ጌሻ ማፃፋ
ሀዋረታ 22
“ታ እሻቶ፥ ታ አዋቶ፥ ታኒ ሀእ ህንተዉ እምያ ዛሩዋ ስእተ።” ጳዉሎስ ኤንታዉ እብራወ ዶናን ኦደይሳ ስእድ ካሰይሳፈ አድ ስእ ግዶሶና። እ ካልድ፥
“ታኒ ክልቅያን ደእያ ተርሰሴ የለታዳ ሀ ካታማን ድጫስ። ታ አስታማረይካ ጋማልያለ፤ ታኒ ኑ አዋታ ህግያ ምን ታማርዳ፥ ሀች ህንተ ኡባይ ሀነይሳዳ ፆሳስ ምሸትያ አይሁደ አስ።1 ታኒ ሀ ኦግያ ካልያ ማጫታነ አደታ ኦይካዳ ቃሾ ኬን የጋሸነ ኤንታ ዎሳና ጋካናዉ ዋየ በስዳ አስ።2 ሄሳዳካ፥ ካህነ ሀላቃይነ ሻንጎ ኡባይ ታባ ማርካታናዉ ዳንዳኤስ። ታኒ ዳማስቆን ደእያ ኤንታ እሻታስ ኤንታፈ ዳብዳበ ኤካዳ ያን ደእያ አሳት ቃሸትድ ሴረታና መላ የሩሳላመ ኤንታ ኤሀናዉ ያ ባስ።
“ታኒ ባዳ ዳማስቆ ማትዳ ዎደ ሴታ ጋላስ ቆፖና ሳሎፐ ግታ ፖኦይ ታ ዩሹዋን ፖእስ። ታኒ ሳአን ኩንዳ ደእሽን፥ ‘ሳኦላ፥ ሳኦላ፥ ታና አይስ የደይ?’ ግያ ቃላ ስአስ። ታኒ ዛራዳ፥ ‘ጎዳዉ፥ ኔኒ ኦኔ?’ ያጋስ። እ ዛሪድ፥ ‘ታኒ፥ ኔኒ ጎድያ ናዝረተ የሱሳ’ ያግስ። ታራ ደኤይሳት ፖኡዋ በእዶሶናፐ አትሽን፥ ታዉ ኦደይሳ ቃላ አኬክቦኮና።
“ታኒ፥ ‘ጎዳዉ፥ ታ አይ ኦ?’ ያጋስ።
“ጎዳይ ታኮ፥ ‘ደንዳዳ ዳማስቆ ባ። ኔኒ ኦና መላ ፆሳይ ኦናዉ ቆፕዳባ ኡባይ ያን ነዉ ኦደታና’ ያግስ። ሄ ዎልቃማ ፖኡዋ ጋሶን ታ አይፈይ ቆቅን፥ ታራ ደእያ አሳት ታ ኩሽያ ኦይክድ፥ ታና ጎችን ዳማስቆ ጋካስ።
“ዳማስቆን ደእያ አይሁደ ኡባይ ዳሮ ቦንችያ እስ ሀናንያ ጌተትያ አደይ፥ ኑ ህግያ ቦንቸይስነ ፆሳ ምን ዎሰይስ ደኤስ። ሀናን ታኮ ይድ፥ ታ ማታን ኤቅድ፥ ‘ታ እሻዉ ሳኦላ፥ ፄላ’ ያግስ። ኤለሳዳ ታኒ እያ ፄላ አጋስ።
“እ ታኮ፥ ‘ኑ አዋታ ፆሳይ ኔኒ እያ ሸንያ ኤራና መላ፥ እያ ፅሎ ናኣ በአና መላነ እያ ዶናፐ ቃላ ስአና መላ ካሰትድ ነና ዶርስ። ኔኒ በእዳባነ ስእዳባ አሳ ኡባ ስንን እያዉ ማርካታና። ሀእ አይስ ጋምአይ? ደንዳዳ ፃማቀታ፤ እያ ሱን ፄጋዳ ነ ናጋራፐ ሜጨታ’ ያግስ።
“ታኒ ጉየ የሩሳላመ ስማዳ ፆሳ ኬን ዎስሽን፥ ታዉ ቆንጨ በንትስ። ቆንጨን ጎዳይ ታኮ፥ ‘ነ ታዉ ማርካትያ ማርካተ አሳይ ኤኮና ግሾ ኤለሳዳ የሩሳላመፐ ከያ’ ያግሽን ታኒ በአስ።
