Thaburi 138

Ihooya rĩa Gũcookia Ngaatho

Thaburi ya Daudi

1Wee Jehova, nĩngũkũgooca na ngoro yakwa yothe;

ngũkũinĩra ngũgooce ngai iria ingĩ irĩ o ho.

2Ngũinamĩrĩra njerekeire hekarũ-inĩ yaku ĩrĩa nyamũre,

ngooce rĩĩtwa rĩaku,

nĩ ũndũ wa wendo waku na wĩhokeku waku,

nĩgũkorwo nĩũtũũgĩrĩtie rĩĩtwa rĩaku,

na ũgatũũgĩria kiugo gĩaku

makĩria ya maũndũ marĩa mangĩ mothe.

3Hĩndĩ ĩrĩa ndagwĩtire, nĩwanjĩtĩkire;

wanyũmĩrĩirie na ũkĩnjĩkĩra hinya ngoro.

4Wee Jehova-rĩ, athamaki othe a thĩ nĩmakũgoocage,

rĩrĩa maigua ciugo cia kanua gaku.

5Nĩmaganage ũhoro wa njĩra cia Jehova,

nĩgũkorwo riiri wa Jehova nĩ mũnene.

6O na gũtũĩka Jehova arĩ igũrũ-rĩ,

nĩaroraga andũ arĩa enyiihia,

no arĩa etĩĩi akamenya ũhoro wao arĩ o kũraya.

7O na ingĩgerera mathĩĩna-inĩ,

Wee nĩũmenyagĩrĩra muoyo wakwa;

ũtambũrũkagia guoko gwaku ũgookĩrĩra marakara ma thũ ciakwa,

ũkaahonokia na guoko gwaku kwa ũrĩo.

8Jehova nĩakahingia muoroto wake harĩ niĩ;

wendo waku, Wee Jehova, nĩ wa tene na tene;

nĩ ũndũ ũcio ndũgatiganĩrie wĩra wa moko maku.