2 ታርከ 6

ሶሎሞነ ሃሳያ

(1 ካዎ 8:12-21)

1ሶሎሞነይ፥ “አቤት ጎዳዉ፥ ‘ታ ማ ሻራን ዳና’ ያጋዳሳ። 2ሽን ታኒ ኔኒ ያን መርናዉ ዳና ሎኦ ኬ ነዉ ኬፃስ” ያግስ።

3እስራኤለ ሺቆይ ያን ኤቅዳሽን፥ ካዎይ ኤንታኮ ስሚድ፥ ኤንታ ሀይሳዳ ያግድ አንጅስ፤ 4“ጎዳይ እስራኤለ ፆሳይ ጋላተቶ! ታ አዋ ዳዊታስ ባ ዶናን ኦድዳ ኡፋይሳ ቃላ ባ ኩሸን ፖልስ። ሄ እ ኦድዳ ኡፋይሳይ፥ 5‘ታኒ ታ አሳ እስራኤለ ግብፀፈ ከሳዳ ኤህዳ ዎደፐ ዶምን፥ ታ ሱንይ እያን ፄገታና መላ ታዉ ኬ ኬፃናዉ እስራኤለ ኮቻታ ግዶን አይ ካታማካ ዶራብከ፤ ዎይኮ እ ታ አሳ እስራኤለ ካለና መላ ኦናካ ዶራብከ። 6ሽን ሀእ ታ ሱንይ የሩሳላመን ፄገታና መላ ታኒ የሩሳላመ ዶራስ፤ ቃስ ታ አሳ እስራኤለ ካለና መላ ዳዊታ ዶራስ።’

7“ታ አዋይ ዳዊቲ ጎዳ እስራኤለ ፆሳ ሱንስ ኬ ኬፃናዉ ባ ዎዛናን ቆፕስ። 8ሽን ጎዳይ ታ አዋ ዳዊታኮ፥ ‘ኔኒ ታ ሱንስ ኬ ኬፃናዉ ነ ዎዛናን ቆፕዳ ግሾ ሎኦ ኦዳሳ። 9ግዶሽን፥ ታዉ ኬ ኬፃናይ ነና ግዳካ፤ ታ ሱንስ ኬ ኬፃናይ ነ ጉልባታፐ ከያና ነ ናኣ።’

10“ጎዳይ ባ ግዳ ኡፋይሳ ቃላ ፖልስ። ጎዳይ ካሰ እምዳ ኡፋይሳዳ ታኒ ታ አዋ ዳዊታ በሳን ካዎታዳ እስራኤለ ካዎተ አራታን ኡታስ። ቃስ ጎዳ እስራኤለ ፆሳ ሱንስ ኬ ኬፃስ። 11ጎዳይ እስራኤለራ ጫቅዳ ጫቆይ ፃፈትዳ ሎቸ ሹቻት ደእያ ታቦትያ እያ ግዶን ዎስ” ያግስ።

ሶሎሞነ ዎሳ

(1 ካዎ 8:22-53)

12-13ሶሎሞነይ አዱሳተይ እቻሹ ዋ፥ ጎምፓይ እቻሹ ዋነ ቃተይ ሄ ዋ ግድዳ ማድራከ ናሰ ብራታፐ ኦድ ዳባባ ግዶን ዎስ። ሶሎሞነይ ጎዳ ያርሾ በሳ ስንን፥ እስራኤለ ማባራይ ደእያ በሳን ኤቅድ፥ ባ ኩሽያ ምጭድ እስራኤለ ሺቁዋ ስንን ጉልባትስ። 14እ ሀይሳዳ ያግድ ዎስስ፦

“አቤት ጎዳዉ፥ እስራኤለ ፆሳዉ፥ ሳሎን ዎይኮ ሳአን ነ መላ ፆሲ ባዋ። ኔኒ ነ ኡፋይሳ ቃላ ናጋሳ፤ ባንታ ኩመ ዎዛናፐ ነ ስንን ሄመትዳ ነ አይለታ መርና ሲቁዋን ዶሳዳሳ። 15ነ አይልያ፥ ታ አዋ ዳዊታስ ኔኒ ኦና ጋዳ ኦድዳ ቃላ ናጋዳሳ። ኔኒ ካሰ ነ ዶናን ኦድዳይሳ ነ ኩሸን ሀች ፖላዳሳ። 16አቤት ጎዳዉ፥ እስራኤለ ፆሳዉ ኔኒ ነ አይልያ፥ ታ አዋ ዳዊታስ፥ ‘ኔኒ ታ ስንን ሄመትዳይሳዳ ነ ናይትካ ታ ህግያን ሄመታናዉ ባንታ ኦግያ ናግኮ፥ እስራኤለ አራታን ኡትያ አሰ ያካ’ ያግዳ ቃላ ፖላ። 17አቤት ጎዳዉ፥ እስራኤለ ፆሳዉ፥ ኔኒ ነ አይልያ ዳዊታስ ኦድዳ ነ ኡፋይሳ ቃላይ ፖለቶ።

