Isayaasa 21

Babiloone Bolla Odetida Tinbite

1Abbaa matan de7iya bazzuwas odetida qaala.

Nagebe gotey mentherethishe yeysada olanchoy bazzofe, dhayo biittafe yees.

2Taani issi yashshiya qoncethi be7as; aathid immeysi aathidi immees; di77eysi di77ees. Elama keya! Meedona katamaa oyka! Babilooney gathida waayiya taani diggana.

3Hessa gisho ta asatethay saketis; maccasi eqeteysada taani un7etas. Taani si7iyabay tana kokorsis; taani be7iyabay tana daganthis. 4Tana biicoyees; yashshan kokoras; taani ufaysi wothida omarsay un7an laametis.

5Gibira giigisidosona; uttiya soo giigisidosona; maanawunne uyanaw uttidosona. Hinteno halaqato, dendite! Hinte gondalliya quchite!

6Goday taako haysada yaagis: “Bada haniyaba wochidi new odiya asi wotha. 7Parati gaare goochiya wode, harenne gimale toggeyisata be7iya wode, loythidi xeello; akeekidi be7o” yaagis.

8Wocheysi, “Godaw, gallasinne qamma paci bayna ta shakuwa bolla uttada naagayis. 9Heko, nam7a nam7a gididi para gaare toggida asati yoosona” yaagis. I qassika, “Babilooney kundis; iya xoossata misileti sa7an kundidi gaacetidosona” yaagidi waassis. 10Hinteno, wudumman gaacetida ta asaw, Ubbaafe Wolqaama Godaape, Isra7eele Xoossaafe si7idaba taani hintew odayis.

Edoome Bolla Odetida Tinbite

11Edoomeba Goday haysada yaagis: “Issi asi Sayrepe tana xeegidi, naageyso, sa7i wontanaw ay mali attidee? Naageyso, sa7i geeyanaw ay mali attidee?” yaagees. 12Naageysi zaaridi, “Sa7i wontana hanees; shin zaari qammana. Hinte oychanaw koyko oychite; simmi yidi oychite” yaagis.

Arabe Bolla Odetida Tinbite

13Arabe ba Goday haysada yaagees: “Hinteno Daadana zal7anchoto, hinte, hinte caana gimaletara Arabe mela biittan aqana. 14Hinteno, Teeman biittan de7iya asaw, saamotidaysatas haathe ehite; koshatidaysatas kathi immite. 15Enti mashshafe, shohope shodetida mashshafe, dafetida dongefenne mino olape baqatoosona” yaagees.

16Goday taako haysada yaagis: “Une oosancho wodey wureysada, issi laytha giddon Qedaare boncho ubbay wurana. 17Qedaaren de7iya dongen dukiya wolqaama olanchotape guuthati attana; Goday Isra7eele Xoossay hessa odis” yaagis.