ጌሻ ማፃፋ
2 ሳሜላ 7
ፆሳይ ዳዊታስ ገልዳ ቃላ
(1 ታር 17:1-15)
ካዎይ ባ ጋን ዎፑ ግድ ኡትዳፐነ ጎዳይ እያ ዩሹዋን ደእያ እያ ሞርከታፐ ሸምፕስዳፐ ጉየ፥ ናብያ ናታናኮ፥ “ታኒ ዝጋፐ ኬፀትዳ ኬን ደአይስ፥ ሽን ፆሳ ታቦተይ ዱንካነን ደኤስ” ያግስ።
ናታን፥ “ኦናዉ ነ ዎዛናን ቆፕዳባ ኡባ ኦ፤ ጎዳይ ኔራ ደኤስ” ያግስ።
ሽን ሄ ቃማ ጎዳ ቃላይ ናታናኮ ይድ፥ “ባዳ ታ አይልያ ዳዊታ ሀይሳዳ ያጋ፤ ‘ታኒ ዳና ኬ ኬፃናይ ነና ግዳካ። ታኒ እስራኤለታ ግብፀ ቢታፈ ከስዳ ዎደፐ ዶማዳ ሀች ጋካናዉ ኬን ደአብከ፤ ታኒ ዱንካነን ያነ ሃነ ዩያሸ ደአስ። ታኒ እስራኤለ አሳራ ዩይዳ በሳ ኡባን ታ አስ እስራኤለ ሄማና መላ ታኒ ሹምዳ፥ “ታዉ ዝጋ ምን አይስ ኬ ኬፃብኪ?” ጋዳ ኦይቻብከ’ ያግስ።
“ህዛ፥ ታ አይልያ ዳዊታስ ኦዳ፤ ‘ኡባፈ ዎልቃማ ጎዳይ ኔኮ ሀይሳዳ ያጌስ፤ ታኒ ነና ሄን በሳፈ፥ ዶርሰ ሄምያ ሶፐ ደንዳ ታ አሳ እስራኤለ ካለና መላ ኦስ። ኔኒ ብዳ በሳ ኡባን ታኒ ኔራ ግዳስ፤ ነ ሞርከታ ኡባ ነ ስንፈ ይሳስ። ሀእ ዛራዳ ታኒ ሀ ሳአን ኤረትዳ ግታ አሳታዳ ነ ሱን ግታያና። ታኒ ታ አሳ እስራኤለስ በሰ እማዳ፥ ኤንታ ሄ በሳን ቶካና። ኤንቲ ባንታ በሳን ዳና፤ ናምአን ዳጋሞኮና። ካሰ ዳይናታ ዎደፐ ዶምድ ሀንዳይሳዳ ህዛፐ ጉየ ኤንታ ኢታ አስ ሃረና። ታኒ ነና ነ ሞርከታ ኡባፈ ሸምፕሳና።
“ ‘ሄሳ ቦላ ጉጅድ ጎዳይ ባ ሁጰን ታኒ ነዉ ኬ ኬፃና1 ያግድ ኦድስ። ነ ባረይ ዉርን፥ ሀይቃዳ ነ ማይዛታ ነ ጋክያ ዎደ ነ ጉልባታፐ ከይዳ ናአ ታኒ ደንና፤ እያ ካዎተ ምንና። ታ ሱንስ ኬ ኬፃናይ እያ፤ ታኒ እያ አራታ መርናዉ ምን ኤሳና። ታኒ እያዉ አዋ ግዳና፤ እካ ታዉ ናአ ግዳና። እ ባልያ ዎደ ታኒ እያ አሳ ፃምአን፥ አስ ሾጭያ ልሶን ሴራና። ሽን ታኒ ነ ስንፈ ድግዳ ሳኦላፐ ታ ኬሀተይ ኤከትዳይሳዳ እያፐ ኩም ኤከተና። ነ ኮቻትነ ነ ካዎተይ ታ ስንን መርናዉ ዳና፤ ነ አራታይ መርናዉ ምንድ ኤቃና’ ” ያጋ።
ናታን ጎዳይ እያዉ ቆንጨን በስዳ ቃላ ኡባ ዳዊታስ ኦድስ።
ዳዊታ ዎሳ
(1 ታር 17:16-27)
ሄሳፈ ጉየ፥ ካዎይ ዳዊቲ ግዶ ገልድ ጎዳ ስንን ኡትድ ሀይሳዳ ያግድ ዎስስ። “አቤት ታ ጎዳ ፆሳዉ፥ ሀች ጋካናዉ ኔኒ ሀይሳ ኡባ ኦናዉ ታ ኦኔ? ታ ሶ አሳይካ አይቤ? አቤት ታ ጎዳዉ፥ ፆሳዉ፥ ሀይስ ነ አይፈ ስንን ጉ ዳንን፥ ስንፈ ነ አይልያ ኮቻታስ ኦናባ ኦዳዳሳ። ታ ጎዳ ፆሳዉ፥ ኔኒ አሳራ ኦደትያ ኦገይ ሀይሴ?
