አሞፀ 2

ሞአበ

1ጎዳይ፥ “ሞአበ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ኤዶመ ካዋ መቀይ ብዶ ግዳና ጋካናዉ ፁግዶሶና። 2ሄሳ ግሾ፥ ታኒ ሞአበ ቢታን ታማ የዳና፤ ሄ ታማይ ቅርዮታ ካታማ ሚፃታ ማና። ኦላንቾታ ዋሱዋን፥ ሞይዘ ፑኑዋንነ ኦላ ግርሳን ሞአበ አሳይ ዉራና። 3ታኒ ሞአበ ሃረይሳነ እያ ሞርናታ ኡባ ይሳና” ያጌስ።

ይሁዳ

4ጎዳይ፥ “ይሁዳ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ጎዳ ህግያ እፅዶሶና፤ እያ ኪታ ናግቦኮና። ኤንታ አዋት ካልዳ ዎርዶ ፆሳት ኤንታና ባለዶሶና። 5ሄሳ ግሾ፥ ታኒ ይሁዳ ቦላ ታማ የዳና፤ ሄ ታማይ የሩሳላመ ሚፃታ ማና” ያጌስ።

እስራኤለ

6ጎዳይ፥ “እስራኤለ አሳይ ዛር ዛር ኦዳ ናጋራ ግሾ፥ ታኒ ኤንታ ሴሮና አግከ። ኤንቲ ፅሉዋ ሚሸስ፥ ማንቁዋ ጫማስ ባይዞሶና። 7ማንቆታ ቢታ ባናን የግድ፥ ኤንታ ሁጵያ የኦሶና፤ ኡንኤትዳይሳታ ፕርዳ ድጎሶና። አዋራነ ናኣራ እስ ማጫስ ላገድ ታ ጌሻ ሱን ቱንሶሶና። 8ኤንቲ አሳፐ አጮስ ኦይክዳ ማኡዋ ያርሽያ በሳታን ኡባ ማታን ሂፅድ፥ ዝንኦሶና፤ ቃስ አሳፐ አጮስ ኤክዳ ዎይነ ኡሻ ባንታ ፆሳታ ኬን ኡዮሶና።

9“ግዶሽን፥ ህንተ ግሾ ጋዳ ዝጋዳ አዱቅዳ፥ ዎላዳ ምንዳ አሞረ አሳታ ህንተ ስንፈ ይስዳይ ታና። ታኒ ኤንታዉ ቦላ አይፍያ፥ ጋርሳ ፃጱዋ ኡባ ይሳስ። 10ታኒ ህንተና ግብፀ ቢታፈ ከሳዳ፥ ባዞን ኦይታሙ ላይ ካለስ፤ አሞረታ ቢታ ህንተዉ ላታ ኦዳ እማስ። 11ህንተ አደ ናይታ ግዶፈ ናበታ፥ ህንተ ናአተታ ግዶፈ ናዝራወታ ደንስ። እስራኤለ አሳዉ፥ ሄስ ቱማ ግደኔ? ታኒ ጎዳይ ሄሳ ኦዳስ። 12ሽን ህንተ ናዝራወታ ጫቆ መንስድ፥ ዎይነ ኡሻ ኡሽደታ፤ ናበታ ትንብተ ኦዶና መላ ድግደታ።

13“ሄሳ ግሾ፥ ካ ዳርስድ ጫንዳ ጋረይ መኤይሳዳ ታኒ ህንተና መንና። 14ጎባ ዎፀይስ ከስ ኤከና፤ ምኑዋስ ዎልቅ እፃና፤ ኦላንቾይ ባ ሸምፑዋ አሸና። 15ዶንገን ዱከይስ ኤቃናዉ ዳንዳኤና፤ ጎባ ዎፅያ ኦላንቾይ ከስ ኤከና፤ ፓራዋይ ባ ሸምፑዋ አሸና። 16ሄ ጋላስ ሀር አቶሽን ኦላንቾታ ግዶን ዳሮ ፃላ ጌተተይሳት ፅረ ካሎ ባቃታና” ያጌስ ጎዳይ።