2 ታርከ 32

ሳናክሬም የሩሳላመ ቦላ ደንድስ

(2 ካዎ 18:13-17፤ 19:14-19፥ 35-37፤ እሳ 36:1-22፤ 37:8-38)

1ካዎይ ህዝቅያስ አማነተን ጎዳስ ኦዳፐ ጉየ አሶረ ካዎይ ሳናክሬም ይሁዳ ቢታ ቦላ ደንድስ፤ ፆንድ ባዉ ኤካናዉ ቆፕድ ግምበትዳ ካታማታ ተቅስ።

2ሳናክሬም የሩሳላመ ኦላናዉ ይዳይሳ ህዝቅያስ በእዳ ዎደ፥ 3ካታማፐ ካረራ ጎግያ ፑልቶ ሃታ ተቃናዉ ባ ሹማታነ ቶራ ሞጮናታ ዞረ ኦይችስ፤ ኤንቲ እያ ማድዶሶና። 4ዳሮ አሳይ ሺቅድ፥ “አሶረ ካዎት ይድ አይስ ሃ ደማኔ?” ያግድ ፑልቶታነ ጎግያ ሃታ ተቅዶሶና።

5ሄሳፈ ጉየ፥ ህዝቅያስ ምን ኦድ፥ ላለትዳ ድርሳ ግምበ ኡባ ዛሪድ ግምብስ፤ እያ ቦላ አዱሳ ሻኮ ሻክስ። ሄ ድርሳ ግምብያፈ ካረ ባጋራ ሀራ ድርሳ ግምበ ግምብስ። ዳዊታ ካታማን ደእያ ሚሎ ጌተትያ በሳ ምንስ፤ ዳሮ ኦላ ሚሸነ ጎንዳለ ጊግስስ።

6ኦላ ሀላቃታ አሳ ቦላ ሹምስ፤ ኤንታ ኡባ ካታማ ፐንግያ ማታን ደእያ ዳባባን ሺሽድ፥ 7“ምንተ፤ ገንጭተ፤ ኑራ ደኤይስ ኤንታራ ደኤይሳፈ አያ ግሾ አሶረ ካዋነ እያ ኦላንቾታ በእድ ያዮፍተ፥ ዳጋሞፕተ። 8እያራ አሳ ዎልቅ ደኤስ፤ ሽን ኑራ ጎዳይ ኑ ፆሳይ ኑና ማዳናዉነ ኑስ ኦለታናዉ ደኤስ” ያግድ ኤንታ ምንስ። ይሁዳ ካዎይ ህዝቅያስ ኦዳን አሳይ ምነትስ።

9ሄሳፈ ጉየ፥ አሶረ ካዎይ ሳናክሬም ባ ኦላንቾታራ ላክሶ ካታማ ተቅድ ደእሽን፥ ይሁዳ ካዋ ህዝቅያሳኮነ የሩሳላመን ደእያ ይሁዳ አሳ ኡባኮ ባ ሹማታ ኪትስ። 10አሶረ ካዎይ ሳናክሬም፥ “ተቀትዳ የሩሳላመ ካታማን ህንተ ኦናን አማነትድ ኡትደቲ? 11ህዝቅያስ፥ ‘ጎዳይ፥ ኑ ፆሳይ ኑና፥ አሶረ ካዋ ኩሸፐ አሻና’ ያግድ ጭምድ ህንተና ኮሻንነ ሳሞን ዎናዉ ሀኔስ። 12ቃ ጎይኖ በሳታነ ያርሾ በሳታ ድግድ፥ ይሁዳነ የሩሳላመ አሳ፥ ‘እስ ያርሾ በሳ ስንን ጎይንተ፤ ያርሹዋ እያ ቦላ ፁግተ’ ያገይ ህዝቅያሳ ግደኔ?

13“ታነ ታ አዋት ሀራ ካዎተታ ቦላ ኦዳባ ህንተ ኤረከቲ? ኤንታ ፆሳት ባንታ ቢታ ታ ኩሸፐ አሻናዉ ዳንዳእዶና? 14ታ አዋት ይስዳ ሀ ካዎተታ ፆሳታ ኡባ ግዶን ባ አሳ ታ ኩሸፐ አሻናዉ ዳንዳእዳይ ኦኔ? ያትን፥ ህንተ ፆሳይ ህንተና ታ ኩሸፐ ዋት አሻናዉ ዳንዳኢ? 15ህዛ ህዝቅያስ ህንተና ባለፎ ዎይኮ ሄሳዳ ጭሞፎ። ህንተ ህዝቅያሳ አማኖፕተ። እያ አሳ ታ ኩሸፐ ዎይኮ ታ አዋታ ኩሸፐ አሻናዉ ዳንዳእዳ ሀራ ቢታ ፆሳት ዎይኮ ካዎተታ ፆሳት ባዋ። ያትን፥ ሄስ ህንተ ፆሳይ ህንተና ታ ኩሸፐ አሻናዉ ዋንድ ዳንዳኢ?” ያግዶሶና።

