እብራወ 2

ግታ አንጆ

1ሄሳ ግሾ፥ ኑኒ ስእዳ ቱማፐ ሀራሶ ኤከቶና መላ ሄ ስእዳይሳ ምንድ ናጋናዉ በሴስ። 2ህዛ፥ ኪታንቾታ ባጋራ ኦደትዳ ቃላይ ቱማ ግድኮ፥ እያ ናቆይነ ኪተቶና እፆይ ፕርዳ ኤህያባ ግድኮ፥ 3ያትን፥ ኑኒ ሀይሳ መላ ግታ አቶተ እፃስ ጊኮ፥ ዋንድ አታኔ? ኮይሮ ጎዳይ ባ ሁጰን ሄ አቶተ ኦድስ፤ ቃስ እያፐ ስእዳይሳት ኑስ ጌሽድ ማርካትዶሶና። 4ቃስ ፆሳይ ማላታታን፥ ኦራባታን፥ ዱማ ዱማ ማላታንነ ባ ሸንያዳ እምዳ ጌሻ አያና እሞታታን ማርካተ ምንስ።

የሱሲ አሰ ግድስ

5ፆሳይ ሀ ኑኒ ኦድያ ስንፈ ያና አላምያ፥ ኪታንቾታስ ሃርስቤና። 6ጌሻ ማፃፋይ እስ በሳን ሀይሳዳ ያጌስ፦

“ኔኒ አሳስ ቆፓናዉ አስ አይቤ?

ዎይኮ ኔኒ እያ ናጋናዉ እ አይቤ?1

7ነ እያ ኪታንቾታፐ ጉ ዎደስ ጉዳሳ፤

እያ ሁጰን ቦንቾነ ሳባ ካላቻ ዎዳሳ።

8ቃስ ኡባባ እያ ቶሁዋፐ ጋርሳን ዎዳሳ”

ያጌስ። ፆሳይ ኡባባ እያዉ ሃርስያ ዎደ እያዉ ሃረትቦናባይ አይብካ ባዋ። ሽን ሀእ ኡባባይ እያዉ ሃረትሽን ኑኒ በእቦኮ። 9ሽን ኑኒ ኪታንቾታፐ ጉራ ጉፅዳ የሱሳ በኦስ። ፆሳ አ ኬሀተ ጋሶን የሱሲ አሳ ኡባስ ሀይቅስ። እ ዋየ ሀይቆ ሀይቅዳ ግሾ፥ ቦንቾነ ሳባ ካላቻ እያ ሁጰን ዎስ። 10ኡባባይ እያዉነ እያ ጋሶን መትዳ ፆሳይ፥ ዳሮ ናይታ ባራ ቦንችሳናዉ ኤንታ አቶተ ሁጵያ፥ የሱሳ ዋየን ፖሎ ኦናዉ እያዉ በሴስ።

11የሱሲነ ሄ እ ጌሽዳ አሳ ኡባይ እስ አዋ ናይታ። የሱሲ ኤንታ፥ “ታ እሻታ” ግድ ፄጋናዉ ዬላቶናይ ሄሳሳ። 12የሱሲ፥

“ታኒ ነ ሱን ታ እሻታስ አዋጃና፤

ደርያ ሺቁዋን ነና ጋላታና”

ያጌስ።2 13ቃስ እ፥ “ታኒ ታ አማኑዋ እያ ቦላ ዎና” ቃስካ፥ “ፆሳይ ታዉ እምዳ ናይታራ ታ ሀይሳን ደአይስ” ያጌስ።3

14ናይት አሾይነ ሱ ደኤይሳታ ግድያ ግሾ፥ የሱሲካ ኤንታዳ አሰ ግድስ። እ ሄሳ ኦዳይ፥ ሀይቆ ቦላ ዎልቅ ደእያ ፃላህያ ባ ሀይቁዋን ይሳናሳ። 15ቃስ ባንታ ደኦ ላይ ኡባን ሀይቆ ያሻን አይለትድ ደኤይሳታ አይለተፈ ዎዛናሳ።

16ቱማ የሱሲ ይዳይ አብራሃመ ኮቸ ማዳናሳፈ አትሽን፥ ኪታንቾታ ማዳናሳ ግደና።4 17አሳ ናጋራይ አቶ ጌተታና መላ ፆሳ ስንን ማርያነ አማነትዳ ካህነ ሀላቃ ግድስ። ሄሳ ግሾ፥ እ ኡባባን ባ እሻታ ዳናናዉ በሴስ። 18እ ባ ሁጰን ፓጨን ዋየትዳ ግሾ ፓጨተይሳታ ማዳናዉ ዳንዳኤስ።