ዳነላ 7

ኦይዱ ዶአታ ቆንጨ

1ባብሎነ ካዎይ ብልፃሶር ካዎትዳ ኮይሮ ላይን፥ ዳነል ባ አርሳን ዝንእድ፥ አሙሆነ ቆንጨ በእስ። ባ አሙሁዋን በእዳ አይፈ ቆፋታ ፃፍስ።

2ዳነል ሀይሳዳ ያግስ፦ “ሳሎፐ ይዳ ኦይዱ ጫርኮት ግታ አባ ቡቅሽን ታ ቃማ ቆንጨን በአስ። 3እሶይ እሱዋፈ ዱማ ግድዳ ኦይዱ ግታ ዶአት አባፈ ከይዶሶና።1

4“ኮይሮ ዶአይ ጋሞ ዳኔስ፤ እያዉ አርጋን ቀፈይ ደኤስ። ታ በእሽን፥ እያ ቀፈይ ሾደትን፥ ሳአፐ ደንድድ፥ አሳዳ ናምኡ ቶሆን ኤቃናዳ ኦሰትስ፤ እያዉ አሳ ዎዛን እመትስ።

5“ናምአን ዶአይ እስ ባጋ ቁ ግድ ኤቅዳ ባባን ጌተትያ ዶአ ዳኔስ። ሄ ዶአይ ሄ ጋይለ መቀ ባ ዶናን ባርድ፥ ባ አቻን ሳፅድ ኦይክስ። እካ፥ ‘ደንዳ፤ ካላና ጋካናዉ አሾ ማ’ ጌተትስ።

6“ሄሳፈ ካላዳ፥ ማሄ ዳንያ ሀራ ዶአ በአስ። እያ ዞኮን ካፎ ቀፈ ዳንያ ኦይዱ ቀፈት ደኦሶና። እያዉ ኦይዱ ሁጰት ደኦሶና፤ እያዉ ሃሮ ማት እመትስ።

7“ሄሳፈ ጉየ፥ ቃማ ቆንጨን ያሽያ፥ ዳጋንያነ ዳሮ ምኖ ግድዳ ኦይዳን ዶአ በአስ። እያዉ ግታ ብራታ አች ደኤስ። እ ባናን ጋሄትያ ኡባ ኤንታን መንረድ ሜስ፤ አትዳይሳታ ባ ቶሁዋን የረስ። ካሰ ታ በእዳ ዶአታ ኡባፈ እ ዱማቴስ፤ እያዉ ታሙ ካጨይ ደኤስ።2 8ታኒ ሄ ካጨታባ ቆፕሽን፥ ኤንታ ግዶፈ ሀራ እስ ጉ ካጨይ ከይሽን በአስ። ሄ ካጨይ ሀንኮ ካጨታፐ ሄታ ቆልድ ሆልስ። ሄ ቃጭያስ አሳ አይፈ ዳንያ አይፈይነ ኦቶሮን ኦደትያ እንፃርስ ደኤስ።3

9“ታኒ ሄሳ በእሽን፥ አራታት ኡተስ ጊግዶሶና። መርናዉ ደኤይስ ባ አራታን ኡትስ፤ እያ ማኦይ ሻቻዳ፥ እያ ሁጰ ብናናይ ሙቃዳዳ ቦ። እያ አራታይነ አራታ ገርቶይ ታማዳ ሎጬስ።4 10እያ አራታ ግዶፈ ታማ ሻፍ ፑልትድ፥ ከዬስ። ሙኩሉ ቶሆ ሙኩላን ታይበተይሳት እያዉ ኦሶና፤ ታሙ ሙኩሉ ቶሆ ታሙ ሙኩላን ታይበተይሳት እያ ስንን ኤቆሶና። ፕርድ ዶመትስ፤ ማፃፋት ዶየትዶሶና።5

11“ካጨይ ኦደትያ ኦቶሮ ቃላ ታኒ ስእዳ ግሾ፥ እያ ጫዳ ፄላስ። ታኒ በእሽን ዶአይ ሀይቅድ፥ ኤፅያ ታማን የገትድ፥ ይስ። 12ሀንኮ ሄ ዶአታ ማታይ ኤከትስ፤ ሽን ኤንቲ ጉ ዎደ ደኦን ዳና መላ ኤንታዉ እመትስ።

13“ታኒ፥ ቃማ ቆንጨን፥ አሳ ናአ ዳነይስ ሳሎፐ ሻራራ ይሽን በአስ። መርናዉ ደኤይሳኮ ሺቅን፥ እያ ስን አዶሶና።6 14እያዉ ማት፥ ቦንቾይነ ካዎተ እመትስ፤ ደረይ፥ ካዎተትነ ዱማ ዱማ ዶናን ኦደትያ ኡባይ ሃረትዶሶና። እያ ማታይ መርናዉ ሻረቶና ማታ፤ እያ ካዎተስ ዛው ባዋ።