16ሳናክሬማ ሹማት ጎዳ ፆሳ ቦላነ እያ አይልያ ህዝቅያሳ ቦላ ሀራ ዳሮባ ሃሳይዶሶና። 17ሳናክሬም ጎዳ እስራኤለ ፆሳ ጫይድ፥ “ሳአ ቦላ ደእያ ካዎተታ ፆሳት ባንታ አሳ ታ ኩሸፐ አሾናይሳዳ ህዝቅያሳ ፆሳይካ ባ አሳ ታ ኩሸፐ አሻናዉ ዳንዳኤና” ያግድ ዳብዳበ ፃፍስ። 18ሳናክሬማ ሹማት ካታማ ኦይካናዉ ኮይድ፥ ድርሳ ግምበ ቦላ ኡትዳ የሩሳላመ አሳ ያሽሳናዉነ ዳጋንናዉ ባንታ ቃላ ቁ ኦድ፥ እብራወ ዶናን ኤንታ ቦላ ዋስዶሶና። 19አሳ ኩሸን ኦሰትዳ፥ ሀ ሳአን ደእያ ሀራ ካዎተታ ፆሳታ ቦላ ኦደትዳይሳዳ የሩሳላመ ፆሳ ቦላካ ኦደትዶሶና።

20ካዎይ ህዝቅያስነ አሞፀ ናአይ፥ ናበይ እሳያስ ሄሳ ግሾ ዎሳን ሳሎ ፆሳኮ ፑደ ዋስዶሶና። 21ፆሳይ ባ ኪታንቹዋ ኪትድ አሶረ ኦላንቾታነ ቶራ ሞጮናታ ይስስ። ሄሳ ግሾ፥ አሶረ ካዎይ ካዉይድ፥ ባ ቢታ ስምስ፤ እ ባ ፆሳ ኬ ገልዳ ዎደ እያ ናይት እያ ሄ በሳን ማሻን ዎዶሶና።

22ሄሳዳ ኦድ፥ ጎዳይ ህዝቅያሳነ የሩሳላመ አሳ አሶረ ካዋ ሳናክሬማ ኩሸፐነ ሀራ ሞርከታ ኩሸፐ አሽስ፤ ኤንታ ሾሮ ቢታታ ኡባፈ ኤንታ ሸምፕስስ። 23ዳሮ አሳይ ጎዳስ እሞታ፥ ይሁዳ ካዋ ህዝቅያሳስ አልኦ ሚሸ ኤህዶሶና። ሄ ዎደፐ ዶምድ ካዎተ ኡባይ ህዝቅያሳ ዳሮ ቦንችዶሶና።

ህዝቅያሳ ኦቶሩዋነ እያ ሀይቁዋ

(2 ካዎ 20:1-3፥ 12-19፤ እሳ 38:1-3፤ 39:1-8)

24ሄ ዎደ ህዝቅያስ ሀርግድ፥ ሀይቃናዉ ማትድ ጎዳ ዎስስ። ጎዳይ ዎሰትድ እያ ፓናዉ ማላ እሚስ። 25ሽን ህዝቅያስ ኦቶርትዳ ግሾ ጎዳይ እያዉ ኬህዳ ኬሀስ በሲያ ዛሮ እምቤና። ሄሳ ጋሶን፥ እያ ቦላ፥ ይሁዳ ቦላነ የሩሳላመ ቦላ ጎዳ ሀንቆይ ይስ። 26ግዶሽን፥ ዉርሰን ህዝቅያስ ባ ኦቶሩዋ አግድ የሩሳላመ አሳታራ ባናተ ካዉሽስ። ህዝቅያስ ካዎ ግድድ ደእያ ዎደ ጎዳ ሀንቆይ ኤንታ ቦላ ይቤና።

27ህዝቅያሳስ ዳሮ ዱረተነ ቦንቾይ ደኤስ። ህዝቅያስ ባ ብራ፥ ዎርቃ፥ አልኦ ሹቻ፥ ሳዎ፥ ጎንዳለነ ሀራ አልኦ ሚሸ ኡባ ምንጅያ ኬ ኬፅስ። 28ካ፥ ዎይነ ኡሻነ ዛይተ ዎያ ኬ ኬፅስ። መሄ ዳራነ ዶርስነ ዴሽ ኤቅያ ግርበ ኦስ። 29ፆሳይ እያዉ ዳሮ አቆ እምዳ ግሾ ባዉ ካታማታ ኬፅስ፤ ዳሮ ዶርሰነ መሄ ሺሽስ። 30ቆሞ ባጋን ደእያ ግዮነ ፑልቶ ሃ ዜርድ፥ ሃይ ዉሎሀ ባጋን ደእያ ዳዊታ ካታማኮ ዱገ ጎጋና መላ ኦዳይ ህዝቅያሳ። ህዝቅያስ ኦዳባ ኡባን እንጀትዳ አስ። 31ሽን ይሁዳ ቢታን ሀንዳ ማላልስያ ኦሶታባ ኦይቻናዉ ባብሎነፐ ኪተትዳ አሳት ህዝቅያሳኮ ይዳ ዎደ ጎዳይ እያ ፓጫናዉነ እያ ዎዛናን ደእያባ ኤራናዉ እያ የድ በስስ።

32ህዝቅያስ ኦዳ ሀራባይነ እያ ኬሀተይ አሞፀ ናኣ፥ ናብያ እሳያሳ ቆንጨ ማፃፋንነ ይሁዳነ እስራኤለ ካዎታ ታርከ ማፃፋን ፃፈትስ። 33ህዝቅያስ ሀይቅድ፥ ባ ማይዛታን ጋሄትን ቆሞ ባጋራ ደእያ ዳዊታ ኮቻታ ዱፎን እያ ሞግዶሶና። እ ሀይቅን፥ ይሁዳ አሳይነ የሩሳላመ አሳይ እያ ቦንችዶሶና። እያ በሳን እያ ናአይ ምናሰይ ካዎትስ።