“ታኒ፥ ‘ጎዳዉ፥ አይሁደ ዎሳ ኬ ኡባን ነና አማነይሳታ ኦይካዳ ዋዳይሳነ ቃሾ ኬን የግዳይሳ ኤንቲ ኤሮሶና። ኤንቲ ነ ማርካ እስፅፋኖሰ ዎያ ዎደ ታኒ ሄ ኦዳን እስፋስ። ቃስ ኤንታ ማታን ኤቃዳ እያ ዎይሳታ ማኡዋ ናጋይስ’ ያግስ።3
“ጎዳይ ታኮ፥ ‘ታኒ ነና አይሁደ ግዶና አሳኮ ሃሆሶ ኪትያ ግሾ ደንዳዳ ባ’ ” ያግስ።
ጳዉሎስ ሮመ አስ
ጳዉሎስ ሄ ቃላ ኦድድ ኦንጋና ጋካናዉ አሳይ እ ገይሳ ስኦሶና። ሄሳፈ ጉየ፥ ባንታ ቃላ ቁ ኦድ፥ “ሀይሳ ቢታፈ ይሳ! እ ዳናዉ በሰና” ያግዶሶና።
ኤንቲ ዎጫምሽን፥ ባንታ ማኡዋ ቦላ ሆልሽንነ ባና ቦላ ላልሽን፤ ሻላቃይ በእድ ዎታዳረት ጳዉሎሳ ባንታ ደእያሱዋ ኤፋና መላ ኪትስ። ቃስ አሳይ አይስ ሄሳዳ ዎጫምዳኮ ኤራናዉ ኮይድ ጳዉሎሳ ልሶን ጋራፍድ ፕልጋና መላ ኤንታ ኪትስ። ሽን ዎታዳረት ጳዉሎሳ ዳፎን ምን ቃችድ ጋራፋና ሀንያ ዎደ ጳዉሎስ ባ ማታን ኤቅዳ ማቶ ሀላቃኮ፥ “ሮመ አስ ፕርድ ባይና ጋራፈይስ ህንተዉ ዎጌ?” ያግስ።
ማቶ ሀላቃይ ሄሳ ስእዳ ዎደ ሻላቃኮ ብድ፥ “ሀ አደይ ሮመ አስ። ኔኒ አይ ኦናዉ ቆፓይ?” ያግድ ኦይችስ።
ሻላቃይ ጳዉሎሳኮ ሺቅድ፥ “ኔኒ ሮመ አሴ? አነ ታዉ ኦዳ” ያግስ።
ጳዉሎስ፥ “ኤ” ያግስ።
ሻላቃይ ዛሪድ፥ “ታኒ ሀ ጋደተ ዳሮ ሚሸን ሻማስ” ያግስ።
ሽን ጳዉሎስ፥ “ታ ሀ ጋደተ የለተን ደማ ኤካስ” ያግስ።
ሄሳ ግሾ፥ ጳዉሎሳ ፕልጋናዉ ቆፕዳይሳት ኢራ እያፐ ሻከትዶሶና። ሻላቃይ ሮመ አስ ሳንላታን ቃችዳይሳ ኤርዳ ዎደ ያይስ።
ጳዉሎስ አይሁደ ሻንጎ ስንን
ዎንተ ጋላስ ሻላቃይ፥ አይሁደት ጳዉሎሳ አይስ ሞትዳኮ ጌሽ ኤራናዉ ኮይስ። ካህነ ሀላቃትነ ሻንጎይ ኡባይ ሺቃና መላ ኪትስ፤ ቃስ ጳዉሎሳ ቃሾፐ ብልስድ ኤንታ ስንን ኤስስ።
Source notes (3)
- Cross-reference ሀዋ 5:34-39.
- Cross-reference ሀዋ 8:3፤ 26:9-11.
- Cross-reference ሀዋ 7:58.
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.