ጌሻ ማፃፋ
አስትሮ 2
አስትራ ካዎ ማቾ ግዳሱ
ሄሳፈ ጉየ፥ ካዋ አርፀክስሳ ሀንቆይ ዶችን፥ ካውያ አስፂና ኦዳባነ እ ቦላ ከይዳ አዋጁዋባ ቆፕስ። ሄ ዎደ ካዋ ማታን ሀጋዝያ ናአተታ አደት ሀይሳዳ ያግዶሶና፤ “ማላ ሎኦ ጌላኦታ ኮይድ፥ ካዋስ ኤሀና መላ፥ ነ ካዎተ ግዶን ደእያ ቢታ ኡባን ሀላቃታ ሹማ። ኤንቲ ማላ ሎኦ ጌላኦ ዶርድ፥ ሱሳ ካታማ ኤህድ፥ ማጫሳስ ጊግዳ ኬን ዎ። ያን ሄ ማጫሳ ኬስ ካፖ ግድዳ ካዎ ሹፋ ሄጋያ ኩሸን ኤንቲ ደእሽን፥ ኤንታ ማላ ሎይያባ ኡባይ ኤንታዉ እመቶ። ሄሳፈ ጉየ፥ ኡባፈ አዳ ካዋ ኡፋይስያ ጌላእያ አስፂን በሳን ካዎ ማቾ ግዶ” ያግዶሶና። ሀ ዞረይ ካዋ ኡፋይስዳ ግሾ፥ ካዎይ ሄሳዳ ኦስ።
ያን ሱሳ ካታማን እስ ማርድክዮሳ ጌተትያ አይሁደ አስ ደኤስ። እ ያእራ ናአ፤ ያእር ሳመአ ናአ፤ ሳመእ ብንያመ ኮቸ ግድዳ ቂሳ ናአ። ባብሎነ ካዎይ ናቡካዳናፆር ይሁዳ ካዋ ዮአክናነ ሀራ አይሁደ አሳ ኦላን ድእድ ኤፍዳ ዎደ ማርድክዮስ ኤንታራ ብስ። እ ባ አዋ እሻ ናእዉ፥ እብራወ ዶናን ሀዳሶ ጌተትያ አስትሮ ባራ ዎድ ድቼስ። አስትራ መንነ ጌሳን ዳሮ ማላ ሎኦ። እ አዋይነ አይያ ሀይቅዳፐ ጉየ፥ ማርድክዮስ እዮ ኤፍድ፥ ባ ናአ ኦድ ድችስ።
ካዎይ ከስዳ አዋጁዋነ ኪታ ማራን፥ ሱሳ ካታማ ይዳ ዶረትዳ ዳሮ ጌላኦታፐ እስንያ አስትሮ። እያ ያዳ፥ ማጫሳስ ጊግዳ ኬ ካፖ ግድዳ ሄጋ አዋተ ጋርሳን ደአሱ። ሄግ አስትሮ በእዳ ዎደ እን ዳሮ ኡፋይትስ፤ እዮ ዱማ ፄልስ። ኤለስድ ማናዉ ዱማ ካነ ቦላ ትየትያባ እዉ እሚስ። ቃስ እዮ ማታን ሀጋዛና መላ ካዎ ጋፐ ዶረትዳ ላፑን ናአተ፥ ማጫሳታ ጊግዳ ኬን፥ ክፍለ ኡባፈ አድ ሎእያ ክፍለን እዮነ ኤንታና ዎስ።
ማርድክዮስ እዉ ኮይሮትድ ኦድዳይሳዳ፥ አስትራ አይሁደ አስ ግደይሳ ኦደስካ ኦዳቡኩ። ቃስ ማርድክዮስ አስትራ ዋና ደእያኮነ እዉ ሀንያባ በአናዉ፥ ማጫሳ ኬ ስንራ ጋላስ ጋላስ ገደነ ሃ ሄመቴስ።
