዳ አሳ ሞይትለታ፥ ነና ሳሮና መላ ደንስ፤ ቃስ ካሰ ካዎ ግድዳ ኡባ ኤንታ አራታፐ ደንድ ኤሴስ። ኤንቲ ኡባይ ሀይሳዳ ያጋና። “ሄኮ ነካ ኑዳ ዎልቃ ያዳሳ፤ ኑ መላ ግዳዳሳ።” ካሰ ዲ ዲፅን ሳበትያ ነ ቦንቾይ ሀእ ስኦለ ገልስ። ኦላ ኔኒ ዝንእያ ሂፃ፤ ጉፁነይ ኔኒ ማእያ አፍላ ግዳና ያጋና።
ነኖ ዎንታ ናአዉ፥ ጉራ ባካላዉ፥ ሳሎፐ ዋና ኩንዳዲ? ነኖ ካዎተታ ካዉሽዳይሶ ዋና ቃንፀታዳ ሳአን ዎዲ?1 ኔኒ ነ ዎዛናን፥ “ታኒ ሳሎ ከያና፤ ታ ካዎተ አራታ ፆሳ ፆልንቶታፐ ቦላራ ዎና፤ ታኒ ፑደሀ ባጋ ጋፃን ሺቆ ደርያ ሁጰን ኡታና2። ታኒ ሻራት ደእያ ቃ በሳፈ ቦላ አና፤ ታኒ፥ ታና ኡባፈ ቃ ፆሳ ዳንሳና” ያጋዳሳ። ሽን ኔኒ ስኦለን፥ ህርክ ጪሞ ኦላን ዱገ የገታዳሳ።
ነና በእዳይሳት፥ “ቢታ ቃዳይስ፥ ካዎተታ ኮኮርስዳይስ፥ ሳኣ ቢታ ባዞ ከስዳይስ፥ ሳአን ደእያ ካታማታ ሽር የግዳይስ፥ ባ ቃሾ አሳታ የዶና እፅዳይስ ሀይሴ?” ያግድ ትሽ ኦድ ፄላና።
ካዎተታ ካዎት ኡባይ ባ ዱፎን ዱፎን ቦንቾን ዝንአና። ሽን ኔኒ እፀትዳ ታሸዳ ነ ዱፉዋፐ ጋፃ ሆለታዳሳ። ነ አሀይ ማሻን ሀይቅዳ አሀንነ ኦላን ደእያ ሹቻታኮ ዱገ ዎዳይሳታ አሀን ካመትስ። ኔኒ ቶሆን የትዳ አሀ መላ ግዳዳሳ። ኔኒ ነ ቢታ ይስዳ ግሾነ ነ አሳ ዎዳ ግሾ ኤንታራ ሞገታካ። ኢታ ሱንይ ኮቻይ መርናዉ ፄገቶፎ። ኤንቲ ደንድድ ቢታ ላቶና፤ ሳአ ኡባ ካታማ ፃላላ ኦና መላ ኤንታ አዋታ ናጋራ ግሾ፥ እያ ናይታ ዎናዉ ጊግስተ። ታኒ “ኤንታ ቦላ ደንዳና፤ ኤንታ ሱን፥ ኤንታ ኮቻነ ኤንታ የለታ ባብሎነፐ ይሳና። ታኒ ባብሎነ ቁፃረይ ደእያ በስነ ሃ ኤልያ በሲ ኦና፤ ታኒ ጋዶ ፕቶን እያ ፕታና” ያጌስ ኡባፈ ዎልቃማ ጎዳይ።
አሶረይ ያና
ኡባፈ ዎልቃማ ጎዳይ ሀይሳዳ ያግድ ጫቅስ፦ “ታኒ ሀልችዳይሳዳ ሀናና፤ ታኒ ቆፕዳይሳዳ ፖለታና። ታኒ አሶረ አሳ ታ ቢታን መንረና፤ ታ ደርያ ቦላ እያ የና። እያ ቃምባራይ ኤንታ ቦላፈ፥ እያ ቶሆይ ኤንታ ሀሽያፐ ክቻና” ያግስ። ሳአ ኡባስ ቆፈትዳ ቆፋይ ሀይሳ፤ ካዎተታ ኡባ ቦላ ምጨትዳ ኩሸይካ ሀይሳ። ኡባፈ ዎልቃማ ጎዳይ ሀይሳ ቆፕዳ ግሾ እያ ድጋናዉ ዳንዳኤይ ኦኔ? እያ ኩሸይ ምጨትስ፤ ሄሳ ጉየ ዛራናዉ ዳንዳኤይ ኦኔ?3
ፍልስፄመይ ያና
ካዎይ አካዝ ሀይቅዳ ላይ ኦደትዳ ቃላይ ሀይሳ:4 ህንተኖ ፍልስፄመ አሳዉ፥ ህንተና ሾጭዳ ፃምአይ መእዳ ግሾ ኡፋይቶፍተ። ሄ ሾሻ ኮቻፈ ሀሶይ ከያና፤ እያ ኮቻይ ቃስ ፆንገትያ ሾሽ ግዳና።5 ማንቆፈ ማንቆት ታ ቆሩዋን ሄመታና፤ መቶታንቾት ዎፑ ግድ ዝንአና። ሽን ታኒ ነ ኮቻ ኮሻን ዉርሳና፤ ኔፐ አትዳ ጉታ ዎና።
ነኖ ፐንግያዉ፥ ዬካ! ነኖ ካታማዉ፥ ዋሳ! ህንተኖ ፍልስፄመ አሳዉ፥ ህንተ ኡባይ ህርጋን ትልእተ! ፑደሀ ባጋፈ ጩይ ከይድ ዬስ፤ ሄ ጩጋፐ ዱፅድ ጉየ አተይ ባዋ። ሄ ካዎተይ ኪትዳ አሳታስ ዎይግድ ዛራኔ? ጎዳይ ፅዮነ ኬፅን፥ ቆሄትዳ አሳይ እ ግዶን ቆሰትድ አትያ በሲ ደምስ።
Source notes (5)
- Cross-reference ቆን 8:10፤ 9:1.
- Cross-reference ማቶ 11:23፤ ሉቃ 10:15.
- Cross-reference እሳ 10:5-34፤ ናህ 1:1-3፤ ሶፎ 2:13-15.
- Cross-reference 2 ካዎ 16:20፤ 2 ታር 28:27.
- Cross-reference ኤርም 47:1-7፤ ህዝ 25:15-17፤ እዩ 3:4-8፤ አሞ 1:6-8፤ ሶፎ 2:4-7፤ ዛካ 9:5-7.
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.