ሆሰ 4

ጎዳይ እስራኤለ ሞቴስ

1ሀ ቢታን ደእያ አሳ ኡባ፥ ጎዳይ ሞትያባይ ደእያ ግሾ፥ እስራኤለ አሳቶ፥ ጎዳ ቃላ ስእተ። ሄስካ፥ ቢታ ቦላ አማነተ፥ ሲቆይነ ፆሳ ኤሮይ ባዋ። 2ሀ ቢታ ቦላ ደኤይ ባደ፥ ዎርዶ፥ ሸምፖ ዎ፥ ካይሶቶነ ላይማ ፃላላ። ኤንቲ ዎጋ ኡባ መንሶና፤ ሱ ጉሶሶና። 3ሄሳ ጋሶን ቢታ ኡባይ ዬካና፤ ቢታን ደእያ ኡባይ ዳቡራና። ሳአ ዶአት፥ ሳሎ ካፎትነ አባ ሞሎት ሀይቃና።

4ህንተኖ፥ ካህነቶ፥ ታኒ ህንተና ሞትያባይ ደእያ ግሾ፥ ኦንካ ሀራ አሳራ ፓላመቶፎ፤ ዎይኮ ሀራ አስ ሞቶፖ። 5ህንተ ጋላስነ ቃማ በቴታ፤ ናበትካ ህንተራ በቶሶና። ሄሳ ግሾ፥ ታኒ ህንተ አይዉ ይሳና። 6ታ አሳስ ኤራተ ባይና ግሾ ይዶሶና። ህንተ ኤራተ እፅዳ ግሾ፥ ታካ ህንተ ታዉ ካህነ ግዶና መላ እፃስ። ህንተ ፆሳ ህግያ ዶግዳ ግሾ፥ ታካ ህንተ ናይታ ዶጋና።

7ካህነታ ታይቦይ ዳር ዳር ብያ ዎደ ታና ጉጅ ጉጅ ናቅዶሶና፤ ታኒ ኤንታ ቦንቹዋ ቃራዳ ዬላያና። 8ታ አሳ ናጋራይ ኤንታዉ ካ ግድዳ ግሾ ኤንቲ ታ አሳይ ባላባ ኦና መላ ኮዮሶና። 9ካህነት ደርያፐ ዱማትቦኮና። ታኒ ኤንታ ሀኖታ ግሾ፥ ኤንታ ሴራና፤ ኤንታ ኦሱዋዳ ኤንታዉ ዛራና። 10ኤንቲ ጎዳ አግዳ ግሾ ማና፥ ሽን ካሎኮና፤ ላይማታና፥ ሽን ናአ የሎኮና። 11ላይማተ፥ ጋምእዳ ዎይነ ኡሽነ ማልአንቶ ዎይነ ኡሽ ታ አሳ ዎዛና ይስስ። 12ኤንቲ ምፈ ኦሰትዳ ኤቃ ምስለ ዞረ ኦይቾሶና፤ ኤንታ ፃምአይ ኤንታ ኦይሻ ዛሬስ። ላይማተ አያናይ ኤንታ ባለስ፤ ኤንቲ ባንታ ፆሳፈ ሃክድ ላይማትዶሶና። 13ደረታ ሁጰን ያርሾ ያርሾሶና፤ ሎኦ ኩያይ ደእያ ዎላ ጋርሳን፥ ፂዳ ጋርሳን እፃነ ጩይሶሶና።

ሄሳ ግሾ፥ ህንተ ማጫ ናይት ላይማቶሶና፤ ህንተ ናይታ ማቸት ላሞሶና። 14ህንተ ማጫ ናይት ላይማትያ ዎደነ ህንተ ናይታ ማቸት ላምያ ዎደ ታኒ ሴርከ። አይስ ጊኮ፥ አደት ባንታ ሁጰን ላይማተይሳታራ ላገቶሶና፤ ኤንታራ ያርሾሶና። ሄሳ ግሾ፥ አኬክ ባይና ደረይ ያና።

15“እስራኤለ አሳቶ፥ ህንተ ላይማትኮካ፥ ይሁዳ አሳይ ህንተይሳዳ ባላ ግዶፖ። ጋልጋላ ቦፕተ፤ ቤት-አዌና (ኢታተ ኬ) ከዮፕተ፤ ‘ደኦ ፆሳይ ኤርያ መላ’ ግድ ጫቆፍተ። 16እስራኤለ አሳይ ጌላ ኡሳዳ ጌላትስ። ያትን፥ ጎዳይ ኤንታና ዳልጋ ደንባን ዶርሳ ማራዳ ዋትድ ሄማኔ? 17ኤፍሬም ኤቃታራ ጋሄትስ፤ ኤንታ አጋግተ። 18ኤንቲ ዳሮ ዎይነ ኡሻ ኡይ ስሚድ፥ ላይማተ አጎኮና፤ ኤንታ ሀላቃትካ ዬላያባ ዳሮ ዶሶሶና። 19ኤንታ ጫርኮይ ኤፋና፤ ባንታ ኤቃስ ያርሽዳ ያርሾታ ጋሶን ኤንቲ ዬላታና።”