እብራወ 8

የሱሲ ኑ ካህነ ሀላቃ

1ኑኒ ሃሳያ ግታባይ ሄሳ። ሳሉዋን ኡባፈ ቦላ ፆሳ አራታፐ ኡሻቻ ባጋን ኡትዳ ሀይሳ መላ ካህነ ሀላቃይ ኑስ ደኤስ።1 2እ አሳን ግዶናሽን፥ ጎዳን ኤቅዳ ቱማ ዱንካንያን ፆሳ ኬን ኦስ።

3ካህነ ሀላቃ ኡባይ እሞነ ያርሾ ያርሻናዉ ሹመቴስ። ሄሳ ግሾ፥ ሀ ካህነይ ያርሻናዉ እስባይ ዳናዉ ኮሼስ። 4ህገይ ኪተይሳዳ ያርሽያ ካህነት ደእያ ግሾ፥ ክርስቶስ ሳአን ደእያባ ግድያኮ እ ካህነ ግደና። 5ኤንቲ ካህነተን ኦያ ዱንካነይ ሳሎን ደኤይሳስ ሌምሶነ ኩያ። ሙሰይ ዱንካንያ ኤስያ ዎደ ፆሳይ እያኮ፥ “ታኒ ነና ዙማ ቦላ በስዳ ሌምሱዋ ካላዳ ኦ” ያግስ።2 6ሽን የሱሲ ግዶ ግድድ ስገያ ጫቆይ፥ ኮይሮ ጫቁዋፐ አይሳዳ እ ኤክዳ ኦሶይ ኤንታይሳፈ አስ። ሄስ ኤቅዳይ አያ ጫቆ ቃላና።

7ኮይሮ ጫቁዋን ባል ባይናባ ግድያኮ ናምአን ጫቆ ኮሸና። 8ሽን ጎዳይ ኤንታ ቦርድ፥ ሀይሳዳ ያግስ፦

“ታኒ እስራኤለ አሳራነ ይሁዳ አሳራ

ኦራ ጫቆ ጫቅያ ዎደይ ያና።3

9ሄ ጫቆይ ታ ኤንታ አዋታ ግብፀ ቢታፈ ኩሽያ ኦይካዳ፥

ጎቻ ከስዳ ዎደ ኤንታራ ጫቅዳ ጫቁዋ መላ ግደና።

ኤንቲ ታ ጫቁዋን አማነትቦና ግሾ፥

ታኒ ኤንታ የጋ አጋስ ያጌስ ጎዳይ።

10ሽን ህዛፐ ጉየ እስራኤለ አሳራ

ታ ጫቃና ጫቆይ ሀይሳ ያጌስ ጎዳይ።

ታኒ ታ ህግያ ኤንታ ጉግያን ዎና፤

ኤንታ ዎዛናን ፃፋና።

ታኒ ኤንታ ፆሳ ግዳና፤

ኤንትካ ታ አሰ ግዳና።

11ኤንታፈ ኦንካ ባ ሾሩዋ ዎይኮ ባ እሻ፥

‘ጎዳ ኤራ’ ያግድ ታማርሰና።

ኤንቲ ጉፈ ግታ ጋካናዉ

ኡባይ ታና ኤራና።

12ታኒ ኤንታ ናቁዋ አቶ ጋና፤

ኤንታ ናጋራ ዛራ ቆፕከ” ያጌስ።

13ፆሳይ ሀ ጫቁዋ “ኦራ” ግድ ፄግሸ ኮይሮይሳ ጋልእስስ። ህዛ፥ ጋልአይነ ጬጋይ ይያ ዎደይ ጋክስ።