ጌሻ ማፃፋ
መተ 37
ዮሰፋነ እያ እሻታ
ያይቆብ እያ አዋይ ይሳቅ ደእዳ ካናነ ቢታን ደእስ።
ያይቆባ የለተ ታርከይ ሀይሳፈ ካልድ ፃፈትዳይሳ።
ዮሰፍ ታማነ ላፑን ላይ ናአ ግድዳ ዎደ ባ አዋ ማቸታፐ፥ ባልፐነ ዝልፓፈ የለትዳ ባ እሻታራ መሄ ሄሜስ። እ ባ አዋስ ባ እሻት ኦዳ ኢታባታ ኦዴስ።
እስራኤለይ ዮሰፋ ጭምድ የልዳ ግሾ፥ ባ ሀራ አደ ናይታ ኡባፈ አድ ዶሴስ። ሄሳ ግሾ፥ እያዉ አሌቀትዳ ማኦ ጊግስስ። እያ እሻት ኤንታ አዋይ እያ ኤንታፈ አድ ዶሰይሳ በእዳ ዎደ እያ እፅዶሶና። ማልኦ ቃላካ እያኮ ኦደታናዉ ዳንዳእቦኮና።
እስ ዎደ ዮሰፍ አሙሆ አሙህድ፥ ባ እሻታስ ኦድን ኤንቲ እያ ካሰይሳፈ አድ እፅዶሶና። እ ኤንታኮ፥ “ታኒ አሙህዳ አሙሁዋ ስእተ። ኑኒ ጋደን ግስተ ምርቅሽን ታ ምርቀይ ደንድድ ሉለ ኤቅስ። ህንተ ምርቀት ዩይ አድ ታ ምርቅያስ ዝግዶሶና” ያግስ።
እያ እሻት፥ “ኔኒ ኑ ቦላ ካዎታዳ ኑና ሃራናዉ ቆፓይ?” ያግድ ኦይችዶሶና። ኤንቲ እያ አሙሁዋ ግሾነ እያ ኦዳ ግሾ፥ ካሰይሳፈ አድ እፅዶሶና።
ቃስካ ዮሰፍ ሀራ አሙሆ አሙህድ ባ እሻታስ ኦድስ። “ሄኮ፥ ታኒ ሀራ አሙሆካ አሙሀስ። ሄ አሙሁዋን አው፥ አጌንነ ታማነ እስ ፆልንቶት ታዉ ዝጎሶና” ያግስ።
ባ እሻታስ ኦድዳ አሙሁዋ ባ አዋስ ኦድዳ ዎደ እያ አዋይ፥ “ሀይስ ዋንዳ አሙሆ? ቱማ ታኒ፥ ነ አያነ ነ እሻት ይድ፥ ነ ስንን ዝጋነዬ?” ያግድ ሀንቀትስ። እያ እሻት እያ ቃናትዶሶና፥ ሽን እያ አዋይ ሄ ኦዳ ባ ዎዛናን ዎስ።
ዮሰፋ ባይዘተ
እስ ጋላስ እያ እሻት ሴከማን ባንታ አዋ መሄታ ሄማናዉ ብዶሶና። እስራኤለይ ዮሰፋ፥ “ነ እሻት ሴከማን መሄታ ሄመይሳ ኤራሳ። ሃያ፥ ታኒ ነና ኤንታኮ ኪታና” ያግስ።
ዮሰፍካ፥ “ኤሮ” ያግስ።
እ እያኮ፥ “ባዳ ነ እሻትነ መሄይ ሳሮ ግደይሳ በአዳ ኤንታባ ታዉ ያዳ ኦዳ” ያግድ ዮሰፋ ከብሮና ዛንጋራፐ ኪትስ።
ዮሰፍ ኪተትድ ሴከማ ብስ። ያን ደምባ በሳን ኤንታ ኮሻን ያ ሃ ስመረትሽን፥ እስ አስ እያ ደምድ፥ “ላ ናአዉ፥ አይ ኮያይ?” ያግድ ኦይችስ።
እ፥ “ታ እሻታ ኮያይስ፤ ኤንቲ መህያ ሄምያ በሳ በእዳኮ፥ ሀያና ታዉ ኦዳርኪ” ያግስ።
ኡራይ፥ “ሀይሳፈ ብዶሶና፤ ኤንቲ፥ ‘ኑኒ ዶታነ ባና’ ግሽን ስአስ” ያግስ። ሄሳ ግሾ፥ ዮሰፍ ባ እሻታ ጌዶ ካል ብድ፥ ኤንታ ዶታነን ደምስ።