18“ሽን ፆሲ ቱማ፥ አሳራ ሳአን ደእዬ? ሄኮ፥ ሳሎይ፥ ኡባፈ ቃ ሳሎይ ነና ኦይካናዉ ዳንዳኤና። ያትን፥ ሀ ታ ኬፅዳ ኬይ ነዉ አይ መላ ጉፃንደሻ! 19ግዶሽን፥ አቤት ጎዳዉ፥ ታ ፆሳዉ፥ ታ ዎሳ፥ ነ አይልያ ዎሳነ ፄሳ ስአ። ታኒ ነ አይለይ ነ ስንን ዎስያ ዎሳነ ዋሱዋ ስአ። 20ኔኒ፥ ‘ታ ሱንይ ሄ በሳን ፄገታና’ ግዳ ሀ ፆሳ ኬኮ፥ ነ አይፈይ ቃማ ጋላስ ፄሎ። ታኒ ነ አይለይ ሀ ኬኮ ስማዳ ዎስያ ዎሳ ስአ። 21ታኒ ነ አይለይነ ነ አሳይ እስራኤለይ ሀ ነ ኬኮ ስሚድ ዎስያ ዎሳ ስአ። ነ ደእያ በሳን ሳሎን ስአዳ ኑስ አቶ ያጋ።

22“እስ አስ ባ ሾሩዋ ቆህድ አካይ ግን፥ እያ ጫቀናዉ ሀ ነ ኬ ኤህን፥ እያ ግዶን ደእያ ያርሾ በሳ ስንን እ ጫቅኮ፥ 23ኔኒ ሳሎን ስአዳ ኦ። ነ አይለታ ግዶን ፕርዳ። ቆህዳ ኡራ ቦላ ፕርዳዳ፥ እ ኦዳባ እያ ቦላ ዛራ፤ ፅሉዋ ፆንሳዳ እያዉ እያ ፅሎተዳ ዛራ።

24“ነ አሳይ እስራኤለይ ነ ቦላ ናጋራ ኦድ፥ ሞርከን ፆነትድ፥ ኔኮ ስሚድ፥ ነ ሱን ፄግድ፥ ሀ ኬን ነና ዎስኮ፥ 25ነ ሳሎን ስአ። ነ አሳ እስራኤለ ናጋራ አቶ ያጋ፤ ነ ካሰ ኤንታዉነ ኤንታ ማይዛታስ እምዳ ቢታ ኤንታ ዛራ።

26“ነ አሳይ ነ ቦላ ናጋራ ኦን፥ ሳሎይ ጎርደትኮ፥ እር ቡኮና እፅን፥ ኤንቲ ሀ በሳ ስሚድ፥ ዎስኮ ነ ኤንታ ኡንኤዳ ግሾ፥ ነ ሱን ፄግድ፥ ባንታ ናጋራፐ ስምኮ፥ 27ነ ሳሎን ስአ። ነ አይለታ ናጋራ፥ ነ አሳ እስራኤለ ናጋራ አቶ ያጋ። ኤንቲ ሄመታናዉ በሲያ ሎኦ ኦግያ ኤንታ ታማርሳ፤ ኔኒ ነ አሳስ እምዳ ቢታን እራ ቡክሳ።