ጌላኦት ካዋኮ ገላናፐ ኮይሮትድ፥ እስ ላይ ኩመ ባንታ ማላ ሎይሸ ጋምኦሶና። ሄስካ፥ ኮይሮ ኡሱፑን አጌና ካርበ ዛይተን ጎርፐትሸ ጋምእድ፥ ናምአን ኡሱፑን አጌና ቃስ፥ ሎኦ ሳውያ ሽቶን ጎርፐቶሶና። ሄሳፈ ጉየ፥ እስ ጌላእያ ካዋኮ ገልያ ዎደይ ጋክያ ዎደ፥ ባ ኮይዳ ማኡዋ ማአ ሎአዳ፥ ማጫሳ ኬፈ ከያዳ፥ ካዎይ ደእያ በሳ ገላዉሱ። ቃማ ገላዳ፥ ካዉዋራ አቅዳፐ ጉየ፥ ዎንታ ጉራ ከይኮ፥ ማጫሳት ደእያ ሀራ ኬ እዮ ኤፎሶና። ሄ ኬስ ካፖ ግድዳ ካዎ ሹፋይ ሻሻጋዝ እዮ ናጌስ። ካዎይ ዶስድ እ ሱን ፄግድ፥ “ኤበልቶ ኤህተ” ጎና እፅኮ፥ እያ ናምአን ካዋኮ ገላናዉ ዳንዳኡኩ።
ሄስ ሀንሽን፥ ካዋኮ ገልያ ታር አስትሮ ጋክስ። አስትራ ማርድክዮሳ አዋ እሻ አብካላ ናእዉ፤ ማርድክዮስ ባ ናአ ኦድ ድችዳሮ። እያ ማጫሳስ ጊግዳ ኬስ ካፖ ግድዳ ካዎ ሹፋ ሄጋይ ዞርዳይሳዳ ማኦ ማአሱ። እዮ በእዳ ኡባይ እ ማላ ናሽስ። አርፀክስስ ካዎትዳ ላፑን ላይን፥ ተቤታ ጌተትያ ታማን አጌናን አስትራ ካዎይ ደእያ በሳ ገላሱ።
እያ ገልዳ ዎደ፥ ካዎይ ሀራ ማጫሳ ኡባፈ አድ፥ እዮ ዶስስ፤ ቃስ ሀራ ጌላኦታ ኡባፈ እን ኡፋይትስ። ሄሳ ግሾ፥ ካዎተ ካላቻ እ ሁጰን ዎድ፥ እዮ አስፂን በሳን ካዎ ማቾ ኦስ። ሄሳፈ ጉየ፥ ካዎይ አስትር ቦንቹዋስ ግታ ግብራ ጊግስድ፥ ሀላቃታነ ቢታ አይሰይሳታ ፄግስ። ቃስ ባ ካዎተ ግዶን ኡፋይሳ ባለይ ቦንቸታና መላ አዋጅስ። ቢታ ኡባስ እስ ላይ ጊራ ማርስ። እሞታካ ባ ኬሀተ መላ ሁጰን ሁጰን እሚስ።
ማርድክዮስ ማቁዋ ላልስ
ጌላኦት ናምአን ሺቅድ ደእሽን፥ ማርድክዮስ ካዋ ዳባባን ኡትያ አሳፐ እሱዋ ግድስ። ማርድክዮስ፥ “ኔኒ አይሁደ ግደይሳ ኦደስካ ኦዶፓ” ግዳ ግሾ፥ አስትራ ሀእ ጋካናዉ ኦደስካ ኦዳቡኩ። ካሰ ናአተን ኪተተይሳዳ፥ ሀእካ እያዉ ኪተታዉሱ።
ማርድክዮስ ካዎ ኬን ኦሸ ደእያ ዎደ፥ ካዎይ ደእያ ክፍለታ ገልያ ፐንግያ ናግያ ካዎ ሹፋታፐ ናምአት፥ ጋባትነ ታር ካዋ አርፀክስሳ እፅድ፥ ዎናዉ ማቀትዶሶና። ኤንታ ማቁዋ ማርድክዮስ ስእድ፥ ካወ አስትርስ ኦድን፥ እያካ ማርድክዮሳ ሱንን ካዋስ ኦዳሱ። ካዎይ ሀንዳባ ፕልግድ ፄልያ ዎደ፥ ኦዳይ ቱማ ግድድ በንትን፥ ሄ ናምኡ አሳታ ካቅድ ዎስ። ሀ ሀኖታይ ካዋ አርፀክስሳ ታርከ ፃፍያ ማፃፋን ፃፈትስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.