ጌሻ ማፃፋ
መተ 43
ዮሰፋ እሻት ናምአን ግብፀን
ካናነ ቢታን ኮሻይ ሀእካ ካሰይሳፈ አድ ዎልቃምስ። ያንን፥ ኤንቲ ግብፀፈ ኤህዳ ካ ኡባ ምድ ኦንግን፥ ኤንታ አዋይ፥ “ቃስካ ግብፀ ብድ ኑስ ጉ ካ ሻምተ” ያግስ።
ሽን ይሁድ፥ “ሄ ኡራይ ኑና፥ ‘ህንተ እሻይ ህንተራ ዮና እፅኮ፥ ታ ሶምኡዋ ዛር በኤከታ’ ያግድ ምንድ ኦድስ። ኔኒ ኑ እሻ ኑራ የድኮ፥ ኑኒ ግብፀ ብድ ነዉ ካ ሻማና። ሽን ሄ ኡራይ፥ ‘ህንተ እሻይ ህንተራ ዮና እፅኮ ህንተ ታ ሶምኡዋ ዛር በኤከታ’ ” ያግዳ ግሾ፥ ኔኒ እያ የዶናባ ግድኮ ኑኒ ቦኮ።
ያትን እስራኤለይ፥ “ህንተ፥ ‘ኑስ ሀራ እሽ ደኤስ’ ግድ ኦድድ ሀ መቱዋ ታ ቦላ አይስ ኤህደቲ?” ያግስ።
ኤንቲ ዛሪድ፥ “ሄ ኡራይ ኑባነ ኑ ሶ አሳባ ምንድ ኦይችስ። እ ኑኮ፥ ‘ህንተ አዋይ ፓፃ ደኢ? ህንተዉ ሀራ እሽ ደኢ?’ ያግድ ኦይችስ። ኑኒ እ ኦይችዳይሳ እያዉ ዛርዳ። እ ኑና፥ ‘ህንተ እሻ ኤክ ዪተ’ ጋናባ ኑ አዉደ ኤርዶ?” ያግዶሶና።
ይሁድ ባ አዋ እስራኤለኮ፥ “ኑኒ፥ ኔንነ ኑ ናይት ኮሻን ሀይቃናፐ ናኣ ታራ የዳ፥ ኑኒ ባና። ናአ ታ ዋሰተን እማ፤ እያባ ታና ኦይቻ። ታኒ እያ ነዉ ሳሮ ዛራዳ ኤሆና እፅኮ፥ ታ ደኦ ኡባን ነ ባደይ ታና ጋኮ። ኑ ጋምኦናባ ግድያኮ፥ ሀኖደ ናምአን ያ ስማና ሽን” ያግስ።
ኤንታ አዋይ እስራኤለይ፥ “ሄሳ ግድኮ ሃረይሳስ ኩሸ ገንያባ፥ ሀ ቢታን ካፅያባ ኡባፈ ሎኦባ ዶርተ። ሄስካ፥ ቅባተ፥ ሽቶ፥ ዱማ ዱማ ሳዎ፥ ኤስነ፥ ኦቾሎነ ህንተ ኦጎሩዋን የግድ፥ ኤክድ ቢተ። ህንተ ኦጎሩዋ ዶናን ስምዳ ሚሸይ ባለትዳባ ግዳናዉ ዳንዳእያ ግሾ፥ ሚሽያ ናምኡ ኩሸ ኦድ ኤክ ቢተ። ህንተ እሻ ኤክድ፥ ሄ ኡራኮ ኤለስድ ጉየ ቢተ። እ ሀንኮ ህንተ እሻነ ብንያመ ህንተራ የዳና መላ ኡባ ዳንዳእያ ፆሳይ ሄ ኡራይ ህንተዉ ቃታናዳ ኦ። ታና ግድኮ፥ ታ ናይታፐ መላ አትኮካ አታስ” ያግስ።
ሄሳ ግሾ፥ እሻንት ዎላ ባንታ እምያባታ፥ ናምኡ ኩሸ ሚሽያነ ብንያመ ባንታራ ኤክድ ብዶሶና። ኤንቲ ግብፀ ጋክድ፥ ዮሰፋ ስን ሺቅዶሶና። ዮሰፍ ብንያመ ኤንታራ በእዳ ዎደ ባ ኬ ካፑዋኮ፥ “ሀ አሳታ ታ ሶ ኤካዳ ባ። እስ መሄ ሹካዳ ጊግሳ፤ ኤንቲ ካ ታራ ማና” ያግድ ኪትስ።
