ጌሻ ማፃፋ
2 ካዎታ 13
እስራኤለ ካዋ እዮአካዛ
አካዝያሳ ናአይ፥ ይሁዳ ካዎይ እዮኣስ ካዎትዳ ላታማነ ሄን ላይን፥ እዩ ናአይ እዮአካዝ እስራኤለ ቦላ ካዎትስ፤ እ ሳማረን ኡትድ ታማነ ላፑን ላይ ካዎትስ። እ፥ እስራኤለ አሳ ባለዳ እዮርባማ ሶ አሳ ናጋራ ካልድ፥ ጎዳ ስንን ኢታባ ኦስ፤ እ ሄ ናጋራ ኦሶ አግቤና። ሄሳ ግሾ፥ ጎዳ ሀንቆይ እስራኤለ ቦላ ሱልስ፤ ጎዳይ ኤንታ ዳሮ ዎደ አራመ ካዋ አዛሄላ፥ ሄሳዳካ እያ ናኣ ዎልደ-አዳራ ኩሸን አድ እሚስ።
ሄሳፈ ጉየ፥ እዮአካዝ ጎዳ ዎስስ። ጎዳይ እያ ዎሳ ስእስ፤ ሶረ ካዎይ እስራኤለ አይ መላ ኢታ መቶን ኡንኤዳኮ ጎዳይ በእስ። እስራኤለ አሳ አሽያ አስ እምን፥ ኤንታ አራመ ኩሸፐ ከስ ኤክዶሶና። እስራኤለ አሳይ ካሰይሳዳ ባንታ ሶን ሳሮን ደእዶሶና። ሄስ ሀንንካ እስራኤለ አሳ ባለዳ እዮርባማ ሶ አሳ ናጋራፐ ስምቦኮና፤ ኤንቲ ሄ ናጋራ ኦሶ አግቦኮና። ቃስ አሼራ ጌተትያ ፆሰ ኤቃ ምስለይ ሳማረን ኤቅድ ደኤስ። እዮአካዛስ እሻታሙ ፓራ አሳታ፥ ታሙ ጋረታ፥ 10,000 ቶሆ ኦላንቾታ፥ ሀራ ኦላንቾታ ፃላል አትዶሶና። አራመ ካዎይ ኤንታ ይስስ፤ እ ኤንታ ዉዱማን ደእያ ሱላዳ ኦስ።
እዮአካዝ ሀንዳ ሀራባይ፥ እ ኦዳባ ኡባይነ እያ ምኖተይ እስራኤለ ካዎታ ታርከ ማፃፋን ፃፈትስ። እዮአካዝ ሀይቅድ፥ ባ ማይዛታ ጋክስ፤ እያ በሳን እያ ናአይ ዮኣስ ካዎትስ።
እስራኤለ ካዋ ዮኣሳ
ይሁዳ ካዎይ እዮኣስ ካዎትዳ ሀስታማነ ላፑን ላይን፥ እዮአካዛ ናአይ ዮኣስ ሳማረን እስራኤለ ቦላ ካዎትስ፤ እ ታማነ ኡሱፑን ላይ ካዎትስ። ዮኣስ ጎዳ ስንን ኢታባ ኦስ። እስራኤለ አሳ ባለዳ ናባፃ ናኣ እዮርባማ ናጋራፐ እሱዋካ አሾና ኦስ፤ እ ሄ ናጋራ ኦሶ አግቤና።
ዮኣስ ሀንዳ ሀራባይ፥ እ ኦዳባ ኡባይነ ይሁዳ ካዋ አማስያሳራ ኦለትዳ ኦላይ እስራኤለ ካዎታ ታርከ ማፃፋን ፃፈትስ። ዮኣስ ሀይቅድ፥ ባ ማይዛታ ጋክስ፤ ሳማረን እስራኤለ ካዎታራ ሞገትስ። እያ በሳን እያ ናአይ እዮርባም ካዎትስ።
ኤልሳ ሀይቁዋ
ኤልስ ሀይቆስ ጋያ ሀርገ ሀርገትስ፤ እስራኤለ ካዎይ ዮኣስ እያ በአናዉ ብድ፥ “ታ አዋዉ፤ ታ አዋዉ፥ ኔኒ እስራኤለ አሳስ ዎልቃነ ጎንዳለ!”1 ያግድ ዬክስ።
ኤልስ፥ “ዶንገነ ዶንገ ቶራ ኤካዳ ያ” ያግን፥ ዮኣስ ኤህስ።
ኤልስ ካዋኮ፥ “ዶንግያ ጊግሳ ኦይካ” ያግስ፤ እ ዶንግያ ጊግስድ ኦይክዳሽን፥ ኤልስ ባ ኩሽያ ካዋ ኩሽያ ቦላ ዎስ።
ኤልስ፥ “ዶሎሀ ባጋ ማስኮትያ ዶያ” ያግስ። እ ዶይን፥ ኤልስ፥ “ዶንገ ቶራን ዱካ” ያግስ። እ ዱክን ኤልስ፥ “ሀይስ ጎዳ ዶንገ! ሀይስ አራመ አሳ ፆንያ ዶንገ! ኔኒ አራመ አሳ አፌቃን ፆናና ጋካናዉ ኦላና” ያግስ።
ሄሳፈ ጉየ፥ ኤልስ ካዋኮ፥ “ዶንገ ቶራታ ኤካ” ያግስ። እ ኤክን፥ ኤልስ፥ “ቢታ ጫዳ” ያግስ። እ ሄ ቶሆ ቢታ ጫድድ አጋግስ። ፆሳ አደይ፥ ካዋ ቦላ ሀንቀትድ፥ “እቻሹ ቶሆ ዎይኮ ኡሱፑን ቶሆ ቢታ ጫድዳባ ግድያኮ፥ ኔኒ አራመ አሳ ፆናዳ ኩመ ይሳናሽን! ኔኒ ሀእ ኤንታ ሄ ቶሆ ፃላላ ፆናና” ያግስ።
ኤልስ ሀይቅድ ሞገትስ። ሞአበ ፓኖት እስራኤለ ቢታ ቦላ ላይን ላይን ደንዶሶና። እስ ጋላስ ጉ እስራኤለ አሳት እስ ኡራ አሀ ሞግሸ፥ ሄኮ፥ ሞአበ ፓኖታ በእዶሶና። ኡራ አሀ ኤልሳ ዱፉዋ ግዶ ሆልድ ባቃትዶሶና። አሀይ ኤልሳ መቀ ቦላ ዎድ፥ ፓፅድ ደንድ ኤቅስ።
እዮአካዝ ካዎትዳ ላይ ኡባን ሶረ ካዎይ አዛሄል እስራኤለ ኡንኤስ። ሽን ጎዳይ አብራሃመራ፥ ይሳቃራነ ያይቆባራ ጫቅዳ ጫቁዋ ግሾ፥ ኤንታዉ ኬህስ፥ ቃትስ፥ ቆፕስ። ሀች ጋካናዉ እ ኤንታ ይስቤና ዎይኮ ባ ስንፈ ድግቤና።
አራመ ካዎይ አዛሄል ሀይቅን፥ እያ በሳን እያ ናአይ ዎልደ-አዳር ካዎትስ። አዛሄል እያ አዋ እዮአካዝ ኦላን ኦይክዳ ካታማታ፥ እዮአካዛ ናአይ ዮኣስ አዛሄላ ናኣ ዎልደ-አዳራፐ ኤክስ። ዮኣስ እያ ሄ ቶሆ ፆንድ፥ እስራኤለ ካታማታ ዛርስ።
Source notes (1)
- Cross-reference 2 ካዎ 2:12.
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.