ቆንጨ ብርሸ

15“ታኒ፥ ዳነል፥ ታ በእዳባን ዳጋማስ፤ ቆንጨይ ታና ህርግስስ። 16ታኒ ያን ኤቅዳይሳታፐ እሱዋኮ ሺቃዳ፥ ሀ ኡባስ ቱማ ብርሸይ አይበኮ ኦይቻስ። እ ታዉ እያ ብርሸ ኡባ ሀይሳዳ ያግድ ኦድስ፦ 17‘ሀ ኦይዱ ግታ ዶአት ሳአን ስንፈ ደንዳና ኦይዱ ካዎተታ። 18ሽን ኡባፈ ቃ ፆሳ ጌሻት እያ ካዎተ ኤክድ፥ መርናዉ ባንታባ ኦና፤ መርናዉ ካዎተ ኤንቲ ላታና’ ያግስ።

19“ሄሳፈ ጉየ፥ ታኒ ሀራ ዶአታ ኡባፈ ዱማ ግድዳ ያሽያ ኦይዳን ዶኣስ ደእያ ቱማ ብርሸ ኤራናዉ ኮያስ። ሄ ዶኣስ ብራታ አችነ ናሰ ብራታ ፁጉን ደኤስ፤ እ ባናን ጋሄትያ ኡባ መንረድ ሜስ፤ አትዳይሳ ባ ቶሁዋን የረስ። 20ሄ ዶኣ ሁጰን ደእያ ታሙ ካጨታባነ ጉየፐ ከይድ፥ ኤንታፈ ሄታ ቆልድ የግዳ ጉ ካጭያባ ኤራናዉ ኮያስ። ሄ ጉ ቃጭያስ አይፈይነ ኦቶሮ ቃላ ኦደትያ እንፃርስ ደኤስ። ሄ ካጨይ ሀንኮታፐ አድ ያሼስ። 21ታኒ በእያ ዎደ ሄ ካጨይ ጌሻታራ ኦለትድ፥ ኤንታ ፆንስ። 22ሄስ ሀንዳይ፥ መርናዉ ደኤይስ ያና ጋካናዉነ ኡባፈ ቃ ፆሳ ጌሻታስ ፕርዳና ጋካናሳ፤ ኤንቲ ካዎተ ላትያ ዎደይ ጋክስ።7

23“እ ብርሸ ታዉ ሀይሳዳ ያግድ ኦድስ፤ ‘ኦይዳን ዶአይ ሀ ሳአን ስንፈ ደንዳና ኦይዳን ካዎተ። ሄ ካዎተይ ሀራ ካዎተ ኡባፈ ዱማ፤ እ፥ ቢታ ኡባ ማና፥ የናነ መንረና። 24ታሙ ካጨት ሀ ካዎተፈ ደንዳና ታሙ ካዎታ። ሄሳፈ ጉየ፥ ካሰ ታሙ ካዎታፐ ዱማ ግድዳ ሀራ ካዎይ ደንዳና። እ፥ ኤንታፈ ሄ ካዎታ ፆንድ ሃራና።8 25እ፥ ኡባፈ ቃ ፆሳ ቦላ ኦቶሮን ኦደታና፤ ኡባፈ ቃ ፆሳ ጌሻታ ኡንኤና። ቃስ ዎደታነ ህግያ ላማናዉ አሞታና። ዎደይ፥ ዎደትነ ዎደ ባጋይ ጋካናዉ፥ ጌሻት እያ ማታፐ ጋርሳን ሃረታና። 26ሽን ፕርድ ዶመታና፤ እያ ማታይ ኩመ ኤከታና፤ እ መርናዉ ያና። 27ሳሎፐ ጋርሳን ደእያ ካዎተታ ማታይ፥ ዎልቃይነ ግታተይ፥ ኡባፈ ቃ ፆሳ ጌሻታስ እመታና። እያ ካዎተይ መርናዉ ዳና፤ ቢታ ሃረይሳት እያዉ ኪተታና፤ እያ ጎይናና’ ” ያግስ።9

28ታ ቆንጨባይ ሀይሳን ዉርስ። ታኒ፥ ዳነል፥ ታ ቆፋን ዳሮ ዳጋማስ፤ ታ ሶምኦይ ብዶ ግድስ። ሽን ኡባባ ታኒ ታ ዎዛናን ዎስ።