እብራወ 4

1ህዛ፥ ፆሳይ ኑና ባ ሸምፖ በሳ ገልሳና ግዳ ቃላይ ቡሮ ስንፈ ደእያ ግሾ፥ ህንተፈ ኦንካ ሄ ሸምፖ በሳ ገሎና አቶና መላ ናገቶስ። 2ኤንታዉ ዎንገላይ ሳባከትዳይሳዳ፥ ኑስካ ሳባከትስ። ሽን ኤንቲ ስእዳባ አማንድ ኤክቦና ግሾ ኤንታ ጎእቤና። 3ግዶሽን፥ አላመይ መቶሳፐ ዶምድ ፆሳ ኦሶይ ፖለትዳይሳ ግድኮካ፥ ፆሳይ፥

“ታኒ ታ ሀንቁዋን ጫቃዳ፥

ታ ሸምፖ በሳ ኡባካ ገሎኮና”

ግዳይሳዳ፥ ኑኒ አማንዳይሳት እያ ሸምፖ በሳ ገላና።1 4ላፑን ጋላሳባ እስ በሳን፥ “ፆሳይ ላፑን ጋላሳን ባ ኦሶ ኡባፈ ሸምፕስ” ያግስ።2 5ቃስካ ሄ በሳን፥ “ኤንቲ ታ ሸምፖ በሳ ኡባራካ ገሎኮና” ያግስ።3 6ኮይሮ ዎንገላ ስእዳይሳት ኪተቶና እፅድ ሸምፖ በሳ ገልቦኮና። ያንያ ግሾ፥ ሀእካ ሄ ሸምፖ በሳ ገላና እስ እስ አሳት ደኦሶና። 7ሄሳ ግሾ፥ ፆሳይ፥ “ሀች” ግድ ፄግሸ እስ ጋላስ ኑስ ቃንፅስ። ዳሮ ዎደፐ ጉየ ፆሳይ ዳዊታ ባጋራ፥

“ፆሳይ ግያባ ሀች ህንተ ስእያ ዎደ፥

ህንተ ዎዛና ምንፍተ”

ያግድ ኦድስ።4 8እያሱይ ኤንታዉ ሸምፑዋ እምዳባ ግድያኮ፥ ፆሳይ ሀራ ጋላሳባ ጉየፐ ኦደናሽን።5 9ህዛ፥ ፆሳ አሳስ ሳምባታ ሸምፖይ ናገትድ ደኤስ። 10ፆሳ ሸምፖ በሳ ገልያ ኦንካ፥ ፆሳይ ባ ኦሱዋፐ ሸምፕዳይሳዳ እካ ባ ኦሱዋፐ ሸምፓና።6 11ሄሳ ግሾ፥ ኦንካ ሄ አሳ ኪተተ እፁዋ ካልድ፥ ኩንዶናዳ ፆሳ ሸምፖ በሳ ገላናዉ ምኖስ።

12ፆሳ ቃላይ ደኦነ ኦይሳ። ናምኡ ባጋራ ቃራትዳ ማሻፈካ አድ ኦጮ። እ ሸምፖ፥ አያና፥ ፃጶነ ኮልዘ ጋካናዉ ካንድ ጫዴስ። ቃስ አሳ ዎዛናን ደእያ ጌምዳ ቆፋነ አሙዋ ሻክድ ፕርዴስ። 13ፆሳ ስንፈ ቆሰትያባይ አይባ መተካ ባዋ። እያ አይፈ ስንን ኡባባይ ቆንጨነ ካሎ ደኤስ። ኑኒ ዛሮ እማናዉ በሰይ እያ ስንና።

የሱሲ ግታ ካህነ ሀላቃ

14ህዛ፥ ሳሎ ከይዳ ግታ ካህነ ሀላቃይ፥ ፆሳ ናአይ የሱሲ፥ ኑስ ደእያ ግሾ፥ ኑ አማኑዋ ምንድ ናጎስ። 15ኑ ካህነ ሀላቃይ ኑ ዳቡርያ ዎደ ኑስ ቃታናዉ ዳንዳኤይሳ። እ ኑዳ ኡባባን ፓጨትስፐ አትሽን፥ ናጋራ ኦቤና። 16ህዛ፥ ማሮተ ኤካናዉነ ማደ ኮሽያ ዎደ አ ኬሀተ ደማናዉ አ ኬሀተይ ደእያሱዋ ፆሳ አራታኮ ያዮና ሺቆስ።