ኤራታ 8

1ጭንጫ አስ ዳነይ ኦኔ?

ኡባባስ ብርሸ ኤረይ ኦኔ?

ጭንጫተ ፓሽክስድ፥ ምዳ ሶምኡዋ ፖእሴስ።

ካዎስ ኪተታ

2ካዎስ ኪተታ፤ ካሰ ኔኒ ኪተታና

ጋዳ ፆሳ ስንን ጫቃዳሳ።

3ካዋ ስንፈ ኤለሳዳ ከዮፓ፤ ካዎይ ባ ኮይዳባ ኦናዉ ዳንዳእያ ግሾ ኢታ ኦሶ ኦናዉ ደንዶፋ። 4ኡባባ ኦናዉ ካዋስ ማት ደእያ ግሾ፥ “አይስ ሀይሳ ኦዲ?” ያግድ እያ ኦይቻናዉ ዳንዳኤይ ኦኔ? 5እያ ኪታ ፖልያ አስ ቆሄተና፤ ጭንጫ አስ ልከ ዎድያነ ኦያ ኦግያ ኤሬስ። 6አሰ ዴፆ መቶይ ጋክኮካ ኡባባስ ዎደይነ ኦገይ ደኤስ። 7ስንፈ ሀናናባ ኤርያ አስ ባዋ፤ “ሀይስ ሀናና” ግድ ኦዳናዉ ዳንዳኤይ ኦኔ? 8ሸምፖይ ሻከትድ ብያ ጋላስ ኦይክድ ተቃናዉ ዳንዳእያ አስ ባዋ፤ ዎይኮ ሀይቆይ ባ ጋላሳን ዮናዳ ድጋናዉ ዳንዳእያ አስ ባዋ። ኦላ ዎደ ኦንካ ኦለትከ ጋናዉ ዳንዳኦናይሳዳ ኢታተ ኢታ ኦያ ኡራ የደና። 9ሳሎፐ ጋርሳን ሀንያባ ኡባ ታኒ አኬካዳ ቆፕያ ዎደ አስ ባዉ ደእያ ማታ ሀራ አስ ቆሀናዉ ጎኤተይሳ በአስ።

10ኢታ አሳት ቦንቾን ሞገትሽን በአስ። ኤንቲ ኢታተ ኦዳ ካታማ አሳይ ሺቅድ ኤንታ ሳቢሽን ስአስ፤ ሄስ ኡባይ ሀዳ።

11አስ ቆፕድ ኢታባ ኦያ ጋሶይ፥ ኢታባ ኦዳ አሳታ ኤለስድ ሴረይ ባይና ግሾሳ። 12ናጋራንቾይ ፄቱ ቶሆ ኢታባ ኦሽን እያ ባረይ አዱቅኮካ፥ ፆሰ ያየይሳታስነ ቦንቸይሳታስ ሳእ ሎአናይሳ ታ ኤራይስ። 13ኢታት ፆሰ ያዮና ግሾ ሳሮተ ኤንታዉ ባዋ፤ ኤንቲ ፆሰ ያዮና ግሾ ኤንታ ባረይ ኩያዳ ቃማና።

አስ ፆሳ ኦገ ኤረና

14ሀ ሳአን ኦሰትያ ሀራ ሀዳባይ ደኤስ። ሄስካ፥ ጌሻ አሳት፥ ናጋራንቾት ኤካናዉ በሲያ ሴራ ኤክያ ዎደ ናጋራንቾት ጌሻት ኤካናዉ በሲያ ሎኦባ ኤከይሳ፤ ሄስ ኡባይ ሀዳ። 15አስ ምያባፐ፥ ኡያባፐነ ባና ኡፋይስያባፐ አድ ሎኦባይ ሳሎፐ ጋርሳን ሀር ባይና ግሾ፥ አስ ባ ደኦን ኡፋይትኮ ሎኦ ጋስ። ፆሲ እያዉ እምዳ ላይን እ ዳቡርድ ደምዳባን ኡፋይታናዉ ዳንዳኤስ።

16ታኒ ጭንጫተ አይበኮ ኤራናዉነ አስ ሀ ሳአ ቦላ ዳቡርያ ዳቡራ አኬካናዉ ሀልቻስ፤ ዉርሰን አስ ስኮ ይድ ኦያ ኦሶይ ደኤይሳ በአስ። 17ታኒ ፆሲ ኦዳባ ኡባ በአስ። ሳሎፐ ጋርሳን ኦሰትዳ ኦሶ አስ ፕልግድ ኤራናዉ ዳንዳኦናይሳ ኤራስ። አስ አይ መላ ዳቡርድ ፕልግ ፄልኮካ፥ እያ ብርሸ ኤራናዉ ዳንዳኤና። ቃስ ጭንጫ አስ ሀይሳ ኤራይስ ጋናዉ ዳንዳኤና።