ሀዋረታ 6

ላፑን አሳታ ዶረተ

1ሄ ዎደ ካለይሳታ ታይቦይ ዳር ዳርድ ብሽን፥ ግርከ ዶና ኦደትያ አይሁደት ይሁዳን የለትድ ደእያ አይሁደታ ቦላ ዙዙምዶሶና። አይስ ጊኮ፥ ግርከ ዶና ኦደትያ አይሁደት፥ “ጋላስ ጋላስ እመትያ ካን ኑ አምኤት ናቀቶሶና” ያግዶሶና። 2ታማነ ናምኡ ሀዋረት ዎሳ ኬ አሳ ኡባ ፄግድ፥ “ኑኒ ፆሳ ቃላ ኦደይሳ አግድ ካ ግሻናዉ በሰና። 3ህዛ፥ እሻቶ፥ ሎኦ አሳታ፥ ጌሻ አያናንነ ጭንጫተን ኩምዳ ላፑን አሳታ ህንተ ግዶፈ ዶርተ፤ ኑኒ ኤንታ ሀ ኦሱዋስ ሹማና። 4ሽን ኑኒ፥ ኑ ኩመ ዎድያ ዎሳንነ ቃላ ታማርሶን ፔሻና” ያግዶሶና።

5ሀዋረት ኦድዳ ኦዳይ አሳ ኡባ ኡፋይስስ። ሄሳ ግሾ፥ አማኖይነ ጌሻ አያን ኩምዳ እስፅፋኖሰ፥ ፍልጶሳ፥ ጵሮኮሮሳ፥ ንቃሮና፥ ፅሞና፥ ጳርመናነ አይሁደ አማኖ ገል ስምዳ አንፆከ አድያ ንቆላዎሳ ዶርዶሶና። 6ኤንታ ሀዋረታ ስንን ኤስን፥ ሀዋረት ኤንታ ቦላ ኩሸ ዎድ ዎስዶሶና።

7ፆሳ ቃላይ ዳልግ ዳልግ ብስ። የሩሳላመን ደእያ አማነይሳታ ታይቦይ ዳር ዳርድ ብስ፤ ዳሮ ካህነትካ አማንዶሶና።

እስፅፋኖሰይ ኦይከትስ

8እስፅፋኖሰይ አ ኬሀተንነ ዎልቃን ኩምድ አሳ ግዶን ኦራባታነ ማላታታ ኦስ። 9አይለተፈ ከይዳ አይሁደ ዎሳ ኬ አሳይ ቀሬናፐነ እስክንድረፐ ክልቀፈነ ኢሰፐ ይዳ እስ እስ አሳት ደንድድ እስፅፋኖሰራ ፓላምዶሶና። 10ሽን እስፅፋኖሰይ አያና ዎልቃን ኦደትያ ጭንጫተ ኤንቲ ኤቀታናዉ ዳንዳእቦኮና።

11ሄ ዎደ ኤንቲ፥ “ሙሰነ ፆሳ እ ጫይሽን ስእዳ” ግያ ዎርዶ አሳታ ሻምዶሶና። 12ሄሳዳ ኦድ ቢታ ጭማታነ ህገ አስታማረታ እያ ቦላ ደንዶሶና። እስፅፋኖሰ ኦይክድ ሻንጉዋ ስን ኤፍዶሶና። 13እያ ቦላ ፓይድዳ ዎርዶ ማርካት፥ “ሀ ኡራይ ሀ ፆሳ ኬነ ሙሰ ህግያ ዛር ዛር ጫዬስ። 14እ፥ ‘ሀይስ ናዝረተ የሱሲ፥ ሀ ፆሳ ኬ ላላና፤ ቃስ ሙሰይ ኑስ እምዳ ህግያ ላማና’ ያግሽን ኑኒ ስእዳ” ያግዶሶና።

15ሻንጎ ሺቆን ኡትዳ አሳ ኡባይ እስፅፋኖሰ ሎይድ ፄልያ ዎደ እያ ሶምኦይ ኪታንቾ ሶምኦ ዳኔስ።