ሀገ 2

ኦራ ኬ ቦንቹዋ

1ዳርዮስ ካዎትዳ ናምአን ላይን፥ ላፑን አጌናን ላታማነ እስን ጋላሳን፥ ጎዳ ቃላይ ናብያ ሀገ ባጋራ ሀይሳዳ ያግስ። 2“ይሁዳ ሃርያ፥ ሳላትያላ ናኣ፥ ዛሩባበላስ፥ ካህነ ሀላቃ ግድዳ እዮሳደቃ ናኣ፥ እያሱስነ ድኤተፈ ስምዳ አሳስ ሀይሳዳ ያጋዳ ኦዳ: 3ሀ ፆሳ ኬ ካሰ ቦንቾይ አይ መለኮ በእዳ አሳፐ ህንተ ግዶን አትዳ አስ ደኢ? ሀች ህንተ በእያ ዎደ አይ ዳኒ? ህንተ አይፍያ ስንን ባይናባ ዳነኔ? 4ግዶሽን፥ ዛሩባበላ፥ ሀእ ምና! ካህነ ሀላቃ ግድዳ እዮሳደቃ ናአዉ፥ እያሱ ምና! ቢታን ደእያ አሳዉ ህንተ ምንድ ኦተ! ታኒ ህንተራ ደአይስ። ታኒ ኡባፈ ዎልቃማ ጎዳይ ሀይሳ ኦዳይስ። 5ህንተ ግብፀፈ ከይያ ዎደ ታኒ ህንተራ ግዳና ጋዳ ጫቅዳይሳዳ ታ አያናይ ህንተራ ደእያ ግሾ ያዮፍተ!” ያግስ።

6ኡባፈ ዎልቃማ ጎዳይ፥ “ታኒ ቃን ዎደን እስ ቶሆ ጉጃዳ ሳሎታነ ሳኣ፥ አባነ ቢታ ቃና። 7ካዎተታ ኡባ ቃዳ ካዎተታ ኡባን ደእያ ሻሎይ ሃ ያና መላ ኦና። ሀ ፆሳ ኬ ቦንቾን ኩንና። 8ብራይ ታባ፤ ዎርቃይ ታባ። 9ኮይሮ ቦንቹዋፈ ሀ ናምአን ፆሳ ኬ ቦንቾይ አና። ታኒ ኡባፈ ዎልቃማ ጎዳይ ሀ በሳን ሳሮተ እማና ያጋዳ ኦዳ” ያግስ።

ሀንቆነ አንጆ

10ዳርዮስ ካዎትዳ ናምአን ላይን፥ ኡዱፉን አጌናን ላታማነ ኦይዳን ጋላሳን፥ ጎዳ ቃላይ ናብያ ሀገ ባጋራ ሀይሳዳ ያግድ ይስ። 11ኡባፈ ዎልቃማ ጎዳይ፥ “ህገይ ዎይግያኮ ኤራናዉ ካህነታ ኦይቻ። 12‘እስ አስ ጌሻ አሹዋ ባ አፍላ ማጫራን ቃችድ ኤክ ብሽን፥ ሄ አፍላ ማጫራይ፥ ኡይ ዎይኮ ዎፅያ ዎይኮ ዎይንያነ ዛይትያ ዎይኮ ሀራ አይ ቆሞ ካ ቦችኮ፥ ሄ ቦሸትዳ ካይ ጌሽ ግዳናዉ ዳንዳኢ?’ ያጋዳ ኦይቻ” ያግስ።

ካህነይ ዛሪድ፥ “ጌሽ ግዳናዉ ዳንዳኤና” ያግስ።

13ሀገይ ዛሪድ፥ “አሀ ቦችድ ቱንዳ እስ አስ ሀይሳታፐ እስ ቆሞ ካ ቦችኮ ሄ ካይ ቱና ግዳኔ?” ያግድ ኦይችስ።

ካህነይ፥ “ኤ ቱናና” ያግድ ዛርስ።

14ሀገይ ዛሪድ፥ “ሀ አሳይነ ሀ ካዎተይ ታ ስንን ሄሳ መላ። ኤንቲ ኦያ ኦሶይነ ኤንቲ እምያ እሞታይ ኡባይ ሄሳ መላ ቱና” ያጌስ ጎዳይ። 15“ሀችፈ ዶምድ፥ ህንተ ቦላ ጋክዳባ አኬክተ! ጎዳ ኬ ኬፆ ዶማናፐ ካሰ፥ 16ህንተ ናምኡ ኩንታለ ካ ኤካና ግድ፥ ካ ዎዳ በሳ ብደታ፥ ሽን እስ ኩንታለ ፃላላ ደምደታ። እስ ፄቱ ልትሮ ዎይነ ኤካናዉ ዎይነ ጉምእያ ኦላ ብደታ፥ ሽን ህንተ ኦይታሙ ልትሮ ፃላላ ዎይነ ደምደታ። 17ታኒ ህንተ ኩሸ ኦሶ ኡባ ቦላ መልስያ ጫርኮ፥ ካ ሀርገነ ሻች የዳዳ ይሳስ። ሽን ህንተ ሀ ኡባን ታኮ ስምበከታ” ያጌስ ጎዳይ።

18“ሀች ጋላሳፐ፥ ሀ ኡዱፉን አጌናን ላታማነ ኦይዳን ጋላሳፐ ዶምድ አነ አኬክተ። ጎዳ ኬ ባሶይ ባሰትዳ ጋላሳፐ ዶምድ ቆፕተ። 19ሀእ ዘረስ ሀንያ ካ ህንተ ሻለን ይኮ፥ ዎይነይ፥ ባላሰይ፥ ኦሮማነይነ ሻማሆይ ሀች ጋካናዉ አይፎና እፅኮካ፥ ሀችፈ ዶማዳ ታኒ ህንተና አንጃና” ያጌስ ጎዳይ።

ዛሩባበላስ እመትዳ ኡፋይሳ ቃላ

20ሄ አጌናን ላታማነ ኦይዳን ጋላሳን ጎዳ ቃላይ ናምአን ሀገኮ ሀይሳዳ ያግስ። 21ይሁዳ ሃርያ ዛሩባበላስ ሀይሳዳ ያጋዳ ኦዳ: “ታኒ ሳሎታነ ሳኣ ቃና። 22ካዎተታ አራታ ሽራ የጋና፤ ኤንታ ዎልቃ ይሳና። ፓራ ጋረታ ኤንታ ላገይሳታራ ሽራ የጋና፤ ኤንታ ፓራት ዉራና፤ ፓራ አሳት ዎሉ ዎና። 23‘ታ አይልያዉ፥ ሳላትያላ ናአ ዛሩባበላ፥ ታኒ ኡባፈ ዎልቃማ ጎዳይ ነና ሄ ጋላስ ኤካና። ታኒ ነና ታ ምግዶ ማታመ መላ ኦና። ታኒ ነና ዶራስ’ ያጌስ” ያጋዳ ኦዳ።