ያትን ካፖይ፥ ዮሰፍ ኪትዳይሳዳ ሄ አሳታ እያ ሶ ኤፍስ። ኤንቲ ዮሰፋ ሶ ብሸ፥ ያይድ፥ “ኤንቲ ኑና ሀይሳ ኤህዳይ ኮይሮ ኑ ኦጎሩዋን ስምዳ ሚሽያ ግሾ ግዶና አገና። ኤንቲ ኑና ቆህድ አይለተን ሃሮናነ ኑ ሀረታ ኤኮና አጎኮና” ያግ ህርግዶሶና።
ሄሳ ግሾ፥ ኤንቲ ዮሰፋ ሶ ፐንገ ጋክድ፥ ኬ ካፑዋ ኦድስዶሶና። “ጎዳዉ፥ ኑኒ ኮይሮ ካ ሻማናዉ ሀይሳ ይዳ። ጉየ ስምሸ ኑኒ ቃማ አቅያ በሳን ኦጎሩዋ ብልያ ዎደ ሁጰን ሁጰን ኑ ሚሸይ ፓጮና ኑ ኦጎሩዋን ደኤይሳ ደምዳ። ሄኮ፥ ኑኒ ሄ ሚሽያ ጉየ ኤክ ይዳ። ሀእ ኑኒ ካ ሻማናዉ ሀራ ሚሸ ኦይክ ይዳ። ኑ ሚሽያ ኑ ኦጎሩዋን ኦን የግዳኮ ኤሮኮ” ያግዶሶና።
እ ዛሪድ፥ “አይኮይ ባዋ፥ ያዮፍተ፤ ህንተ ፆሳይ፥ ህንተ አዋ ፆሳይ፥ ህንተ ኦጎሩዋን ህንተዉ ሚሸ እሚስ። ታኒ ህንተ ጭግዳ ሚሽያ ኩመ ኤካስ” ያግስ። ሄሳፈ ጉየ፥ ስሞና ኤንታኮ ከስስ።
ሄ ኡራይ ሄ አሳታ ዮሰፋ ሶ ኤፍድ፥ ኤንታ ቶሁዋስ ሃ ኤህን፥ ኤንቲ ሜጨትዶሶና። ኤንታ ሀረታስካ ምያባ የግስ። ኤንቲ ዮሰፋራ ካ ማናይሳ ስእዳ ግሾ ባንታ እማናባታ ዮሰፋስ ጊግስዶሶና።
ዮሰፍ ባ ሶ ገልዳ ዎደ ኤንቲ ኤህዳ ባንታ እምያባታ እያዉ እምድ፥ እያ ስንን ሳአ ጋክድ ዝግዶሶና። እ ኤንታ ሳሮተ ኦይች ስሚድ፥ “ህንተ ታዉ ኦድዳ ህንተ ጭምዳ አዋይ ሎኦ ደኢ? ሀእካ እ ፓፃ ደኢ?” ያግስ።
ኤንቲ፥ “ኤ፥ ነ አይለይ፥ ኑ አዋይ ፓፃ ደኤስ፤ እ ሎኦ” ያግድ፥ ሆክድ እያዉ ዝግዶሶና።
እ ባ አየ ናኣ ብንያመ በእዳ ዎደ ኤንታኮ፥ “ህንተ ኦድዳ ዉርሰ ህንተ እሻይ ሀይሴ?” ያግስ። ብንያመ፥ “ታ ናአዉ፥ ነና ፆሳይ አንጆ” ያግስ። ዮሰፍ፥ እያ እሻባይ እያዉ ጎምፓን ሴልዳ ግሾ፥ ኤለስድ፥ ቆልአ ገልድ ያን ዬክስ።
እ ባ ሶምኡዋ ሜጨትዳፐ ጉየ ከይድ ባና ምንድ፥ ካ አና መላ ኪትስ።
ኤንቲ ዮሰፋስ ዱማ፥ እያ እሻታስ ዱማ አዶሶና። ግብፀ አሳይ እብራወ አሳታራ እስፈ መይስ ባንታና ካዉሽያባ ኦ ፄልያ ግሾ እያራ ምያ ግብፀ አሳታስ ዱማ አዶሶና። ኤንቲ ዮሰፋ ስንን ባይራይ ባ ባይራተን፥ ካሎይ ባ ካሎተን ማራን ኡትዶሶና። ኤንቲ እሶይ እሱዋ ፄልድ፥ ኤንታ ዋትድ ኡትስዳኮ በእድ ማላለትዶሶና። ዮሰፋ ጋይታፐ ኤንታዉ ቁም ግሸቴስ፥ ሽን ብንያመስ ሀራታፐ አድ እቻሹ ኩሸ እሚስ። ያንድ፥ ኤንቲ ዮሰፋራ ምድ ኡይድ ኡፋይትዶሶና።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.