28“ቢታ ቦላ ኮሽ ዎይኮ ቦሽ ዎይኮ ሌገይ ዎይኮ ቦለይ ዎይኮ ጎንዶይ ይስን ዎይኮ ሞርከይ ኤንታ ካታማታ ተቅን ዎይኮ ዮይ ዎይኮ ሀርገይ ይን፥ 29ነ አሳ እስራኤለፐ ኦንካ ዎይኮ ነ አሳ ኡባይ ነና ዎስኮ፥ አይ አስካ ባ ዎዛናን ኡንኤትያባነ አዛንያባ ኤርድ፥ ሀ ፆሳ ኬኮ ስሚድ፥ ባ ኩሽያ ምጭኮ፥ 30ነ ደእያ በሳን ሳሎን ስአ። ኤንታ ናጋራ አቶ ያጋ፤ ኤንታዉ ኦ። ኔኒ አሳ ዎዛና ኤረይሳዳ አሳ ኡባስ እያ ኦሱዋዳ ኦሱዋዳ እማ። አሳ ኡባ ዎዛና ኤረይ ነ ፃላላ። 31ሄስካ ነ ኑ ማይዛታስ እምዳ ቢታን ባንታ ደኦ ላይ ኡባን ነዉ ያያና መላነ ነ ኦግያን ሄመታና መላሳ።

32“እስራኤለ ግዶና ሀራ ቢታ አስ ነ ግታ ሱን ግሾነ ኔኒ ነ አሳስ ኦዳ ማላልስያ ኦሶታ ግሾ ሃሆ ቢታፈ ይድ፥ ሀ ፆሳ ኬኮ ስሚድ ዎስኮ፥ 33ነ ደእያ በሳን ሳሎን ስአ። ሀራ ቢታ አሳይ ኦይችያባ ኡባ ኦ። ሀ አላምያን ደእያ አሳ ኡባይ ነ ሱን ኤራናዳነ ነ አሰ ግድዳ እስራኤለዳ ነዉ ያያናዳ ታ ኬፅዳ ሀ ኬይ ነ ጎይነትያ በሲ ግደይሳ ኤንቲ ኤራናዳ ሀራ ቢታ አሳይ ነና ዎስያባ ኡባ ኦ።

34“ኤንቲ ባንታ ሞርከታ ኦላና መላ ነ ኪትያ ዎደ ነ ዶርዳ ሀ ካታማኮነ ታ ነ ሱን ግሾ ኬፅዳ ሀ ኬኮ ስሚድ ነና ዎስኮ፥ 35ኤንታ ዎሳነ ኤንታ ኦይሻ ሳሎን ስአ፤ ኤንታ ኦይሻ ዛራ።

36“ናጋራ ኦና አስ ባይና ግሾ ነ አሰ ግድዳ እስራኤለይ ናጋራ ኦድ ነና ቆህኮ ኔኒ ሸነታዳ ሞርከታስ አ እምን ሞርከት ኤንታ ድእድ ሃሆ ዎይኮ ማታ ቢታ ኤንታ ኤፍን፥ 37ኤንቲ ሄ ድኤትዳ ቢታን ደእሸ ባንታ ዎዛናን ናጋራፐ ስምኮ፥ ‘ኑኒ ናጋራ ኦዳ፤ ኑኒ ቆህዳ፤ ኑኒ ኢታባ ሀንዳ’ ያግድ ነና ዎስኮ፥ 38ባንታና ድእድ ኤፍዳ ሞርከታ ቢታን ደእሸ ኤንቲ ባንታ ኩመ ዎዛናንነ ኩመ ቆፋን ኔኮ ስምኮ፥ ኔኒ ኤንታ ማይዛታስ እምዳ ቢታኮ፥ ኔኒ ዶርዳ ካታማኮነ ታኒ ነ ሱን ግሾ ኬፅዳ ኬኮ ስሚድ ነና ዎስኮ፥ 39ኤንታ ዎሳነ ኦይሻ ነ ደእያ በሳን ሳሎን ስአ፤ ኤንታዉ ፕርዳ፤ ኤንታ ናጋራ አቶ” ያጋ።

40“አቤት ታ ፆሳዉ፥ ሀ በሳን ዎስያ ዎሳ ነ አይፈይ ፄሎ፤ ነ ሀይይ ስኦ።

41“አቤት ጎዳዉ፥ ፆሳዉ፥ ደንዳ፤

ዎልቃማ ነ ታቦትያራ ነ ሸምፖ በሳ ገላ።

አቤት ጎዳዉ፥ ፆሳዉ፥ ነ ካህነት አቶተ ኤኮ፤

ነ ጌሻ አሳት ነ ኬሀተን ኡፋይቶ።

42አቤት ጎዳዉ፥ ፆሳዉ፥ ኔኒ ትይዳ ካዋ አጎፋ፤

ነ አይልያ ዳዊታስ

ነ ጫቅዳ መርና ሲቁዋ ቆፓ”1 ያግስ።