ጌሻ ማፃፋ
መተ 11
ባብሎነ ግምበ
ሳአ ቦላ ደእያ አስ ኡባይ ኮይሮ እስ ዶናን ኦደቴስ። ኤንቲ ዶሎሀ ባጋፈ ደንድድ ብዳ ዎደ ሳናኦራ ቢታን ደምባ በሲ ደምድ ያን ኡትዶሶና።
ኤንቲ እሶይ እሱዋኮ፥ “ሃ ዪተ፥ ፁበ መድ፥ ምናና መላ ታማን ፁጎስ” ያግዶሶና። ኤንቲ ሹቻ ግሾ ፁበ፥ ኡርቃ ግሾ ማደ መላባ፥ ኤክድ፥ “ሃ ዪተ፥ ኑ ሱን ፄግሳናዉነ ቃስ ኑኒ ሀ ሳአ ቦላ ላለቶና አታና መላ እስ ግታ ካታማነ ፄራይ ሳሎ ጋክያ ፖቀ ኬፆስ” ያግዶሶና።
ሽን ጎዳይ አሳት ኬፅዳ ግታ ካታማነ ፖቅያ በአናዉ ዱገ ዎስ። ጎዳይ ሀይሳዳ ያግስ፤ “ሄኮ፥ ኤንቲ እስ አስ፤ ኤንቲ ኡባይካ እስ ዶናን ኦደትዶሶና። ኤንቲ ሀእ ሀይሳ ኦናዉ ዶምዶሶና። ኤንቲ ባንታዉ ኦናዉ ሀልችዳባ ፖሎና አጎኮና። ያንያ ግሾ፥ ሃይተ፤ ዱገ ዎድ ኤንቲ እሶይ ሃሳይያ ዶና እሶይ ኤሮና መላ ኤንታ ዶና ዱማዮስ” ያግስ። ጎዳይ ኤንታ ሄሳፈ ሳአ ኡባ ቦላ ላልን፥ ኤንቲ ካታማ ኬፀይሳ አጋግዶሶና። ጎዳይ ሳአን ደእያ አሳ ዶና ያን ቡቅዳ ግሾ ሄ ካታማ ሱንይ ባብሎነ1 ጌተትስ። ጎዳይ ኤንታ ሄሳፈ ሳአ ኡባ ቦላ ላልስ።
ሴማ የለተ
ሴማ የለተይ ሀይሳፈ ካልድ ፃፈትዳይሳ፤ ዮ ሃፈ ጉየ፥ ናምኡ ላይ ግድን፥ ሴማስ ላይ ፄታ ግድዳ ዎደ፥ ሴም አርፋክሳደ የልስ። ሴም አርፋክሳደ የልዳፐ ጉየ፥ እቻሹ ፄቱ ላይ ደእስ። ሀራ አደ ናይታነ ማጫ ናይታ የልስ።
አርፋክሳድ 35 ላይ ደእድ፥ ሳላሀ የልስ። አርፋክሳድ ሳላ የልዳፐ ጉየ፥ 403 ላይ ደእስ። ሀራ አደ ናይታነ ማጫ ናይታ የልስ።
ሳል 30 ላይ ደእድ፥ ኤቦራ የልስ። ሳል ኤቦራ የልዳፐ ጉየ፥ 403 ላይ ደእስ። ሀራ አደ ናይታነ ማጫ ናይታ የልስ።
ኤቦሪ 34 ላይ ደእድ፥ ፐለጋ የልስ። ኤቦሪ ፐለጋ የልዳፐ ጉየ፥ 430 ላይ ደእስ። ሀራ አደ ናይታነ ማጫ ናይታ የልስ።
ፐለግ 30 ላይ ደእድ፥ ራአ የልስ። ፐለግ ራአ የልዳፐ ጉየ 209 ላይ ደእስ። ሀራ አደ ናይታነ ማጫ ናይታ የልስ።
ራእ 32 ላይ ደእድ፥ ሳሩጋ የልስ። ራእ ሳሩጋ የልዳፐ ጉየ፥ 207 ላይ ደእስ። ሀራ አደ ናይታነ ማጫ ናይታ የልስ።
ሳሩግ 30 ላይ ደእድ፥ ናኮራ የልስ። ሳሩግ ናኮራ የልዳፐ ጉየ፥ 200 ላይ ደእስ። ሀራ አደ ናይታነ ማጫ ናይታ የልስ።
ናኮር 29 ላይ ደእድ፥ ታራ የልስ። ናኮር ታራ የልዳፐ ጉየ፥ 119 ላይ ደእስ። ሀራ አደ ናይታነ ማጫ ናይታ የልስ።
ታር 70 ላይ ደእድ፥ አብራመ፥ ናኮራነ ሃራነ የልስ።
ታራ የለተ
ታራ የለተይ ሀይሳፈ ካልድ ፃፈትዳይሳ፤ ታሪ አብራመ፥ ናኮራነ ሃራነ የልስ። ያትን ሀራን ሎፀ የልስ። ሀራን ባ አዋይ ታሪ ፓፃ ደእሽን፥ ባ የለትዳ ካልዳወታ ቢታን፥ ግታ ኡረ ካታማን ሀይቅስ። አብራመይነ ናኮረይ ናምአይካ ማችዶሶና። አብራመ ማቸ ሱንይ ሶራ። ቃስ ናኮራ ማቸ ሱንይ ምልኮ። ምልካ ሃራና ናእዉ፤ ሃራነይ ምልካነ ዮስካ አዋ። ሶራ ማይን ግድዳ ግሾ እዉ ናእ ባዋ።
ታር ባ ናኣ አብራመ፥ ባ ናኣ ሃራነ ናኣ ሎፀነ፥ ባ ናኣ አብራመ ማችዉ ሶራ ኤክድ፥ ካናነ ቢታ ባናዉ ካልዳወታ ካታማ ኡረፐ ደንድስ። ሽን ኤንቲ ካራነ ካታማ ጋክድ ያን ኡትዶሶና። ታር 205 ላይ ደእድ ካራነን ሀይቅስ።
Source notes (1)
- Footnote ባብሎነ፦ እብራወ ዶናን ሀ ሱን ብርሸይ “ዋላከትስ” ጉሱ
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.