ጌሻ ማፃፋ
መተ 25
አብራሃመ ሀይቁዋ
አብራሃመይ ኬፁራ ጌተትያ ሀራ ማቾ ኤክስ። እያ ዝምራና፥ ዮቅሳና፥ ማዳነ፥ ምድያመ፥ ያስቦቃነ ስዋ እያዉ የላሱ።
ዮቅሳን ሳባነ ደዳና የልስ። ደዳን አሾረታ፥ ለፁሰታነ ለኡማታ የልስ።
ምድያመ ናይት ገፈራ፥ ኤፈራ፥ ሄኖሀ፥ አብዳነ ኤልዳ። ሀይሳቲ ኡባይ ኬፁራ ሼሻታ።
አብራሃመይ ባባ ኡባ ይሳቃ ላትስስ። ሽን እ ፓፃ ደእሸ፥ ሀራ ማቸታፐ የልዳ ናይታ ባዉ ደእያባፐ ዎይትስ። ባ ናአ ይሳቃፐ ኤንታ ሻክድ፥ ዶሎሀ ባጋ ቢታ የድስ።
አብራሃመይ ኩመ እስ ፄታነ ላፑን ታማነ እቻሹ ላይ ደእስ። አብራሃመይ ዳሮ ዎደ ደእድ፥ ሎኦ ጭምድ፥ ሀይቅድ ባ ማይዛታን ጋሄትስ። እያ ናይት ይሳቅነ እስማኤል እያ ማክፌላ ጌተትያ ጎንጎሎ ዱፉዋን ሞግዶሶና፤ ሄ ጎንጎሎይ ማምረ ማታን፥ ህተ አድያ ፆሃራ ናአ ኤፍሮና ጋድያን ደኤስ። ሄስ አብራሃመይ ህተታፐ ሻምዳ ጋድያ። አብራሃመይ ባ ማችያ ሳራ ሞገትዳ ዱፉዋን ሞገትስ። አብራሃመይ ሀይቅዳፐ ጉየ፥ ፆሳይ እያ ናአ ይሳቃ አንጅስ። ሄ ዎደ ይሳቅ፥ ቤር-ላይ-ሮእ (ታና በእያ ደኦ ፆሳ ፑልቶ) ጌተትያ ፑልቱዋ ማታን ደኤስ።
እስማኤላነ እያ ናይታ
ሳራ አይልያ፥ ግብፀፈ ይዳ አጋራ፥ አብራሃመስ የልዳ ናአ እስማኤላ የለተይ ሀይሳፈ ካልድ ፃፈትዳይሳ። እስማኤላ ናይት ባንታ ሱንንነ ባንታ የለታ ማራን ሀይሳታ፤ ኤንትካ፥ ናባዮታ፥ ቀዳረ፥ አድቤላ፥ ምብሳማ፥ ምስማ፥ ዱማ፥ ማሳ፥ ኩዳነ፥ ቴማ፥ እፁራ፥ ናፍሳነ ቀድማ። እስማኤላ ናይት ሀይሳታ፤ ኤንታ ሱንይ ኤንታ ሞንነ ደእያ በሳን ሀይሳ። ኤንቲ ባንታ ያራንካ ታማነ ናምኡ ሀላቃታ። እስማኤል ኩመ ፄታነ ሀስታማነ ላፑን ላይ ደእድ፥ ሀይቅድ ባ ማይዛታን ጋሄትስ። እስማኤላ ኮቸት ግብፀፈ ዶሎሀ ባጋን ደእያ ሀውላፐነ ሱራፐ ግዱዋን፥ አሶረ ኤፍያ ኦግያ ማታን ደእዶሶና። ኤንቲ ባንታ እሻታ ኡባራ ሞርከተን ደእዶሶና።
ያይቆባነ ኤሳዌ