ሽን እ ሃሆን ደእሽን፥ ኤንቲ እያ በእዶሶና። እ ኤንታኮ ጋኮና ደእሽን፥ ኤንቲ እያ ዎናዉ ማቀትዶሶና። ኤንቲ እሶይ እሱዋኮ፥ “ህን በእተ፥ አሙሁዋ ጎዳይ ዬስ። ሃይተ፥ እያ ዎድ፥ ሀ ኦላታፐ እሱዋን የጎስ። ሄሳፈ ጉየ፥ ‘ዶእ እያ ምስ’ ያጋና። ያትድ፥ እያ አሙሁዋ ዉርሰ በአና” ያግዶሶና።
ሮቤል ሄሳ ስእዳ ዎደ፥ ኤንታ ኩሸፐ እያ አሻናዉ ኮይድ፥ “እያ ዎኮ፤ እያ ዎናፐ መላ ቢታን ደእያ ሀ ኦላን የግተ፤ እያ ቦላ ኩሸ ዎፍተ” ያግስ። ሮቤል ሄሳ ግዳይ፥ እያ ኤንታ ኩሸፐ አሽድ ጉየ አዋኮ ዛራናሳ።
ዮሰፍ ባ እሻታኮ ጋክዳ ዎደ እ ማእዳ አሌቀትዳ ማኡዋ እያፐ ቃር ኤክዶሶና። እያ ኤፍድ ሃ ባይና መላ ኦላን የግዶሶና።
ኤንቲ ካ ምሽን ሀሳዮና እስማኤላ አሳት ጋላዳፐ ግብፀ ብሽን፥ ቁ ግድ በእዶሶና። ኤንቲ ባንታ ግማለታ ቦላ ሳዉዋ፥ ማድያነ ካርብያ ጫንዶሶና።
ይሁድ ባ እሻታ፥ “ኑኒ ኑ እሻ ዎድ፥ እያ ሱ ቆትኮ ኑና አይ ማዳኔ? ሃይተ፥ እያ እስማኤላ አሳስ ባይዞስ። እ ኑ እሻ፥ ኑ ሱነ ኑ አሾ ግድያ ግሾ እያ ቦላ ኑ ኩሽያ ዎኮ” ያግስ። እያ እሻት እያ ኦዳ ማእዶሶና። ሄሳ ግሾ፥ ምድያመ ቢታ ዛልአንቾት ያራ አሽን፥ እያ እሻት ዮሰፋ ኦላፈ ከስድ፥ እስማኤላ አሳታስ ላታሙ ብራ ሳንትመን ባይዝዶሶና። ኤንቲ ዮሰፋ ግብፀ ቢታ ኤፍዶሶና።
ሮቤል ኦላኮ ስሚድ፥ ዮሰፍ ያን ባይናይሳ በእዳ ዎደ፥ አዛንድ ባ ማኡዋ ዳክስ። እ ጉየ ባ እሻታኮ ብድ፥ “ናአይ ያን ባዋ፤ ህዛ፥ ታኒ አይ ሀኖሻ?” ያግስ።
ኤንቲ ዮሰፋ ማኡዋ ኤክድ፥ እስ ዴሸ ሹክድ፥ ሄ ሱን ናቅዶሶና። አሌቀትዳ እያ ማኡዋ ባንታ አዋኮ ኤፍድ “ኑኒ ሀይሳ ደምዳ፤ ሀይስ ነ ናአ ማኡዋኮነ አነ በአ” ያግዶሶና።
ያይቆብ ማኡዋ ኤርድ፥ “ሀይስ ታ ናኣ ማኡዋ፤ ታ ናኣ ዶእ ምስ። ዮሰፍ ቱማካ ዛዘትስ” ያግስ።
ያይቆብ አዛንድ፥ ባ ማኡዋ ፔስ። ካዮ ማኦ ማእድ፥ ባ ናኣስ ዳሮ ጋላስ ዬክስ። እያ አደ ናይትነ ማጫ ናይት ኡባይ እያ ምንናዉ ይዶሶና። ሽን እ ምነቶና እፅድ፥ “አካይ፥ ታኒ ዬሆይ ዬሆሽን ዱፎ ገላና” ያግድ፥ ዮሰፋስ ዬክስ።
ሄ ዎደ ምድያመ ቢታ አሳት ዮሰፋ፥ ግብፀ ካዋ ሞርናታነ ካዋ ናገይሳታ ሀላቃ ግድዳ ጶፅፋራስ ባይዝዶሶና።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.