“ሀይሳፈ አያባ ታኒ፥ ዳዊቲ አይ ጋናዉ ዳንዳእያና? ታ ጎዳ ፆሳዉ፥ ኔኒ ታና ነ አይልያ ኤራሳ። ኔኒ ነ ቃላ ግሾ፥ ነ ዎዛና ቆፋዳ ሀ ግታባ ኦዳ ታና ነ አይልያ በሳዳሳ።
“አቤት ታ ጎዳ ፆሳዉ፥ ኔኒ ግታ። ነ መል ባዋ፤ ኑኒ ኑ ሀይን ስእዳይሳዳ ኔፐ አትሽን፥ ሀራ ፆሲ ባዋ። ነ አሰ ኦናዉ ግብፀፈ ዎዝዳ ነ አሳ እስራኤለ ዳንያ ሀራ ካዎተ ሳአ ቦላ ባዋ። ኔኒ ኤንታዉ ኦዳ ግታነ ማላልስያ ኦሶታ ጋሶን ነ ሱንይ ቢታን ኤረትስ። ኔኒ ነ አሳ ስንፈ ሀራ ካዎተታነ ኤንታ ፆሳታ ጎዳ ከሳዳሳ። ነ አሳ እስራኤለ መርናዉ ነባ ኦዳሳ፤ ምንዳሳ። አቤት ጎዳዉ፥ ነ ኤንታ ፆሳ ግዳዳሳ።
“አቤት ታ ጎዳዉ፥ ፆሳዉ፥ ኔኒ ነ አይልያስነ እያ ኬስ ኦና ጋዳ ገልዳ ቃላ መርናዉ ናጋ፤ ነ ቃላ ኦ። ሄሳን ነ ሱንይ መርናዉ ግታ ግዳና። አሳይ ነና፥ ‘ኡባፈ ዎልቃማ ጎዳይ እስራኤለ ፆሳ’ ያጋና። ነ አይልያ ዳዊታ ኮቻትካ ነ ስንን ምንድ ኤቃና።
“አቤት ኡባፈ ዎልቃማ ጎዳዉ፥ እስራኤለ ፆሳዉ፥ ኔኒ፥ ‘ነ ኮቻት መርናዉ ካዎታና’ ያጋዳ ታዉ ነ አይልያስ ጫቃዳሳ። ሄሳ ግሾ፥ ታኒ ነ አይለይ ሀ ዎሳ ዎሳናዉ ፃላስ። አቤት ታ ጎዳ ፆሳዉ፥ ኔኒ ፆሰ! ነ ቃላይ ቱማ፤ ኔኒ ሀ ሎኦባታ ኦና ጋዳ ታዉ ነ አይልያስ ኦዳዳሳ። ነ ስንን መርናዉ ዳና መላ ነ አይልያ ኮቻ አንጃ። አቤት ታ ጎዳ ፆሳዉ ነ ግዳይሳዳ ነ አንጅኮ ነ አይልያ ኬይ መርናዉ አንጀታና” ያግድ ዎስስ።
Source notes (1)
- Footnote ነ አራታን ኡትያ ሼሽ እማና።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.