አብራሃመ ናአ ይሳቃ የለተይ ሀይሳፈ ካልድ ፃፈትዳይሳ፤ አብራሃመይ ይሳቃ የልስ። ይሳቃስ ላይ ኦይታማ ግድን፥ እርብቃ ኤክስ፤ እያ ማሰጰፆመን ደእያ አራመ አድያ ባቱኤላ ናእዉነ ላባ ምችዉ። ይሳቅ ባ ማችያ ማይን ግድዳ ግሾ፥ እዉ ጎዳ ዎስስ፤ ጎዳይ እያ ዎሳ ስእስ። ያትን እያ ማችያ እርብቃ ቃንታሱ። ሽን እ ኡሎን ደእያ ናይት መንተ ግድ ኡትድ፥ እሶይ እሱዋራ ሱገትዶሶና፤ እያ፥ “ሀይስ ታዉ አይስ ሀኒ?” ያጋሱ። ሄሳ ግሾ፥ ጎዳ ኦይቻናዉ ባሱ።
ጎዳይ እዮ፥ “ነ ኡሎን ናምኡ ካዎተ ደኤስ፤ ቃስ ነ ግዶን ደእያ ናምኡ ደረ አሳት እሶይ እሱዋፈ ሻከታና፤ እስ ደረ አሳት ሀንኮታፐ ምናና፤ ቃስ ባይራይ ካሉዋስ ኪተታና” ያግስ።
እው የሎ ዎደይ ጋክን፥ እ ኡሎን መንተ አደ ናይት ደኦሶና። ኮይሮ የለትዳይስ አርሰ፤ እያ ቦላ ኡባ እክሰይ ማእስ፤ ሄሳ ግሾ፥ ኤንቲ እያ ኤሳዌ (እክሳማ) ግድ ሱንዶሶና። ሄሳፈ ጉየ፥ እያ እሻይ የለትስ። እ ባ ኩሽያን ኤሳዌ ግንድያ ኦይክድ ከይስ፥ ሄሳ ግሾ፥ እያ ያይቆባ (ግንደ ኦይከይሳ) ግድ ሱንዶሶና። እርብቃ ኤንታ የልዳ ዎደ ይሳቃስ ኡሱፑን ታሙ ላይ ግድስ።
ናይት ድጭዶሶና፤ ኤሳዌይ ሻንካ ሂላ ኤርያ ባዞ አሰ ግድስ። ሽን ያይቆብ ዱንካነን ደእያ ዎፓ አሰ ግድስ። ይሳቅ ኤሳዌ ዶስስ፤ አይስ ጊኮ፥ እ ሻንካተይሳፈ ማናዉ ዶሴስ፤ ሽን እርብቃ ያይቆባ ዶሳዉሱ።
እስ ዎደ ያይቆብ ዎፀ ካሽን፥ ኤሳዌይ ኮሽ ዎን ባዞፈ ይስ። ኤሳዌይ ያይቆባ፥ “ታና ሀ ዞኦ ዎፅያፐ ሙዛ፥ ታና ኮሽ ዎስ” ያግስ። (ሄሳ ግሾ፥ ቃስ እያ ሱንይ ኤዶመ (ዞኦ) ጌተትስ)።
ያይቆብ እያ፥ “ኮይሮ ታዉ ነ ባይራተ ባይዛ” ያግስ።
ያትን ኤሳዌይ፥ “ሄኮ፥ ታኒ ሀይቃና ሀናይስ፥ ሀ ባይራተይ ታና አይ ማዲ?” ያግስ።
ያይቆብ ዛሪድ፥ “አነ ታዉ ኮይሮ ጫቃ” ያግስ። እ ጫቅስ፥ ባ ባይራተ ያይቆባስ ባይዝስ። ያይቆብ ኤሳዌስ ኡይነ ምስረ ዎፀ እምን ምስ ኡይስ። ሄሳፈ ጉየ ደንድድ ብስ። ኤሳዌይ ባ ባይራተ ሀይሳዳ ካስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.